The Definitive Guide to Living in the Capital , Cairo , Egypt

من لحظة ولادة الطفل بيكون عندنا رغبة عارمة إننا نبسطه ونفرحه، وبنستنى اللحظة اللي يقدر فيها يركب لعبة أو يروح ملاهي بفارغ الصبر، علشان نشوف معاه وبعنيه سعادته وفرحته بأول مرة ملاهي في حياته، ناس كتير مابتبقاش عارفة العمر الأنسب للتجربة دي، خصوصًا أن الملاهي بتشترط أعمار معينة وحالات صحية معينة للناس اللي بتركب الألعاب.

في رأينا أنسب عمر لطفل يروح ملاهي هو سنة، والعمر ده مش أي ملاهي تناسبه ودي كانت مهمتنا لفترة مش قصيرة، وهي البحث عن الملاهي الأكثر مناسبة للعمر ده علشان ينبسط بجد، في البداية جالنا إحباط لأن معظم الملاهي مصممة لأعمار كبيرة، أقل حاجة شوفناها كانت من 3 إلى 6 سنين، لكن فجأة اكتشفنا اكتشاف مثير جدًا في سيتي سكيب مول في مدينة 6 أكتوبر.

كيدي ماكس وفرت المعادلة الصعبة، ملاهي ممتعة وأمان عالي، للأطفال من عمر سنة لـ 12 سنة، كل حاجة مبطنة، الأرضية والألعاب وكل حاجة، الطفل يقدر يقع براحته ويتنطط براحته بدون أي أخطار عليه، منطقة الألعاب نضيفة، حتى أولياء الأمور اللي بيدخلوا مع أولادهم بيقلعوا الأحذية برا مساحة اللعب، لأن المكان له معايير نضافة واضحة.

كل المطلوب علشان البيبي يلعب، أنك تشتري له كارت خاص بالملاهي، وتشحنه، الكارت بـ 15 جنيه تقريبًا وتقدر تشحنه بأي مبلغ ولو ماخلصتش المبلغ كله تقدر في الزيارة اللي بعدها تلعب به بدون ما تدفع تاني، الأسعار وسط لا مبالغ فيها ولا بسيطة، المكان مقسم لثلاثة أجزاء، الجزء الأول منطقة ألعاب الأطفال الربع ساعة فيها بـ 25 جنيه، وفيها عدد ألعاب  معقول، زي حمام الكور، والمركب المتحرك، والحصان اللي بيدور، والبيانو اللي بيشتغل لما الطفل يدور عليه برجله، ومجموعة ثانية من الألعاب، أما الجزء الثاني من الملاهي فهو منطقة الفيديو جيم للكبار، ولعبة الطيارات ودول كل لعبة منهم بسعر، من أول 15 لحد 25، أما الجزء الثالث فهو منطقة الفيديو جيم للبيبيهات ودي ممتعة جدًا وبرضه سعر الواحدة منهم 15 جنيه الولاد اتبسطوا منها جدًا، لكن العيب الوحيد في رأينا إنها محتاجة تكون أكبر وفيها تنوع أكثر من اللي شوفناه.

المعاملة هناك سلسلة جدًا، ومافيش أي تعقيد، لكن المشكلة الوحيدة بتكون في المناسبات زي الأعياد وشم النسيم وغيره لأن الأعداد بتكون كبيرة جدًا والأطفال ما بيقدروش يتبسطوا وسط الزحمة، كمان بننصحكم تتابعوا عروض التوفير اللي بتوفرها بعض المواقع والشركات من خلال الحجز عن طريقها واللي بتوفر نص الثمن تقريبًا في أوقات كتير، يعني من ضمن العروض المذكورة أن الساعة جوه منطقة الأطفال بـ 25 جنيه بدل ربع ساعة بس.