The Definitive Guide to Living in the Capital , Cairo , Egypt

القاهرة بتتميز بوجود مجموعة كبيرة من الحدائق الجميلة، اللي أكيد عشاق الطبيعة هيلاقوا نفسهم فيها، والجميل إن كل حديقة منهم غير التانية، يعني ليها شخصية مختلفة.. في الموضوع ده، وبمناسبة احتفالنا بمرور 11 سنة على إطلاق موقع كايرو 360، هنعرفكم على أجمد 11 حديقة في العاصمة المصرية.

1 – حديقة الأزهر El-Azhar Park

هي واحدة من أكبر حدائق مصر ومن أجمل معالم السياحة في القاهرة، وبالتأكيد فايتك كتير لو ماكنتش زرتها، بتوفر لك الحديقة فرصة للاستمتاع بمشاهدة حوالي 80 فدان من الخضرة اللي بتحيط بيك من كل اتجاه، ونافورة كبيرة بتستقبلك عند الدخول، ده غير القنوات المائية اللي بتضم نوافير صغيرة موّزعة في أرجاء مُختلفة من الحديقة، وشلالات صناعية.

الحديقة باختصار فرصة جميلة للساتمتاع بالخضرة والمطاعم والكافيهات، ده غير جلسات التصوير والحفلات الصباحية والمسائية اللي بتُقام في المناسبات المختلفة.

2 – الحديقة الدولية International Park

موجودة في حي مدينة نصر، وهي من أجمل أماكن الخروج في القاهرة للعائلات، ونقدر نعتبرها وجهة مثالية للأطفال تحديدًا بسبب إنها بتضم حديقة حيوانات مُصغّرة بتضم متحف للحيوانات المُحنّطة، ده غير القطار اللي بياخد الصغار والكبار في جولة قصيرة مُمتعة في أرجاء الحديقة الواسعة، ومش هننسى الاستراحات اللي لها صميم مُميّز. وده كله بجانب تشكيلة كبيرة من النباتات والزهور اللي تم الحصول عليها من كل مكان في العالم.

3 – حديقة الأندلس El-Andalus Park

من أفضل مواقع السياحة في القاهرة للباحثين عن الهدوء والاستجمام، لأنها بتضم مساحات واسعة من الخضرة وأشجار النخيل مع استراحات بتطل على منظر النيل البديع مُباشرة، كمان هتقدر فيها تاخد صور تذكارية مميزة مع مع الأقواس الأندلسية المُميّزة والنافورة المُحاطة بالأسود والتماثيل الفرعونية العملاقة بجانب تمثال الأديب الشهير أحمد شوقي، مع التمتع بالطراز المعماري الأندلسي اللي بيُميّز الحديقة الموجودة في منطقة الزمالك أمام نادي المُعلمين.

4 – حديقة الفسطاط El-Fustat Park

بتمتد حديقة الفسطاط على مساحة 250 فدان، يعني هتستمتع بأكبر مساحة خضراء، وده بيخليها مكان مناسب لمُحبي الاستجمام في أحضان الطبيعة، والفسطاط بتعتبر واحدة من أقدم وأكبر الحدائق في القاهرة. وبالقرب من الحديقة هتلاقوا مركز الحرف التقليدية وسوق الفسطاط، وهناك هتقدروا تستمتعوا برؤية أجمل الحرف اليدوية.

5 – حديقة الحرية Liberty Park

بتعتبر حديقة الحرية واحدة من ضمن الأماكن السياحية المميزة في قلب القاهرة، وغير المساحات الخضراء الجميلةن بتتميز الحديقة كمان بوجود تماثيل لأعظم شخصيات ساهمت في تحقيق الحرية لبلدانها على المستوي السياسي والاقتصادي أو حتى من خلال كتاباتهم وأشعارهم الحماسية والمؤثرة.

6 – الحديقة اليابانية The Japanese Garden

من معالم السياحة الفريدة في القاهرة، واللي هتخليك تحس وكأن أسيا أصبحت بين إيديك وأنت في العاصمة المصرية.. تم بناء الحديقة اليابانية خلال اوائل القرن 20 في حي حلوان بهدف تمثيل حضارات الشرق الآسيوي، وبتستمد ده من تماثيل بوذا اللي بتنتشر على مساحات واسعة من الحديقة، وهناك هتلاقوا 3 تماثيل لقرود الحكمة بتلتف حول بحيرة رائعة بتُزيّن الحديقة.

7 – حديقة الأسرة Family Park

وهي حديقة مناسبة جدًا للأطفال على المستوى الترفيهي، وكمان على المستوى التعليمي والتثقيفي لتنمية عقله وقدراته المعرفية والبدنية، علشان كده بنعتبرها من أجمل أماكن الخروج في القاهرة للعائلات، ومناسبة جدًا لو كان بصحبتك أطفال، والحديقة فيها مكتبة بتُحاكي في بنائها مكتبة الإسكندرية الشهيرة، مع وجود حديقة حيوانات صغيرة بتُشبه في تصميمها حديقة الحيوان بالجيزة.

8 – حديقة الأسماك Aquarium Grotto Garden

بتعرف كمان باسم حديقة الجبلاية نسبة لشارع الجبلاية في الزمالك، تأسست سنة 1867م على يد الخديوي إسماعيل، وبتشتهر الحديقة بتصميمها المبهر واللي بيتضمن تشكيلات مصنوعة من الصلصال تبدو وكأنها خياشيم الأسماك، كمان بتشتهر الحديقة بأنها موطن لمجموعة من الكهوف تحت الأرض، وهناك هتلاقوا أنواع فريدة ومختلفة من الأسماك من نهر النيل ومناطق مائية تانية.

9 – حديقة الأورمان Orman Botanical Garden

بتقع في شارع جامعة القاهرة الشهير، وبتبلغ مساحتها 28 فدان، وتعتبر الأورمان من أكبر الحدائق النباتية في العالم، واللي أنشئت في عهد الخديوي إسماعيل عام 1875 م، وأمر المهندسين المعماريين الفرنسيين ببنائها لأنه كان عاوز يقدم أنواع مختلفة من الفواكه والخضروات للقصر الملكي. وبتعد من أجمل معالم السياحة في القاهرة.

10 – حديقة الأزبكية Azbakeya Garden

بتعد حديقة الأزبكية من أعرق الحدائق النباتية في مصر، لأنها أنشئت عام 1872م بعد ردم البرك المحيطة بيها، وده على إيد المهندس الفرنسي “باريل ديشان بك”، على مساحة 18 فدان، وكان بيقام فيها العديد من الاحتفالات الرسمية والشعبية الكبرى للأجانب والمصريين، بتضم الحديقة معالم مهمة زي: نافورة الخديوي إسماعيل والمسرح القومي اللي أنشئ في موقع تياترو الأزبكية، بالإضافة إلى نادي السلاح المصري اللي بيقع في قلب الحديقة، ومسرح الطليعة ومسرح العرائس، بالإضافة إلى جبلاية صناعية فيها أشجار نادرة جات من الهند. وحاليًا محافظة القاهرة بتقوم بتطوير الحديقة.

11 – حديقة الحيوان بالجيزة Giza Zoo

غنية عن التعريف طبعًا! حديقة حيوان بالجيزة تأسست سنة 1891 م، وهي أكبر حديقة للحيوانات في مصر والشرق الأوسط، وأول وأعرق حدائق الحيوانات في أفريقيا. كانت بتسمى “جوهرة التاج لحدائق الحيوان في أفريقيا”، وبتفتح ابوابها للجمهور من 9 صباحًا إلى 5 مساءً كل يوم ماعدا الثلاثاء من كل أسبوع.