The Definitive Guide to Living in the Capital , Cairo , Egypt

القاهرة فيها أماكن كتير تنفع تكون لوكيشن لصور رومانسية حلوة تفضل ذكرى باقية. في كايرو 360 اخترنا لكم 5 أماكن الصور فيهم هتكون أجمل، ويبقى منها خروجة حلوة غير مكلفة، وفي نفس الوقت هتقدر تصنع فيهم أجمل صور رومانسية “للذكرى الخالدة”.

1 – كوبري المانسترلي

لو بتحب الأماكن الكلاسيكية، اللي بتعبر عن جزء مهم من تاريخ القاهرة، ننصحك تروح كوبري المانسترلي بالمنيل، المكان بعد التطوير أصبح تحفة فنية، خشب الكوبري العتيق، ومنظر النيل، وفيه هناك أكتر من لوكيشن هيصنعوا صور حلوة قوي. واطمن لو نفسك تتصور بكاميرا محترفة هتلاقي هناك مجموعة شباب بيصنعوا صور جميلة بسعر معقول وبيبعتوهالك على تليفونك وأنت تطبعها بمعرفتك.

2 – شجرة الزمالك

شجرة الزمالك، أو شجرة برج القاهرة، عمرها أكثر من 150 سنة، وبتتميز بشكل خرافي تحس معاه إنك في فيلم خيالي. الصور هناك –خصوصًا لو بالنهار- بتكون مميزة.

3 – دجلة المعادي

منطقة جميلة، هادئة جدًا، والأشجار هناك في كل مكان، يعني أكيد هتلاقي أماكن حلوة للتصوير من غير ما أي حد يضايقك. نرشح لك المنطقة اللي فيها طريق القطر، عند شارع 250، هناك هتدخل عند ممر القطار والنباتات على الجانبين، وبالقرب من محطة مترو ثكنات المعادي هتلاقي كذا حديقة بيشبهوا الغابات. يعني بجد هتعمل أجمل صور للذكرى في عيد الحب.

 4 – شارع المعز

مباني شارع المعز التاريخي هي أجمل خلفية لصورك في عيد الحب، كل مبنى في الشارع العظيم ده هتنقلك لزمن مختلف، ننصحك تروح بالنهار مش بالليل، الزحمة بتكون أقل، والصور أكيد.. هتطلع حلوة.

5 – حديقة أم كلثوم

حديقة أم كلثوم بتتميز بموقع جميل جدًا على نيل القاهرة، الحديقة في المنيل، شارع عبد العزيز آل سعود، بعد المسرح العائم. هناك هتلاقي أكتر من لوكيشن هيعلموا صور حلوة قوي.