The Definitive Guide to Living in the Capital , Cairo , Egypt

العيد عندنا في مصر دايمًا مرتبط بالمتعة والخروج والسفر والمغامرة، وفيه فئة كتيرة من المصريين اتعودوا يتجهوا لحديقة حيوان الجيزة للاستمتاع بالعيد وسط الحيوانات والطيور، ولكن بعد إغلاقها للتطوير أصبح الأمر محزن للبعض وخاصة أن زيارة حديقة الحيوان كانت من المقدسات خلال الأعياد والإجازات. لكن مؤخرًا القاهرة فيها أكثر من بديل لعشاق الحيوانات والطيور، ومنها أماكن مميزة وفيها حيوانات وطيور هتفرح كل الأعمار وكمان تقدروا تتصورا معاها، وعلشان كده هنقول لكم على 5 حدائق حيوان في القاهرة، هتقدروا تزوروهم في عيد الأضحى 2024.

فاميلي بارك

عندهم مجموعة مميزة من الحيوانات والطيور اللي هتستمتعوا باللعب والتصوير معاها وكمان هتأكلوها بإيدكم، وهي من أشهر الحدائق الموجودة حاليًا في القاهرة، وسعر تذكرة الدخول بتبدأ من 70 جنيه، وكمان عاملين باكيدج مختلفة علشان تناسب كل أفراد العيلة، وهي موجودة في مدخل الرحاب 2 – القاهرة الجديدة.

تقدروا تعرفوا أكثر عنهم من خلال صفحة الفيسبوك من هنا.

أفريقا سفاري بارك

حديقة حيوان مفتوحة ومن أجمل الأماكن اللي ممكن تزوروها وتشوفوا حيوانات وطيور مختلفة، وفيه عندهم حيوانات مفترسة وأليفة، وتقدروا تتصوروا مع الحيوانات والطيور وتلعبوا معاهم وتأكلوهم وهتنبسطوا من الرحلة دي بشكل كبير، والأسعار عندهم للسيارة مهما كان العدد 1200 جنيه، والميكروباص 2400 جنيه، وهما موجودين في طريق الإسكندرية الصحراوي.

تقدروا تعرفوا أكثر عنهم من خلال موقعهم الإلكتروني من هنا.

طيبة روز بلازا

هنا الحكاية مش مجرد مجموعة حيوانات أليفة وطيور ولكن هو موود مختلف وتقدروا من خلاله تمارسوا أنشطة كتير وتقضوا داي يوز جوا الفندق، وعندهم ميني حديقة حيوانات أليفة وطيور هتأكلوهم وتتصوروا معاها بكل حب، وسعر التذكرة للدخول 60 جنيه، وباسكت الأكل للحيوانات والطيور سعره 15 جنيه، وهتلاقوا عندهم “نعام – نسناس – بط – طاووس – دجاج فرعوني – آيل أوروبي – ماعز – كبش – حمام – بجع”، ده غير العصافير والبغبغانات، وهما موجودين في التجمع الخامس بالقرب من مسجد المشير.

وتقدروا تعرفوا أكثر عنهم من خلال صفحة الفيسبوك من هنا.

نايل زوو

أحدث حديقة حيوان فتحت في القاهرة، وأهم ما يميزها إنها موجودة في النيل، وعلشان تروحوا لها لازم تركبوا مركب تابع لها. وسعر التذكرة شاملة المركب 150 جنيه، وكمان هما بيفتحوا من 4 العصر لحد 12 بالليل، وهتقدروا تأكلوا الحيوانات والطيور وتلعبوا معاهم وتصوروهم، وهما موجودين على كورنيش المعادي – أمام مستشفى النيل البدراوي.

تقدروا تعرفوا أكثر عنهم من خلال صفحة الفيسبوك من هنا.

العزوة

هو كافيه ومطعم مش حديقة حيوان متكاملة ولكن هناك هتلاقوا مجموعة من الطيور والحيوانات الأليفة اللي هتقدروا تتصورا وتلعبوا معاها وتأكلوها، وكمان عندهم أبراج حمام هتخليكم تحسوا بحنين لزمان، والمكان أسعاره عادية ومافيش رسوم دخول للحديقة فقط هتدفعوا طلباتكم من الأكل والشرب، وهما موجودين في منطقة 5 امستردام – داخل الريف الأوروبي – الكيلو 58 طريق الإسكندرية الصحراوي.

تقدروا تعرفوا أكثر عنهم من خلال صفحة الفيسبوك من هنا.