مركز الطفل للحضارة والإبداع.. خروجة علمية وترفيهية في مصر الجديدة
حديقة الغابة خروجة للأطفال فسحة عائلية فسحة للأطفال مركز الطفل للحضارة
Mohamed Talaat
تصوير: بسمة محمود
تعليم الأطفال بطريقة شيقة من الحاجات المهمة اللي بتنمي قدراتهم، والأكيد إن اللي بنتعلمه في الصغر مش بيتنسي في الكِبر، وفي مركز الطفل للحضارة والابداع أطفالكم هيتعلموا حاجات كتير مختلفة، وهيسافروا في رحلة ترفيهية تعليمية تثقيفية فنية.
في الموضوع ده هنعرفكم أكثر على مركز الطفل للحضارة والإبداع، واللي مواعيد زيارته بتبدأ من 9 صباحًا.
مركز الطفل للحضارة والإبداع تأسس سنة 1966 وتم تجديده وافتتاحه عام 2022 وموجود داخل حديق الغابة في مصر الجديدة، وبيتعمل له رحلات متخصصة علشان الطفل يتعرف على العلوم المختلفة، وكمان يتعرف على تاريخ مصر.
الجولة بتبدأ بحديقة فيها رحلة هتسافر بأطفالكم لرحلة في زمان ومكان مختلف، وفيها مجسمات لحيوانات كتير، وكمان فيها مسرح للحفلات ومسرح للعرائس، ومنطقة ألعاب مقسمة للأطفال، ده غير أن ممكن أي حد ممكن يعمل فوتوسيشن هناك ولكن بالحجز، وعندهم منطقة للورش الفنية والحرفية، والحديقة بتحتوي على كافيه كبير يساع 100 شخص.
بيضم المركز 5 قاعات للعلوم المختلفة، وخلال 60 دقيقة بيتعرف الطفل على كوكب المريخ و 4 علوم “جغرافيا – جيولوجيا – فيزياء – طبيعة”، ورحلة كوكب المريخ في القاعة الأولى بتكون من خلال شاشة كبيرة بتعرض فيلم تسجيلي عن صعود سفينة فضاء لكوكب المريخ وبيثبتوا من خلال مدة الفيلم أن مفيش إنسان عايش على الكوكب.
أما القاعة الثانية فهتلاقوا فيها مركبة فضائية ويقدر الطفل يصنع واحدة زيها كماكيت وليها جزء خاص بالعجلات الرياضية، والقاعة الثالثة هيتعرف فيها الطفل على لوحة الشرف للعلماء المصريين والأجانب وإنجازاتهم.
وداخل القاعة الرابعة هيتعرف الطفل على الكائنات الحية ومركز الأرض وجسم الإنسان ومعمل العجائب، ومجموعة من العلوم المختلفة وموارد وطاقات الأرض، والقاعة فيها 4 ميكروسكوب بيحلل الطفل من خلالهم عينات من البكتيريا والطالحب اللي بتعالج التربة والهواء والماء.
كمان في القاعة الخامسة هيزور الطفل مجسمين للأرض وفي وسط القاعة هيلاقى ترابيز مستطيلة وملونة فيها 5 فتحات من المخلفات العضوية والورق والقمامة والبلاستيك وبواقي الطعام، وبيجتهد الطفل أنه يقدر يحط كل نوع من القمامة دي في الفتحة المخصصة من الـ5 فتحات.
وداخل مركز الطفل للحضارة والإبداع هتلاقوا كمان متحف مميز بيحكي عن الحضارة المصرية القديمة والنيل والزراعة، وبيكون معاكم مرشد بيشرح كل حاجة.
العنوان: 34 أبو بكر الصديق، هليوبليس.
وتقدروا تعرفوا أكتر عنهم من خلال صفحة الفيسبوك من هنا.
