The Definitive Guide to Living in the Capital , Cairo , Egypt

كتبت: نجلا أشرف

الصور عن صفحة المعرض على الفيسبوك.

بنودع فصل الشتاء بأيام خريفية خفيفة، علشان يبدأ مع شهر أبريل بداية فصل الصيف والربيع وتبدأ الزهور تفتح والشوارع تتملي ألوان مبهجة. ومن المعارض اللي بتتعمل كل سنة ومش معروف لناس كتير هو “معرض الزهور” اللي بيتعمل كل سنة في حديقة الأورمان، وأجمل حاجة فيه أنه بيكون فيه أنواع زهور نادرة بكميات كبيرة وأسعار معقولة تشجع أي حد ناوي يزرع في البلكونة بتاعته أو الجنينة الخاصة بيه أنه يشتري كل اللي نفسه فيه من هناك.

المعرض السنة دي هيبدأ يوم السبت 18 مارس 2017 وهيستمر لمدة شهرين من الساعة 9 الصبح لـ 9 بليل، كمان أجمل حاجة في المعرض أنه مش بس فيه أنواع نباتات عادية ونادرة لأ ده بيقدم كمان خدمات مختلفة زي أنك ممكن تشتري من هناك أنواع عسل نحل ومخلل وفاكهة طازة في القسم الخاص بوزارة الزراعة، غير السوداني  الأسواني والعسلية النوبي في الجناح النوبي.

ومعدات الزراعة والقصاري المتوفرة بكثرة هناك.

 بس أكتر حاجة ممتعة هي معارض اللاند سكيب والنوافير والشلالات هتنبسط يعني هتنبسط.

المعرض بيقدم خدمات كتير وينفع خروجة لأي حد بيحب الجمال والورد أو حتى عاوز يقضي يوم مختلف حتى لو مش هيشتري حاجة، كفاية أنه يمشي وسط الطبيعة ويبعد عن الدوشة والتلوث.

وتقدروا تعرفوا كل التفاصيل من صفحة المعرض على الفيسبوك هنا.