Cairo 360
كتب: محمد طلعت
شيء ملحوظ ومؤسف جدًا، لما تقعد على قهوة مثلًا وتلاقي ناس قاعدة على ترابيزات لوحدها، لوحدها تمامًا مش مستنية حد، من أعمار مختلفة، علشان الناس دول قرر محمد عبد المنعم يطلق تطبيق “Meet & treat”، اللي صممه هو و4 من أصدقاءه لمحاربة الوحدة اللي بقت تقتل.
كايرو 360 عملت حوار معاه عن التطبيق اللي انطلق يوم 8 فبراير رسميًا على جوجل بلاي، علشان نتعرف أكتر على الفكرة والهدف الحقيقي منها.
إيه هو تطبيق Meet & treat؟
تطبيق “Meet & Treat” فكرة بتساعدك تلاقي ناس مختلفة، بس عندهم نفس اهتماماتك، تقدر من خلاله تتواصل معاهم وتنسق معاهم إنكم تقابلوا بعض علي أرض الواقع وتمارسوا اهتمامتكم وهوياتكم سوا.
الاسم بالعربي يعني: “قابل واتعامل”.. يعني انزل قابل ناس ومجموعات جديدة من الناس واتعرف عليهم وتعاملوا مع بعض على أرض الواقع.
الفكرة جات لكم إزاي؟
معايا أربع شباب “منة الله عيسى، محمود حمدي، محمد عصام، خالد محمد” وكلنا زملاء في حاسبات عين شمس، والفكرة جت لنا بسبب موقف بيحصل معانا ومع كل الناس اللي نعرفها تقريبًا، وهي إنه لما الواحد بيحب يجرب حاجة جديدة، أو يمارس هواية معينة، و يعرض الاقتراح على أصحابه المقربين غالبًا بيحبطوه ويخلوه يكسل، وفي الآخر ينزل يقعد علي القهوة أو كافيه وخلاص، أو في أحسن الحالات بيروح يجرب الحاجه ديه لوحده، وجاء في بالنا سؤال “ليه ميبقاش فيه تطبيق بيوصل الناس اللي عندها أفكار متاشبهة ببعض؟!”، لأن أكيد مش أنت الوحيد في مصر اللي نفسك تجرب مطعم جديد، وعايز تنزل تصور في شارع المعز، أو نفسك تلاقي حد يلعب معاك اسكواش أو تنس، أو حتى حد ينزل يجري معاك، اللي عاوز يعمل ده كتير، بس كل الحكاية إنكم مش لاقيين بعض ومش عارفين توصلوا لبعض، وهو ده دور التطبيق.
إيه اللي بيميز التطبيق ده عن باقي تطبيقات التعارف؟
التطبيق فيه أكتر من 100 مجال تقدر تختار ما بينهم، ما بين هوايات ورياضة وألعاب وغيره، يعني بطريقة سهلة بتقدر تتعرف على شخص من نفس اهتماماتك.
التطبيق بيستهدف مين ؟
المستهدف من التطبيق فئة الشباب من سن 18 حتى 30 سنة، اللي عندهم رغبة ونشاط كافي إنهم ينزلوا ويخرجوا يجربوا حاجات جديدة ويتعاملوا ويتعرفوا على ناس جديدة.
كام واحد استخدم التطبيق حتى الآن؟
من يوم الخميس 8 فبراير حتى الآن تعدينا 3 آلاف واحد نزلوا التطبيق.
إيه رسالتكم للدولة أو رجال الأعمال؟
ياريت يكون فيه اهتمام أكتر من كده شوية من الدولة ورجال الأعمال بالاستثمار في مجال التكنولوجيا ودعم المشاريع والتطبيقات التكنولوجية، لأن فعلًا القطاع ده مهم جدًا، وممكن يدخل لمصر عائد ضخم جدًا وبالدولار كمان لو فيه اهتمام ودعم أكبر من كده للقطاع ده.
حلمكم هيقف عند التطبيق ده ولا عندكم خطط ومشروعات ثانية؟!
إحنا حلمنا إن التطبيق ده يساهم في حل مشكلة الوحدة والعزلة في مصر والوطن العربي كله، ويوصل مستخدمي التطبيق لمليون مستخدم خلال 3 سنين ان شاء الله، ويساهم في إحداث تغيير حقيقي في المجتمع ويقرب الناس من بعضها ويساعد في تقبل الآخر.
مقترح
معالم وسياحة
زاوية أيدكين: حكاية أول خانقاه مملوكية في قلب القاهرة
اثار مملوكية في مصر خانقاه في القاهرة +2
معالم وسياحة
أشهر المساجد التاريخية في القاهرة.. معالم مذهلة بتحكي تاريخ عريق
أشهر مساجد القاهرة أقدم مساجد مصر +5
مطاعم
