The Definitive Guide to Living in the Capital , Cairo , Egypt

القاهرة فيها شوارع كتير بأسماء دول ومدن من عالمنا العربي، وكأن مصر بتقول من خلال الأمر ده، إنها بترحب دائمًا بكل الأشقاء العرب. في السطور الجاية هنعرفكم على 3 شوارع مهمة في القاهرة، بيحملوا أسماء 3 من أجمل الدول العربية: فلسطين، لبنان، وسوريا.

فلسطين

كتير من محافظات مصر فيها شوارع بتحمل اسم فلسطين، لكن أشهرهم شارع فلسطين الموجود في القاهرة، وهو شارع حيوي مميز في حي المعادي، ويعتبر بوابة لكل الأماكن المهمة داخل منطقة المعادي الجميلة، وهو شارع تجاري فيه الكورت يارد الوحيد داخل الحي الراقي، وتجاري لأن فيه محلات كتير للتسوق، وكمان إداري لأن شركات كتير موجودة هناك خاصة شركات البترول، وهو بيربط بين شارع 306 الصناعي وطريق النصر، وطريق الأوتوستراد واللاسلكي وشارع الجزائر.

ميدان لبنان

من أهم وأكبر المناطق (من حيث المساحة) اللي متسمية على اسم دولة عربية، وكمان هو محور تجاري سكني مهم وكبير جدًا، وفيه أشهر وأكبر البراندات العالمية والسكن فيه راقي جدًا، وبيربط بين مناطق زايد وأكتوبر، المهندسين، جامعة الدول، الدقي، وكمان شارع السودان، وحاليًا بيربط بأرض اللواء والدائري والهرم بعد بناء محور كمال عامر الجديد وهو ملتقى لكل العرب اللي بيحبوا التسوق والسهر فيه.

سوريا

شارع سوريا بيرجع لسنة 1950، وهو بيربط بين شارع جامعة الدول العربية وشارع السودان، وفي النص بيتقاطع مع شارع شهاب، وهو شارع تجاري ويعتبر من الأماكن المميزة للسكن والتسوق لأنه من الشوارع الراقية في منطقة المهندسين، وفي بداية تأسيسه كان عبارة عن مجموعة فيلات تحولت بمرور الزمن لأبراج سكنية – تجارية – إدارية.