The Definitive Guide to Living in the Capital , Cairo , Egypt

مصدر الصور: Abdallah Hassan

القاهرة مدينة عامرة بالنماذج المعمارية الفريدة، وفي منطقة جزير الدهب الشهيرة، فيه تحفة معمارية على الطراز الإسلامي المملوكي، ورغم أنه من العمارة الحديثة إلا أنه جمع فنون العمارة بشكل مميز ومختلف، وخلال السطور الجاية هنقول لكم على كل اللي محتاجين تعرفوه عن قصر البرنس نجيب عبد الله، واللي بالمناسبة بييجي كل فترة يقعد فيه وبيقابل زوار القصر طالما موجود وقت زيارتهم.

قصر البرنس نجيب بيتوسط جزيرة الدهب التابعة لمحافظة الجيزة ومطل على النيل من جهة، والجهات الثلاث الأخرى أراضي زراعية، وبناه البرنس نجيب عبد الله واللي أصوله شركسية مملوكية، وهو الحفيد الوحيد المتبقى، وتم بناء القصر بشكل مشابه لقصور أجداده في منتصف التسعينيات رغم أنه عايش بره مصر، ولكن لحبه في وطنه اشترى الأرض المقامة عليها الأرض وكلف مهندس متميز ببناءه، واستغرق البناء 15 سنة، ونجح في بناء تحفة معمارية مميزة أحيت فن البناء المعماري للعصر المملوكي.

علشان تزوروا قصر البرنس نجيب فده بيكون من خلال مركب نيلي هيوصلكم لمرسى صغير أمام واجهة القصر المواجهة للنيل، وبعدها هتطلعوا سلم صغير لحديقة القصر واللي تم تصميمها من أحجار منحوتة على طراز العصر المملوكي، أو ممكن توصلوا الجزيرة من خلال العبارة النيلية من ناحية الزراعات، وبمجرد ما توصلوا جزيرة الدهب هتمشوا في ممر طويل وسط الزراعات علشان توصلوا للبوابة المقوسة وتدخلوا حديقة القصر.

بمجرد وصولكم القصر هتشوفوا تحفة فنية بتتميز بشكل معماري مميز ومختلف زي اللي بنشوفه في مباني المماليك، والإبداع اللي تم في بناء القصر أصبح جهة لكل اللي بيدرسوا فنون العمارة، وهو مبني على مساحة 10 آلاف متر مربع معظمها حدائق ومناظر جمالية زي التماثيل ونافورات مياه وأعمدة وسلالم مصنوعة من الخشب بطابع خاص.

واجتهد البرنس نجيب في أنه يشتري مقتنيات تاريخية من خلال المزادات الكبيرة في أوروبا، ووضعها في القصر، ورغم أن القصر ملكية خاصة إلا أن البرنس نجيب بيسمح للزوار بالتجول والتصوير وهدفه من بناء القصر زي ما قال في تصريحات إعلامية: “ببناء القصر ده بسعى أعيد للعمارة المملوكية قيمتها واعتبارها”.