The Definitive Guide to Living in the Capital , Cairo , Egypt

الصورة الرئيسية: Anthony Melone

مصر كل سنة بتعمل معرضين للزهور، واحد في الربيع، والتاني في الخريف، وده علشان توفر فرصة لمحبي الزهور أنهم يلاقوا كل اللي محتاجينه من المنتجات الزراعية، وفي 2024، هتقدروا تحضروا معرض الزهور الدولي، اللي نقدر نقول إنه امتداد وتطوير لمعرض زهور الربيع الشهير اللي كانت بتستضيفه حديقة الأورمان التاريخية.

معرض الزهور الدولي فاتح أبوابه حاليًا في حديقة الحرية الشهيرة بالقرب من كوبري قصر النيل، وخلال السطور الجاية هنقول لكم على كل اللي محتاجين تعرفوه عن معرض الزهور الدولي 2024.

معرض الزهور الدولي بيقدم لكم زيارة ممتعة ومتميزة هتتعرفوا خلالها على أنواع كثيرة من الزهور والنباتات، وسط الطبيعة الخلابة بحديقة الحرية، والمعرض مستمر حتى يوم 10 نوفمبر 2024، ومواعيده من الساعة 9 صباحًا حتى الساعة 12 مساءً.

في البداية خلينا نقول لكم إزاي توصلوا لمعرض الزهور الدولي؛ تقدروا تاخدوا مترو من أي مكان لمحطة الأوبرا بالخط الثاني ومخرج المحطة ملاصق لسور الحديقة، وكمان تقدروا تركبوا ميكروباص أو أتوبيس بيمر على كوبري قصر النيل وتنزلوا قدام باب حديقة الحرية، ولو أنتم رايحيين بسيارة خاصة تقدروا تركنوها في أي مكان مكناسب في الدقي أو الزمالك وتتمشوا لحد حديقة الحرية.

رسم دخول الحديقة 20 جنيه، وده كل اللي هتدفعوه، ومتاح كمان تصطحبوا أطفالكم معاكم بتذكرة سعرها 10 جنيه علشان يستمتعوا بيوم وسط الخضرة والزهور والنباتات المميزة، وهناك هتلاقوا كثير من أنواع النباتات، سواء كانت زينة أو طبية أو عطرية وغيرها، وكمان هتلاقوا مجموعة من العارضين بيقدموا كل أدوات الزراعة اللازمة اللي تنفع كل بيت، ده غير بقى الشتلات الزراعية والندوات التثقيفية والتعريفية، والعروض المميزة من العارضين لجذب الزوار للشراء.

والمعرض بيضم أقسام اللاند سكيب والمنتجات الغذائية والزراعية بجانب قسم الزراعات والنباتات والزهور، وكمان فيه كافيهات ومطاعم لخدمة الرواد، وكمان فيه مصورين لتصويركم صور احترافية بمقابل معقول.

وإحنا في كايرو 360 بننصحكم تروحوا المعرض بملابس قطنية خفيفة وأثناء التجول مهم تشربوا مياه بكثرة علشان تديكم نشاط، وحددوا المنتجات اللي عاوزين تشتروها من البداية، لكن لو مش مقررين عاوزين إيه يبقى لازم تاخدوا لفة كاملة الأول تتعرفوا على المنتجات المتاحة وأسعارها وبعدين تشتروا، وماتنسوش دايمًا تتعرفوا على طرق الحفاظ على النباتات والاعتناء بها، لأن دايمًا الشكوى بتكون “بنشتري النبات مورد وجميل وبيموت في البيت” وده بسبب طرق الرعاية الخاطئة.

بنتمنى لكم يوم مميز وسعيد في معرض الزهور الدولي.