The Definitive Guide to Living in the Capital , Cairo , Egypt

الخوف من الثانوية العامة خلى المصريين يسموها “شبح”، لأنه ترسخ جوانا أنها المستقبل الحقيقي وأي حاجة غيرها تبقى فشل! لكن الوضع ده اتغير، مصر فيها حاليًا بدائل مهمة وعملية للثانوية العامة، ممكن ترحم الناس بدرجة كبيرة من ضغط الاثنوية العامة ومصاريف دروسها المبالغ فيها. لو بتفكر بره الصندوق اتكلم مع ابنك واعرض عليه نماذج مختلفة وخليه هو اللي يختار مستقبله، ممكن يكون بيحب الحرف أو الرسم أو التكنولوجيا أو غيرها من المجالات.

حاليًا فيه 16 مدرسة يقدر طلبة الإعدادية يدخلوها غير الثانوية العامة، في السطور الجاية هنقول لكم على التخصصات المتاحة.

توشيبا للتكنولوجيا

تخصصات مدرسة توشيبا العربي للتكنولوجيا هي التصنيع الميكانيكي والتبريد والتكييف والتركيبات الكهربائية، وهي بتقبل خريجي الإعدادي الأزهري والعام، وبيعملوا اختبارات ومقابلة شخصية، ومهم الطالب يكون شاطر في الإنجليزي والعربي والرياضيات.

We

مدرسة we متخصصة في الإتصالات والتكنولوجيا، والحد الأدني للقبول فيها 250 درجة، وأن الطالب يكون سنه لا يزيد عن 18 سنة في أول أكتوبر، وكمان هي مخصصة للطلاب المصريين فقط ولازم الطالب يجتاز الإختبار الطبي والمقابلة الشخصية.

الضبعة

أما مدرسة الضبعة النووية عندها شرط أن الطالب يحصل على 90% في مواد الرياضة والإنجليزي، وهما عندهم قسم للميكانيكا، وقسم كهرباء، وقسم الكترونيات، ولازم اللي يتقدم يخضع لاختبارات علمية وطبية ومقابلة شخصية في مفاعل الضبعة النووي.

التكنولوجيا التطبيقية

المدارس تابعة لوزارة التعليم مباشرة، وبتقدم ميزة التدريب في المصانع التابعة ليها، وهي متخصصة في مجال التكنولوجيا بعمق، وموجود منها 21 مدرسة في مصر، وكمان بتقدم مكافآت للطلبة بشكل شهري وبتوفر فرص عمل بمرتبات مناسبة.

مياه الشرب والصرف الصحي

مجال المياه له مدرسة متخصصة تحت مسمى “مياه الشرب والصرف الصحي”، وموجودين في 5 محافظات، وفيها بيتم تأهيل الشباب للنهوص بالقطاع المائي في مصر، وبعد المدرسة بيتم تعيين الطلبة في الشركة.

غبور

مدرسة غبور بتدي الطلاب اللي بيتقبلوا فيها وينجحوا 3 شهادات منهم واحدة من الغرفة الألمانية العربية للصناعة، ومدة الدراسة فيها 3 سنين وعندهم تخصصات”إصلاح السيارات – الدهات – النقل الثقيل”، والمدرسة بتقبل طلبة من كل أنحاء الجمهوريية.

الصالحية

من أشهر المدارس اللي متاحة بعد الإعدادية، وهي متخصصة في المجال الزراعي والري والإنتاج الحيواني، ومخصصة للبنين فقط، وبتقبل من 210 درجة لطالب الإعدادية، وبيتم تدريب الطالب على أعلى مستوى متطور في مجال الزراعة والإنتاج الحيواني بشتى تخصصاته.

السويدي

مدرسة السويدي من المدارس المميزة وفيها بيدرس الطالب في أقسام مختلفة حسب اختياره زي “الحديد والصلب – البلاستيك – الخدمات الوجيستية – مكونات الطاقة – ميكانيكا – صيانة المحولات والإلكترونيات – صيانة المعدات الثقيلة”.

الهيئة العربية للتصنيع

تابعة للقوات المسلحة، وبتقبل المقيمين في القاهرة فقط، وبتقبل من مجموع 240 درجة طبقًا لتنسيق العام الماضي، وعندهم أقسام مختلفة يقدر الطالب يختار منها.

المجمع التكنولوجي

بتتميز مدرسة المجمع التكنولوجي المتكامل، بتعليم الطلبة التكنولوجيا ولكن مدة الدراسة فيها 7 سنين، وعندهم تدريب عملي مميز، والطالب لما بيتخرج بياخد درجة البكالوريوس، ومن شروطها الأساسية للقبول اجتياز اختبار القدرات للإنجليزي والرياضة.

البترول

مدرسة البترول ليها 7 فروع في مصر، وهي متخصصة في دراسة كل ما يخص البترول لاخراج فنيين متمكنين وكفء.

الذهب والحلي

مدرسة الذهب والحلي موجودة في العبور وبتستقبل طلاب القاهرة الكبرى، وهي أول مدرسة متخصصة في المجال ده، ومش بتقبل غير المصريين، وبتشترط إن الطالب يكون لائق طبيًًا.

الطباعة الصناعية

بتقبل مدرسة الطباعة الصناعية طلاب الإعدادي بمجموع 180 درجة، وهي موجودة في شبرا مصر.

التمريض

مدرسة التمريض تابعة لوزارة الصحة، وبيتعين المتخرج منها في المستشفيات التابعة للوزارة، وبيدرس الطلاب كل ما يخص التمريض طوال فترة الدراسة.

المدرسة العسكرية

وهي مدرسة رياضية متميزة وبتأهل الطلبة في الالتحاق بمجالات العمل المختلفة، وكمان استكمال الدراسة بالكليات التابعة للقوات المسلحة، وبيتم تجهيز الطالب من خلال تدريبات في جميع الألعاب الرياضية وتنمية المهارات والمواهب.

الإنتاج الحربي

من ضمن مدارس القوات المسلحة، ولكن بيتم تعليم الطالب في أكتر من مجال “تركيبات ميكانيكية – تشغيل ماكينات – سباكة – لحام – تبريد وتكييف – ميكانيكا سيارات – صناعة آثاث – تركيبات كهربائية – تشكيل معادن”.