The Definitive Guide to Living in the Capital , Cairo , Egypt

كتب: محمد طلعت

5 سنين فاتوا ومبادرة “معرض وكتاب وصحبة” مستمرة فى فاعليتها لتشجيع الطلاب المصريين، والسوريين لزيارة معرض القاهرة الدولي للكتاب، من خلال تنظيم محاضرات وورش عمل بيعرفوا من خلالها أهمية زيارة المعرض السنوي، والاستفادة من فاعليات المبادرة.

كل عام وقت انطلاق معرض القاهرة الدولي للكتاب تنطلق فاعليات مبادرة معرض وكتاب وصحبة علشان يستفيد مئات الطلاب من مصر وسوريا، وكل سنة بيتم استهداف مجموعات مالحقتش تزور المعرض قبل كده.

المبادرة دي دليل ومرشد ومحفز، علشان تقدر تزور أكبر حدث ثقافي عربي، وفيها ورش عمل طويلة للتحفيز على القراءة، وإزاي تختار كتاب تستفيد منه وتستمتع بيه، كمان بتقدر تعرف إزاي تختصر كتاب، والأهم أنك بتعرف تاريخ معرض الكتاب بالكامل وأهم المكتبات والخصومات اللى بتقدمها، وفيه فقرات ترفيهية للمشاركين مجانًا.

وقال باسم الجنوبي، مؤسس مبادرة معرض وكتاب وصحبة أن الموسم الخامس لورش العمل تستهدف شريحة الشباب والطلاب بالإضافة للجالية السورية الجديدة في مصر ومهمتهم بث مفاهيم ومهارات جديدة للاستفادة من معرض القاهرة الدولي.

وكمل شرح الجنوبي بأن معرض القاهرة الدولي للكتاب يختلف فى السنة دي  بسبب الظرف الإقتصادي الصعب للغاية، ولازم يبقى فيه توجيه صحيح وتعريف بالمعرض كمشهد ثقافي وليس استهلاكي، يستفيد منه الشاب بأقصى درجة، من خلال حضور الفاعليات الثقافية وشراء الكتب، كمان  الكتب بتكون  بأسعار مخفضة من خلال مكتبات وزارة الثقافة مثل الهيئة العامة للكتاب والهيئة العامة لقصور الثقافة والمركز القومي للترجمة ودار الهلال وسور الأزبكية.

وفي لفتة طيبة من هيثم الحاج، مدير معرض القاهرة الدولي للكتاب فى دورته الـ49، تم تكريم المبادرة ومنحهم 600 تصريح دائم مجانًا من أجل الشباب والطلاب.

المبادرة دي هي إحدى مبادرات حملة “ثقافة للحياة”، اللى بتشتغل على تشجيع القراءة وريادة الأعمال، ونظمت من قبل أول معرض كتاب مجاني من خلال “التبادل”، وكمان أسست مبادرات “ونس الكتب” ، “قوة القراءة” ، “استرجل واقرأ 10 كتب“.

وكل يوم هتلاقيهم موجودين فى معرض الكتاب وفى الغالب بالقاعة الرئيسية أو منتشرين داخل المعرض، من 12 ظهرًا حتى 5 مساءً.