مركز “نوباديا” الثقافي.. قطعة من أسوان على أرض القاهرة (صور)
أسوان أكل نوبي المعادي النوبة ثقافة خروجة عيد ميلاد مراكز نوبية في القاهرة مركز نوباديا الثقافي مساحات عمل مشتركة في المعادي نوباديا
Mohamed Talaat
حلم السفر لأسوان وزيارة النوبة وأهلها الطيبين والاستمتاع بجمال مبانيها وألوانها وثقافتها موجود جوه كتير مننا، وفيه اللي يقدر يحقق حلمه ويسافر أسوان في رحلة، وفيه اللي لسة بيخطط يعمل ده في المستقبل، وسواء كنتم سافرتم النوبة أو نفسكم تعملوا ده الفترة الجاية، تقدروا حاليًا تستمتعوا بروحها وجمالها في القاهرة، وبالتحديد في المعادي، من خلال زيارة مركز “نوباديا” الثقافي.
تعالوا نتعرف أكتر على المكان الجميل ده، ونعرف قصته.
الفكرة بدأت بحلم من المصور رمضان الفاضل ابن النوبة، اللي كان عاوز ينقل ثقافة الجنوب عامة والنوبة خاصة لأماكن تانية، وده بسبب أنه اتسأل كتير عن تاريخ النوبة بحكم شغله في الأفلام الوثائقية وسفره أماكن كتير داخل مصر، وبالفعل بدء يدور على مكان علشان يبدأ ينقل عادات وتقاليد وروح وألوان النوبة للقاهرة كبداية لانطلاقها لكل محافظات مصر، لحد ما وجد مكان مناسب وقرر يطلق مركز “نوباديا” الثقافي.
المكان كل ديكوراته نوبية وده خلى روحه تبقى قريبة بدرجة كبيرة من روح النوبة الجميلة، وبمجرد ما توصلوا المركز هتحسوا كأنكم سافرتم للنوبة، بالألوان والأشكال النوبية والرسومات اللي بتزين المكان لفنانين من عالم النوبة زي حمزة علاء الدين ومحمد منير، ده غير الحروف النوبية المكتوبة حواليكم، والأعمال اليدوية والصور المميزة.
المكان فعلًا بيحكي تاريخ أرض الدهب، وهتحسوا هناك براحة نفسية حقيقية، والمكان بيوفر لكم كمان مساحة عمل مشتركة تقدروا تنجزوا فيها شغلكم وتشربوا أجمل المشروبات النوبية وأهمها “الجبنة – أبريق”، وكمان ممكن تقروا أو ترسموا، ولو حسيتم بالجوع، فالمطعم عندهم بيقدم أكلات مشهورة في الجنوب عامة والنوبة خاصة، بس الأكل لازم تطلبوه قبل ما تروحوا “بالحجز” علشان بياخد وقت في التجهيز.
كمان هتلاقوا عندهم غرفة ملابس مهتمة باللبس الأفريقي واللي بيصممه سامر سواجر، وتقدروا تتعرفوا على لبس كل ثقافة مختلفة من دول أفريقيا، وفيه غرفة الجاليري اللي كلها لوحات وصور عن أسوان والنوبة والجنوب بشكل عام، وده غير المعابد المشهورة.
ومن أجمل الأماكن في مركز “نوباديا” الثقافي هي غرفة المشغولات اليدوية، اللي فيها كل المشغولات الهاند الميد اللي ممكن تجننكم بجمالها سواء كانت نوبية أو مودرن، ومصنوعة بجودة واحترافية عالية.
ولو عاوزين تعملوا عيد ميلاد أو حفلة صغيرة في المكان فده متاح، وحتى لو عازين تصوروا فوتوسيشن مميز تقدروا تعملوا ده هناك.
باختصار هتعرفوا في مركز “نوباديا” الثقافي كل تاريخ النوبة الفني والثقافي وسط أجمل الاغاني النوبية المميزة.
تقدروا تزوروا مركز “نوباديا” الثقافي في أرض البيصري – قريب من شارع 77 – المعادي
أو زوروا صفحتهم على الفيسبوك من هنا.
رقم التليفون: 01090191172.
