قول آلو.. دليلك الكامل للتقديم على خط تليفون أرضي في القاهرة
إزاي أقدم على خط تليفون أرضي خط تليفون أرضي سعر خط تليفون أرضي
Mohamed Talaat
رغم انتشار التليفون المحمول في عالمنا، ورغم التقدم الكبير في وسائل الاتصالات بصفة عامة، إلا أن وجود خط منزلي مازال حاجة ضرورية في حياتنا، وخصوصًا في حياة عشاق الإنترنت، بسبب إنه الطريقة الوحيدة للحصول على خدمة إنترنت بجودة وسرعة عالية، وحاليًا فيه عدد كبير من سكان المدن الجديدة بيبقوا محتاجين يعرفوا إزاي بيتم التقديم على خط تليفون أرضي، وإيه هي الأوراق المطلوبة لإتمام العملية دي، وإيه هي تكلفة الاشتراك الشهري، لو حابين تعرفوا إجابات الاسئلة دي وأكثر، كل اللي عليكم تكملوا قراءة المقال ده.
وفرت الشركة المصرية للاتصالات (وي) أكثر من طريقة للتقديم، وده لتسهيل إجراءات التقديم على خط التليفون الأرضي على عملائها زي أنكم تزوروا أقرب فرع تابع للشركة وقريب من محل سكنك وتطلب التقديم على الخط الأرضي، أو أنكم تتصلوا على رقم خدمة عملاء وي، وهيقوم قسم التركيبات بالتواصل معاكم خلال 72 ساعة من تقديم الطلب، وبعدها بيتم استكمال كل إجراءات التعاقد والتركيب، والتقديم على خط تليفون أرضى متاح كمان أون لاين من خلال الموقع الإلكتروني للشركة المصرية للإتصالات، واتباع التعليمات وخطوات التقديم الموضحة على الموقع.
أما الأوراق المطلوبة علشان تقدروا تقدموا على خط تليفون أرضي فهي “صورة من مستند تحقيق الشخصية عليه عنوان التقديم”، زي الرقم القومي أو جواز السفر، “صورة عقد ملكية أو عقد إيجار العقار المراد تركيب الخط الأرضي فيه”، مع تقديم إ”إيصال مرافق”، زي الغاز أو المياه أو الكهرباء بنفس العنوان، ولو فيه خط أرضي في نفس المكان بتقدموا رقمه لتسهيل معرفة أماكن كابينة الخطوط في المنطقة، وبعد دفع الرسوم المقررة بيتم التعاقد وتسليمكم عقد يثبت حقكم وبيتقدم لقسم التركيبات لتركيب الخط.
أما عن مصاريف الخط الأرضي الأخيرة المعلنة فبلغت حاليًا 44 جنيه مصاريف جدية الطلب عند التقديم، وبيتم دفع 440 جنيه مصاريف تركيب، وده بخلاف لو هتشتركوا في النت ولو هتشتروا راوتر ولو هتضيفوا أي خدمات ثانية محتاجينها.
