The Definitive Guide to Living in the Capital , Cairo , Egypt

سموها رياضة، أو سموها لعبة، أو سموها هواية براحتكم، لكن هيفضل “الباركور” واحد من أخطر الرياضات أو الهوايات اللي بتمارس على مستوى العالم، وده لإنها بتتطلب لياقة بدنية وسرعة بديهة عالية جدًا، ده غير التدريب المستمر على القفز من المرتفعات والجري بسرعات مختلفة، وعلى الرغم من ده كله بدأ الباركور ياخد شهرة واسعة وينتشر في جميع أنحاء العالم، وعندنا في مصر كمان.

 الحدث اللي هنتكلم عنه بقى النهارده هو زيارة “دومينيك دي توماسو” الشهير بـ “دومتوماتو” بطل رياضة الباركور العالمي لمصر، في جولة رياضية لـ”الباركور” في شوارع القاهرة ومعالمها، وكانت جولته عبارة عن الجري مع مجموعة من الحركات المميزة والصعبة لرياضة “الباركور” في 6 مواقع أثرية في القاهرة.

الجولة ضمت الأهرامات، وخان الخليلي، وأبو الهول، والنيل، وقلعة صلاح الدين، والختام في نزلة السمان، والغريب إن كان في استقبال واحتفال هايل من أهالي المناطق دي، على الرغم من إن الباركور لسه ماخدش الانتشار الكافي في مصر، لكن كان أحد أهداف جولة “دومينيك” هو نشر الباركور في مصر.

تجربة دومينيك في مصر كانت من أكثر التجارب الرائعة ليه زي ما قال في أكتر من حوار ليه، وكان تصويرها سهل ومحترف بشكل مختلف عن توقعات دومينيك، خاصةً إنه كان حابب جدًا يوثق تجربته دي بشكل يليق بالسحر الخاص للأماكن اللي زارها.

أما عن ممارسة الباركور في مصر، فكانت أمنية دومينيك إن يستمر كل المهتمين بالرياضة دي من المصريين في ممارستها وبشكل علني قدام الناس، علشان يخلقوا وعي ودعم أكبر من الجمهور لممارستها ويساهموا في انتشارها، ده غير إن ده هيشجع لاعبين الباركور العالمين على زيارة مصر.

لو حابين تعرفوا أكتر عن “دومينيك دي توماسو” وتشوفوا فيديوهات أكتر ليه.. ممكن تدخلوا على صفحته على الفيسبوك من هنا.

أو حسابه الرسمي على الإنستجرام من هنا.