The Definitive Guide to Living in the Capital , Cairo , Egypt

تم التحديث في 13 أبريل 2025

الصورة الرئيسية: Arno Smit

بتحب الزرع؟ بتتبسط من ريحة الورد وشكل الخضرة؟ بتحلم ترجع من شغلك تلاقي زرع جميل مستنيك في بلكونة بيتك؟ معرض زهور الربيع راجع من تاني في دورته الـ92، وجايب معاه كل حاجة ممكن تتخيلها من زهور ونباتات وشجر وديكورات، لحد المنتجات الطبيعية والهاند ميد… وكمان مفاجآت أول مرة تحصل! المعرض هيكون في قلب المتحف الزراعي بالدقي، هتدخل مكان كأنك في جنة خضرا، تتفرج، تشتري، تتعلم، وتتبسط.

اقرأ أيضًا: معرض زهور الربيع 2025: كل التفاصيل والأسعار ونصائح للزيارة (صور)

معرض زهور الربيع من أقدم المعارض في مصر والشرق الأوسط، وأول نسخة منه كانت سنة 1934، وكل سنة بيضم مجموعة كبيرة من العارضين للزهور والنباتات والأدوات الخاصة بالزراعة. وكمان هتلاقوا قسم للحيوانات الأليفة والعسل ومنتجات الهاند ميد.

كمان هتلاقوا في المعرض مجموعة من العارضين المتخصصين في اللاند سكيب والديكورات المنزلية من منتجات زراعية وشلالات وحاجات تانية كتير، ومعاهم كمان متخصصين في أنظمة الري والزراعة سواء للمنازل أو للحدايق الكبيرة.

والمعرض بيقدم، زي كل سنة، ورش عمل ودورات تثقيفية متخصصة في النباتات وزراعتها وطرق الحفاظ عليها. والسنة دي، لأول مرة، هتشارك منظمة الأغذية والزراعة بالأمم المتحدة، والمعروفة باسم “الفاو”، في المعرض، وكمان اتوجهت دعوات للسفارات العربية والأجنبية علشان يشاركوا.

معرض زهور الربيع كان مفترض ينطلق يوم 12 أبريل ويستمر لمدة شهر، لكن أحمد إبراهيم المستشار الإعلامي لوزير الزراعة أعلن عن تأجيل الافتتاح لمنح العارضين وقت إضافي لنقل منتجاتهم الزراعية، وتم افتتاح المعرض بشكل رسمي في 19 أبريل 2025، وهيستمر لمدة شهر، يعني لحد 19 مايو 2025.