The Definitive Guide to Living in the Capital , Cairo , Egypt

من فترة مش بعيدة، بدء مجموعة شباب مبادرة بسيطة لتنظيف شواطئ النيل، وشارك فيها عدد كبير من الشباب والبنات والشخصيات العامة، وانتشر الخبر، وزيه زي أي خبر، مع الوقت بدأ الموضوع يهدى ويتنسي، ورجعت ريما لعادتها القديمة، ورجعنا تاني لأسلوب حياتنا اللي بيسبب تلوث ضخم لمياه النيل من غير ما ناخد بالنا.

لكن وبإلهام من الأبطال دول، أصحاب فكرة تنظيف شواطئ النيل، وتحت رعاية وزارة البيئة، قررت مجموعة شباب من محترفي وهواة هواية الغوص في I-DiVE TRiBE إنهم يقوموا بحملة للتنظيف تحت الماء في النيل، وهتكون بدايتها في يوم وفاء النيل، بتاريخ 15 أغسطس.

اتواصلنا في كايرو 360 مع “عبد الرحمن المكاوي” المدرس في كلية طب الأسنان، ومدرب مدربين الغطس الترفيهي والتقني، ومؤسس I-DiVE TRiBE diving community، علشان نعرف أكتر عن المبادرة دي.

أول حاجة  مهمة، وكان لازم نعرفها هي إن الغطس في الأنهار بشكل عام، بيحتاج مهارات وخبرات مختلفة تمامًا عن البحر، وعلشان كده كان من أهم شروط المشاركة في الحدث ده إنه المشترك يكون معاه رخصة غطاس إنقاذ على الأقل.

وبما إن المجموعته المتميزة من الغواصين الشباب دول بيغتصوا من سنين علشان ينظفوا مياه البحر الأحمر، جه الوقت إنهم ينظفوا المياه اللي بنشرب منها، ولأنه يهمنا كلنا إننا نستخدم ونشرب ماء نظيف، ونساعد غيرنا إنه يشرب ويستخدم مياه نظيفة، ودي كانت النقطة الأولى والأهم.

النقطة التانية كانت أهمية نهر النيل، باعتباره شريان الحياة لقارة أفريقيا كلها مش بس لمصر، ده غير إنه يعتبر خط ومرشد أساسي وعالمي لهجرة كثير جدًا من الطيور المهاجرة، فبالتالي مش إحنا بس اللي بنستفيد منه.

سألنا عن المبادرة بشكل أعمق، وعن أسباب استخدام “الغوص” في تنظيف مياه النيل، بالرغم من خطورته، فعرفنا من الفريق إن الطريقة التقليدية في تنظيف قاع النيل عن طريق الكراكات والمعدات الثقيلة، بتتسبب في نقص الأكسجين في مياه النيل، وبالتالي بتتسبب في موت الحياة النيلية، وبيخلق مناطق اسمها (Dead Zone) مستحيل يعيش فيها الكائنات الحية، لإنها بتبقى خالية من الأكسجين، فبالتالي أأمن طريقة للحفاظ على الحياة النيلية والكائنات الحية اللي بتعيش في النيل، هوه التقاط المخلفات الصلبة بشكل يدوي.

المبادرة دي تحت رعاية ومشاركة وزارة البيئة، وهتنطلق مع شروق شمس يوم 15 أغسطس من منطقة “محميات جزر النيل”، وشارك لحد النهارده عن طريق استمارات التقديم المتاحة على إيفينت الفيس بوك أكتر من 250 شاب، 100 منهم محترفين غوص، وهيتم تقسيمهم لعشرات يوم الحدث.

المبادرة قائمة على المجهودات الذاتية، وخدت تحضيرات أكتر من 5 شهور، وهدفها إنها تبقى “أسبوعية” وكل مصري يشارك فيها، لحد ما نقدر نقضي تمامًا على تلوث النيل، ونخلق وعي كبير عند الناس، بأهمية نظافة مياه النيل، واللي هينعكس بالإيجاب على صحتنا وعلى صحة الأجيال الجاية.

لو حابب تشارك في المبادرة.. ممكن تدخل على الإيفينت من هنا.