The Definitive Guide to Living in the Capital , Cairo , Egypt

المتاحف التاريخية في القاهرة مش بس بتعرفك معلومات عن الحضارة المصرية في عصور مختلفة، لكنها تجربة ممتعة وأقرب لآلة زمن بتسافر بك لعوالم وأزمنة، وبتخليك تتعرف على مصر وفنها عبر العصور. هنعرفك على 3 متاحف تاريخية هينقلوك لعصور مختلفة، وهيعرفوك أكثر على تاريخ بلدنا المدهش.

 

المتحف القومي للحضارة المصرية

المتحف القومي للحضارة المصرية موجود في مدينة الفسطاط وتقدروا هناك تتعرفوا على التراث المصري واللي بيوضح الحضارة المصرية عبر عصورها المختلفة بداية من عصور ما قبل التاريخ ومرورًا بالعصور المصرية القديمة والحديثة والمعاصرة، وهتلاقوا داخل المتحف آثار فرعونية ورومانية ويونانية وقبطية وإسلامية وغيرها.

سعر تذكرة المتحف القومي للحضارة للمصريين 80 جنيه وللطلبة 40 جنيه.

المتحف المصري بالتحرير

المتحف المصري بميدان التحرير بينقلكم من الحقبة الزمنية الحالية لعصر ما قبل التاريخ وبيعرفكم على أجدادنا الفراعنة اللي هتنبهروا بجمال صنعهم ومهاراتهم في التحنيط والرسم والنحت، وهتتعرفوا كمان على تاريخ الآثار الفرعونية وحضارة 7000 سنة وأسرار ماحدش وصلها غير القدماء المصريين، وهو مكون من دورين، الأول هتلاقوا فيه التوابيت وتماثيل كبيرة من الحجر الجيري والرملي ولوحات مختلفة، والثاني ففيها آثار من عصر الدولة الفرعونية الحديثة.

سعر تذكرة المتحف المصري 150 جنيه للكبار و75 جنيه لمن هم أقل من 21 سنة وللطلبة.

متحف الفن الإسلامي

أكبر متحف للفن الإسلامي، موجود في باب الخلق، وبيحتوي على ما يقرب من 100 ألف قطعة بتشهد على العصور الإسلامية المختلفة وتاريخها، وهتستمعوا هناك برؤية أدوات الفلك زي الإسطرلاب والشمعدانات المنسوبة لعصر المماليك، والطسوت والثريات والكراسي المطعمة بالفضة والذهب والزخارف الإسلامية وكمان هتلاقوا مفتاح للكعبة المشرفة من النحاس المطلي بالذهب والفضة.

سعر تذكرة متحف الفن الإسلامي 20 جنيه للكبار و10 جنيه للطلبة.