The Definitive Guide to Living in the Capital , Cairo , Egypt

يمنى أحمد

القاهرة قادرة كل فترة تدهشك، فيه حاجات متدارية في حواريها وطرقها محتاجة حد بيعشق كواليس المدينة دي علشان يقدر يشوفها ويتكلم عنها، النهاردة وبما إننا في رمضان قررنا نتكلم عن أكبر مائدة رحمن موجودة في القاهرة، ومش بس مائدة موجودة في رمضان بس، دي طول السنة كلها، وبالقرب منها مائدة تانية مخصصة للطيور والحيوانات! يلا بينا نعرف إيه الحكاية.

في عام 1992 قرر الدكتور حمدي طه، الأستاذ بكلية الإعلام جامعة الأزهر إنه يعمل مائدة دائمة للطعام في منطقة المقاولون العرب بالقاهرة، وكان شايف إن أهم حاجة هيا إطعام الطعام لأنه له منزلة كبيرة عند ربنا، علشان كده لما توصل المنطقة دي بالتحديد عند أوتو سمير ريان هتلاقي كل الناس عارفاها ومعلمة المنطقة دي أصلًا باسم المائدة!

كل سنة من رمضان بيقرر الدكتور حمدي طه زي ما بيقول إنه يعمل إفطار جماعي للأجانب اللي بيدرسوا في مصر، أول حاجة علشان هما سفراء لمصر في بلادهم وبيتولوا هناك مناصب كتير فلازم تبقى صورتهم إيجابية عن مصر وكرم أهل مصر والأمان اللي موجود في القاهرة، وكانت الحاجة التانية إن فيه منهم كتير ممكن يكون حاسس بغربة، ولكن مع وجودهم مع بعض في مكان واحد هيتعارفوا ويحسوا بألفة بينهم.

المنطقة مش بس فيها مائدة للبشر بس، ولكن كان قرار إنه ينفذ مائدة للطيور والحيوانات مختلفة، بيقول لكايرو 360: “القطط والكلاب بقوا عارفين المكان، والعصافير مش بتمشي من هنا”.

في فترة جائحة كورونا المائدة ماوقفتش شغلها، كانت الوجبات يتوزع على الناس في البيوت، ده غير إن برضه المائدة دي خيرها بيملي كل حتة في القاهرة وبطرق كتير. ممكن طريقة منها لما دكتور حمدي طه بينزل الكلية في جامعة الأزهر ويجيب فطار لطلبة الكلية كاملين وكمان مشروبات، يمكن ده أكتر حاجة الطلبة مش قادرة تنساها لغايه دلوقتي.

ومش بس القاهرة هيا اللي فيها ده، ولكن أكتر من محافظة تانية ، هيا بس تفاصيلها في القاهرة مهمة لأن بيقعد عليها أي عابر سبيل، وفيه ناس أغنيا بيجو لها مخصوص وفيه سياح بيشوفوها وبيحتفظوا بالصور للذكرى.

الخير كتير في البلد دي وهيفضل موجود، هتحس هناك في المائدة دي إنك دخلت منطقة أشبه بالجنة، نفسيتك فيها هترتاح وهتحس إنك فعلًا مش عايز تمشي من المكان، لسه القاهرة قادرة تبهرنا بلياليها وكل تفصيلة فيها ورمضانا معاها بالتأكيد هيكون مختلف مادام لسه فيه ناس باقية وبتفكر في اللي حواليها.