The Definitive Guide to Living in the Capital , Cairo , Egypt

النهارده 23 سبتمبر هتحتفل الأمم المتحدة باليوم العالمي للغات الإشارة، وهو يوم بيتم الاحتفال بيه في إطار فعاليات الأسبوع الدولي للصم، واللي كان أول احتفال بيه في سبتمبر سنة 1958 وتطور بعد كده لحد ما بقى حركة عالمية هدفها الوحدة بين فئة الصم، والتوعية بقضاياهم والتحديات اليومية اللي بيواجهوها، ولحد النهارده بيتم الاحتفال بيه في الفترة من 24 لـ 30 سبتمبر من كل سنة.

تعالوا بينا نعرف أكتر عن اليوم ده، وعلى لغات الإشارة بشكل عام:

1- بنقول لغات الإشارة لإن في أكثر من 300 لغة إشارة حوالين العالم، وهي لغات طبيعية وكاملة بالرغم من اختلافها هيكليًا عن اللغات اللي بنتكلم بيها، وبيستخدمها 72 مليون أصم بحسب إحصاءات الاتحاد العالمي للصم، عايش 80% منهم في البلاد النامية.

2- في لغة إشارة دولية بيستخدمها الصم في اللقاءات الدولية وفي سفاريتهم وممارستهم لنشاطاتهم الاجتماعية، وبتعتبر اللغة دي شكل مبسط من لغة الإشارة الطبيعية.

3- الاحتفال لأول مرة باليوم العالمي للغات الإشارة كان في 23 سبتمبر 2018، وكان تحت شعار “مع لغة الإشارة، الاهتمام يطال الجميع” وكان السبب في الاحتفال باليوم ده هو اقتراح مقدم من “الاتحاد العالمي للصم” وهو اتحاد بيضم 135 جمعية وطنية للصم، وبيمثل في مجموعه 70 مليون أصم في العالم، وتم تقديم الاقتراح ده للأمم المتحدة، وتمت الموافقة عليه من 97 دولة عضو في 19 ديسمبر2017.

4- اختيار تاريخ 23 سبتمبر كان بسبب إنه تاريخ إنشاء الاتحاد العالمي للصم سنة 1951، وبيمثل اليوم ده ميلاد منظمة من أهم أهدافها هو المحافظة على لغات الإشارة وثقافة الصم.

5- اتفاقية حقوق الأشخاص ذوي الإعاقة بتدعم استخدام لغات الإشارة في التعامل مع الصم، ده غير إنها بتساوي بين لغات الإشارة المختلفة واللغات اللي بنتكلم بيها، وبتلزم الدول الأطراف فيها بتسهيل تعليم لغة الإشارة، وتعزيز ودعم الهوية اللغوية للصم.