The Definitive Guide to Living in the Capital , Cairo , Egypt

أرقام غريبة جدًا جدًا سمعناها لما حبينا نتواصل مع منظمين فعاليات، سواء أفراد أو شركات لتنظيم حفلة سبوع للبيبي، كل اللي طلبناه حاجات بسيطة لحفلة على الضيق في البيت، شوية زينة، على كام علبة سبوع، على كام بالونة، مسائل بسيطة جدًا، سمعنا أرقام من ألف لألفين ووصل لثلاثة! ده من غير فشار ولا أي حاجة، طبعًا كانت صدمة.

قررنا ننزل درب البرابرة، نأخذ فكرة ونعرف الأسعار، وفعلاً نزلنا وعرفنا أن فيه فرص كثير للأباء والأمهات الجدد أنهم يشتروا السبوع جاهز وينقلوه من هناك أو لو لهم مزاج يشتروا الخامات ويعملوها بنفسهم.

المحلات هناك كثيرة جدًا والاختيارات رائعة ومميزة وكل تفاصيل السبوع من الأبرة للصاروخ موجودة، منخل البيبي، وكمان فيه ابتكارات ثانية لشكله زي أنه يبقى سرير أو عربية صغيرة وخلافه، وكمان الأبريق والقلة والشمع وعلب السبوع على اختلافها والحلويات واللعب وكل حاجة.

لو هـ تشتروا السبوع جاهز، يعني العلبة مقفولة وفيها البونبوني، والشوكولاتة واللعبة أو  التحفة والكارت اللي فيه اسم البيبي وتاريخ ميلاده، وكمان شريطة ستان فيونكة عليها اسمه، فأنتم بـ تتكلموا في أسعار بـ تبدأ من 4 جنيه للعلبة وبـ تطلع لحد 10 و15 جنيه حسب الشكل والنوع وقيمة التحفة، شوفنا اختيارات كثير جدًا عجبتنا، وفعلاً بـ تأخذ الحاجة مقفولة وفي وقت قياسي جدًا من وقت الاتفاق تقريبًا ثلاث أيام بالكثير.

فيه إمكانية ثانية أنكم تشتروا الخامات وتعملوها بأيديكم، والموضوع سهل، العلب متوفرة بكل الأشكال وتقفيلها مافيش أسهل منه، أسعارها من أول الـ 100 كيس بـ 8 جنيه، لحد سهر العلبة الواحد جنيه وجنيه وربع، حسب الشكل والخامة، وكمان التحف والخامات فرداني، لكن اللي اكتشفناه أنكم لو سألتم عن سعر الخامات عند محل هـ تسمعوا سعر، لكن لو عرف أنكم هـ تشتروها لوحدها من غير الحلويات هـ يقول لكم سعر ثاني خالص، يعني مثلاً ممكن يكون دستة اللعب بـ 9 جنيه، لكن لو عرف أنه مش هـ يقفلها ولا هـ تشتروا منه الحلويات يقولك 25 جنيه، وهكذا، لكن خلينا نقول أن نوعيات الحلويات سيئة ما عجبتناش ومافيش بينها اختيارات كثير، هي نفس النوعيات عند الكل.

إحنا فكرنا في فكرة أننا نقفل حاجة السبوع بأيدينا، في البداية تصورنا أن ده هـ يوفر، لكن بمقاييس وأسعار هناك عمرهم ما هـ يسيبوك توفر أبدًا، وعلى هذا الأساس فكرنا أنه الموضوع صحيح مافيهوش توفير زيادة لكن فيه حميمية وحب، لو هـ تعمل سبوع البيبي بأيده تختار هـ تحط إيه في العلبة وإزاي وبأنهى طريقة وهـ تكتب للناس إيه، لكنها مميزات مش هـ يقدر صاحب المحل يوفرها لو العلبة جاهزة، على هذا الأساس بدأنا نسأل.

لو هـ تجيبوا التحف لوحدكم فالأسعار مختلفة، فيه حاجات بـ 12 جنيه، وحاجات 13 وحاجات بـ 20 وحاجات بـ 25 وحاجات بـ 27 جنيه، نصيحتنا لكم لفوا بالراحة، وما تخلوش الألوان والبهرجة تخطفكم ولا المحلات اللي أول السوق تأخذكم، ادخلوا جوه أكثر واسألوا على الأسعار واكتبوها وقارنوا، إحنا اشترينا حاجة وكانت في المحل اللي جنبها أقل اثنين جنيه.

المكان مش بس فيه حاجة السبوع لكن كمان حاجة الزينة، وكل تفاصيلها من بلالين بكل الألوان ولعب، وحروف تلمع باسم البيبي، كل حاجة ممكن تتخيلوها وبـ تشوفوها بأسعار خيالية هناك بأسعار مش رخيصة لكن كمان مش بشعة زي ما بـ تشوفوها بره، يعني جملة "Welcome Baby" حروف على شريط ستان عريض بـ 15 جنيه، أشكال مختلفة بـ تشير أن المولود ولد أو بنت بـ تبدأ من خمسة وتنتهي عند 15 و20 جنيه، الـ 50 بالونة بـ 25 جنيه، يعني بـ 150 جنيه ممكن تجيب تحضيرات ظريفة وحلوة للسبوع لو حد جه عملها لك هـ تكلفك أكثر بكثير.

أحسن حاجة فى درب البرابرة التنوع وإمكانية الاختيار بين أشكال ومستويات سبوع كثير، بس تفاوت الأسعار الكبير بين محل والثاني والمستوى المنخفض للحلويات المعروضة نقطة مش لطيفة، فى الآخر لف بالراحة وخليك صبور وهادئ، وصور الحاجات اللي تشوفها وبعد ما تستقر اشتري وفاصل براحتك وخفض خمسة جنيه على الأقل.