The Definitive Guide to Living in the Capital , Cairo , Egypt

“عواصم مصر”، هو أحدث متحف في القاهرة بيتم تنفيذه على أحدث مستوى عالمي.. في الموضوع ده هنعرفكم أكتر على المتحف المهم ده، اللي هنتعرف من خلاله على عواصم مصر المختلفة، وهيكون مقره الرئيسي في العاصمة الإدارية الجديدة.

هيتكون متحف عواصم مصر من قاعة رئيسية هيكون فيها آثار لعدد من عواصم مصر القديمة والحديثة، هيبلغ عددها 9 عواصم، هي (منف، طيبة، تل العمارنة، الإسكندرية، الفسطاط، القاهرة الفاطمية، مصر الحديثة، القاهرة الخديوية).

سيناريو العرض هيتميز بمميزات خاصة، وهيتضمن استخدام التكنولوجيا الحديثة، كمان تم تزويد المتحف بقاعات هيكون فيها شاشات خاصة هتعرض أفلام بانوراما تفاعلية لشكل كل عاصمة من العواصم المصرية القديمة.

ومؤخرًا، استقبل المتحف مجموعة من الآلات الموسيقية من المتحف المصري بالتحرير، زي الهارب والصلاصل والمسقفات، بالإضافة إلى منبر خشبي ودكة من متحف الفن الإسلامي، وأطباق فاطمية من الخزف من متحف جاير آندرسون، وحنية مزينة بصليب وعناقيد من العنب والصدفة من المتحف القبطي.

المتحف هيعرض لنا تمثال للملك رمسيس، وهيكون موجود في مقدمة القاعة الرئيسية.

المتحف هيكون فيه قسم خاص بيمثل العالم الآخر عند المصري القديم، وهيتكون الجزء ده من مقبرة توتو، بالإضافة إلى قاعة مومياوات وتوابيت وفتارين هتحتوي على الأواني الكانوبية ومجموعة من الأبواب الوهمية ورؤوس بديلة بتحاكي الطقوس الدينية في مصر القديمة.

وفي الفترة الأخيرة تم تركيب فتارين العرض وتعديل نظام الإضاءة، لإبراز الأجزاء الجمالية للقطع الأثرية المعروضة في المتحف.