The Definitive Guide to Living in the Capital , Cairo , Egypt

هاي أنت.. أيوة بكلمك أنت

هاي أنتِ.. أيوة أنتِ

الفلانتين جه وأنتم لسه سنجل؟ كل الدنيا حواليكم ورد ودباديب وأنتم قاعدين زي عواجيز الزفة؟ ماتقلقلوش إحنا النهارده مش جايين نقولكم على حلول. لأ بالعكس، إحنا جايين نعرفكم على شوية أسباب ممكن تكون السبب في حالتكم دي. إنما الحلول دي مع نفسكم بقى. يلا نشوف أنتم سنجل ليه:

1- شخص أناني وبخيل

ممكن تكون شخص أناني مابتحبش غير نفسك. أو دايمًا أنت ليك الأولوية، وأي حد تاني بعدك مش مهم. فابلتالي بتفكر في نفسك بس ومالكش دعوة بالطرف التاني. طب ينفع كده؟ طب يرضيكم كده؟

ويا سلام لو بخيل بقى، يبقى أنت كده هتخلل يا معلم. ماهو جو التوفير الأوفر ده يطفش أي حد الصراحة.

2- انطوائي

لو أنت مقفول على نفسك أكيد مش هتعرف طريق الارتباط. ده أنت كمان مش هتعرف ريحة الصداقة العادية أصلًا، طول ما تعاملاتك كلها في المحدود. لازم تفك كده وتخلي البساط أحمدي.

3- تنك

خلينا متفقين إن التناكة دي ماحدش بيطقيها، سواء من الولاد أو البنات. فلما تبقى شخص تنك ومايعجبكش العجب، وشايف إنك كتير على أي حد، خلاص يبقى استنى بقى ترتبط / ـي بكائن من المريخ مثلًا. كل شيء جايز برضه.

4- الخوف من الالتزام

أي علاقة بين اتنين لازم يكون فيها التزام من كل طرف تجاه العلاقة دي. ويكون في إحساس بالمسؤلية كمان. فوارد جدًا حضرتك مالكش / مالكيش علاقة بالكلام ده. فطبيعي تبقى سنجل.

5- متحكم

الارتباط معناه مشاركة وتفاهم يا أساتذة. مش واحد يؤمر والتاني ينفذ. أو واحد دايمًا يشد والتاني يرخي. أكيد ماحدش بيقبل إنه يكون تحت السيطرة في العلاقة. وبالتالي حضراتكم قاعدين على الكنبة، وباقي أصحابكم بيجيبوا ورد  ودباديب.

6- دراما كوين

دي الصراحة صفة خاصة بالبنات، وباعترافاتهم (على رأي الفنان عمرو مصطفى). ماهو مفيش داعي تعملي خناقة، لو هو نسي لون المانيكير اللي بتحطيه يوم الخميس وأنتِ رايحة السينما. اللي هو غير اللون بتاع يوم الأربعاء وأنتِ راجعة من الشغل. كبروا دماغكم بقى.

7- ماحدش طايقك

وده بصراحة سبب كافي يعني، بس محتاج تصالح مع النفس. مش يمكن ماحدش طايقكم يا جدعان. شوفوا بقى عيبوبكم واشتغلوا عليهم. ويمكن تظبط معاكم الفلانتين الجي.

وفي النهاية سامعك يا اللي بتقول / ي وأنا أعمل إيه يعني؟ ما الأستاذ غسان مطر قالها صريحة: اعمل الصح.