The Definitive Guide to Living in the Capital , Cairo , Egypt

رنا شرف

في فصل الصيف، وبسبب درجة الحرارة العالية، أغلبنا بيحاول يهرب من الحر الشديد، وفيه اللي بيسافر يومين للساحل أوالعين السخنة، لكن للأسف فيه كتير مننا ماعندوش وقت للسفر ومضطر يفضل في القاهرة. طيب نعمل إيه لو عايزين نقضي يوم علي حمام السباحة ونستمتع كأننا في المصيف؟!

النهارده، قررنا نروح معاكم لـ 5 أماكن قريبين، ممكن تقضوا فيهم إجازة ليوم واحد، وأكيد هتنبسطوا وسط المياه والألعاب.

أكوا بارك

كلنا مر علينا الإسم ده وإحنا صغيرين، وأغلبنا راح قضي فيها يوم من المتعة.

كانت أشهر ملاهي مائية في مصر ومازلت ممتعة. فيها ألعاب مائية مختلفة، مناسبة للأطفال وحتى للكبار. كمان فيها زحاليق أسطوانية ممتعة، كمان فيها مطعم علشان لو حابب تتغدى أو تشرب مشروبات وعصاير فريش.

أكوا بارك في طريق مصر الإسماعلية الصحراوي، وسعر التذكرة 250 جنيه شاملة وجبة غداء ومشروب وكابينة تغيير ملابس.

Villa Belle Époque – فيلا بيل إيبوك

شكل تاني من أشكال الاستمتاع بالمياه، بس هي مش ملاهي مائية، لكنها فيلا في المعادي مبنية علي الطراز الأروبي، وهي من العشرينيات، لكن اتحول المكان لفندق كبير.

الفيلا فيها حمام سباحة، ومناسبة جدًا لـ “داي يوز” تستمتع فيه بجو هادئ ورومانسي بعيد عن الدوشة، وفي نفس الوقت لو حبيت تبلبط هتلاقي حمام سباحة!

أسعار الـ “داي يوز” بتبتدي من 700 جنيه.

العنوان: 61 شارع 13، المعادي. رقمهم 0223580265.

بيوت باي

لو عايز تقضي يوم عائلي وتبلبط في المياه وتستمتع بغداء جميل وكمان تسمع موسيقي، يبقي بيوت باي مناسب ليك جدًا. المكان بيرحب بالأطفال والكبار، وفيه شو بيتعمل بالعرائس، ده غير المطاعم اللي بتقدم كل أنواع الأكلات كمان. وبيكون فيه مطربين بيقدموا حفلات غنائية.

العنوان: طريق مصر الإسكندرية الصحراوي، 15 دقيقة من داندي مول.

تليفون: 01065111111.

سعر الفرد 800 جنيه.

محمد علي كلوب

من الأماكن الحلوة في القاهرة، اللي ليها تاريخ مهم. فيها حمام سباحة كبير والفيو هناك جميل. المكان فيه مطعم وتقدر تشرب مشروباتك اللي بتحبها وتستمتع حوالين حمام السباحة بيوم جميل. سعر الفرد 150 جنيه والمكان موجود في الكيلو 13 طريق الصعيد الزراعي امتداد شارع البحر الأعظم.

عند عمرو

من الأماكن اللي نقدر نقول إن عشاق الرياضة هيحبوها بجد! لأن المكان بيوفر لعشاق الخيول والكرة والسباحة يوم عالمي من المتعة.

المكان فيه حمام سباحة كبير وأكل كمان، هتقدروا تتغدوا هناك أو تفطروا أو تتعشوا.

سعر الفرد شامل وجبة غداء أو عشاء بيبدأ من 530 جنيه.

“عند عمرو” موجود في 25  طريق مصر الإسكندرية الصحرواي.

تليفون: 01121333374.