The Definitive Guide to Living in the Capital , Cairo , Egypt

احتفالًا بالقاهرة كمدينة عالمية، الجامعة الأمريكية في التحرير بتطلق النسخة التانية من مهرجانها الثقافي السنوي “AUC Tahrir2025 CultureFest” واللي هيتعمل من 10 لـ 12 أبريل 2025 في الحرم التاريخي بوسط البلد.

في 2025، التيمة الأساسية للمهرجان هي “القاهرة كمدينة عالمية”، وده لأن العاصمة بتمثل مزيج ثقافي مفيش زيه، رابط بين إفريقيا والبحر المتوسط والعالم كله، وبتجمع بين التاريخ والناس والفن بروح عصرية وحيوية.

المهرجان هيكون فيه أنشطة وفعاليات مختلفة وممتعة؛ ندوات عن الكتب، عروض فنية، معارض، حلقات نقاش، ركن للأطفال، بازار للهاند ميد، ومعرض أكل بيحتفل بتنوع الثقافات في القاهرة.

كمان هيكون فيه معرض فني مميز من شغل طلاب الجامعة بيعيدوا فيه تخيّل القاهرة بشكل جديد من خلال الفن، وعروض مزيكا من فرقة أكابيلا بتخلط بين الروح المصرية والستايل العالمي، وعروض موسيقية من كل حتة في العالم، وفيها لمسة من تراثنا الإفريقي.

ومن الحاجات المختلفة كمان، تجربة تجديف في النيل! جولة بالزوارق حوالين معالم تاريخية، ومعاها كمان جلسة نقاش عن الوعي البيئي وإزاي نتعامل مع البلاستيك، وهيتم عرض مبادرات طلاب بيحولوا الحاجات المعاد تدويرها لحلول مفيدة.

لو بتحبوا الفن والتاريخ، فيه أنشطة تفاعلية زي تصميم طبعات فنية مستوحاة من التراث المصري، وكمان احتفالية خاصة بإعادة تصميم الحروف الأرمنية، احتفاء بثقافات بتعيش جوانا.

وللي بيدوروا على هدوء الذهن والحركة، فيه جلسات يوجا وتأمل مع مدربين محترفين، هتخليكم تفصلوا عن كل حاجة حواليكم.

وهتعيشوا تجربة رقص مختلفة تمامًا! من بوليوود للهندي الكلاسيكي، للرقص الشعبي العربي والعالمي، وكمان تقدروا تشاركوا في ورشة تفاعلية للرقص الهندي مهما كانت مهاراتكم.

أما العائلات والأطفال، فمستنيهم عرض مسرحي مبهر، وجلسات حكي تفاعلية هتحببوهم أكتر في القاهرة، بالإضافة لندوة لطيفة عن أكلات المطبخ الشرقي، وازاي الأكل بيربطنا ببعض.

ولسه فيه كمان! جلسة حكاوي عن تاريخ الجاليات الأجنبية في مصر، وإزاي أثروا في الفن والتعليم والمعمار، وكمان حلقة عن تطور الشكل المعماري في القاهرة من أيام الاحتلال لحد دلوقتي.

فيه كمان فرصة نادرة تتعرفوا فيها على الثقافة اليابانية: من الخط والأزياء، لعروض فنية بتمزج بين الكلاسيكي والحديث.

والمهرجان هيختم بعرض مؤثر جدًا بعنوان “تحية لغزة”، بيقدمه كورال معهد إدوارد سعيد للموسيقى، تخليدًا لروح الصمود والتراث الفلسطيني.

عاوزين تعرفوا التفاصيل كاملة؟ شوفوا برنامج فعاليات المهرجان من هنا.