عيد الأضحى 2024.. دليلك لأجمل الخروجات غير المكلفة في القاهرة
أماكن خروجات عيد الأضحى اجازة عيد الأضحى افلام عيد الأضحى عيد الأضحى 2024
Mohamed Talaat
الصورة الرئيسية: Jack Krier
الخروجات في العيد لها طعم مختلف تمامًا، خلينا نقول إنها بتكون أكثر بهجة وفرحة وسعادة، وبالتأكيد مع دخول عيد الأضحى المبارك 2024 بنكون محتاجين خروجة تعدل المزاج والحالة النفسية، وعلشان كده هنعرفكم على 5 خروجات مميزة تقدروا تفكوا بيها عن نفسكم خلال عيد الأضحى 2024 وكل خروجة فيهم مختلفة عن الثانية، يعني كل الخروجات مالهاش علاقة ببعض، لكن هدفها المشترك هو أنكم تكونوا أحسن نفسيًا.
القاهرة من فوق
تقدروا تشوفوا القاهرة من فوق وتستمعوا بجمالها المميز من خلال زيارة برج القاهرة في الزمالك أو زيارة جبل المقطم وكافيهاته، واللي هتشوفوا تفاصيل ومعالم ومباني القاهرة منهم بشكل مختلف ومميز.
النيل
مافيش أجمل من النيل وحكاويه وحكاياته، وتقدروا تاخدوا فلوكة في النيل في أماكن كتير وخاصة وسط البلد، وكمان ممكن تطلعوا رحلة على مركب لمدة ساعتين مع الغداء أو العشاء، والمراكب النيلية منتشرة في أنحاء القاهرة الكبرى، وممكن تاخدوا مراكب رحلات القناطر الخيرية، ده غير أنكم تقدروا تلعبوا في النيل ببدال أو كياك أو حتى تاخدوا مركب شراعية، ده غير تاكسي النيل اللي هيوصلكم لـ5 مناطق مختلفة في القاهرة بسرعة من خلال نهر النيل.
الحدائق
مافيش أجمل من الحدائق علشان تخرجوا وتلعبوا وتنبسطوا وتحسنوا نفسيتكم وسط الخضرة والماء، ومن أجمل الحدائق اللي ممكن تزوروها “الأزهر – الميرلاند – الأسماك – الحرية – الأندلس – الفنون – أم كلثوم – جزيرة المعادي”، وغيرها من الحدائق اللي هتخلي يومكم كله نشاط وحيوية وضحك.
السينما
بما أننا جبنا سيرة خروجات العيد يبقى السينما تناديكم، وتقدروا تختاروا أي فيلم تحبوه علشان تتفرجوا عليه من مجموعة كبيرة من أفلام العيد والأفلام الأجنبية، وبننصحكم تروحوا سينمات بره وسط البلد علشان الزحمة بتاعتها ويفضل طبعًا تكونوا حاجزين قبلها وعارفين هتروحوا سينما إيه وهتتفرجوا على فيلم إيه، وماتنسوش الفيشار!
التمشية في شوارع ومناطق القاهرة
لو مامشيتوش في شوارع القاهرة ودققتوا في تفاصيلها يبقى فايتكم تجربة جميلة! التمشية بالليل في وسط البلد والمعز والزمالك والمعادي وجاردن سيتي والكورنيش ومصر الجديدة وغيرها من الأماكن التاريخية في القاهرة تجربة حلوة هتخليكم ترتاحوا نفسيًا وتنبسطوا وتقضوا عيد مختلف وتبقوا في مود إيجابي.
وبنفكركم أن خلال فترة العيد تحافظوا على صحتكم وبلاش تاكلوا لحوم كتير وتقللوا من الدهون وتعرفوا أن الوجبة الدسمة في يوم واحد محتاجة شهور علشان آثارها تروح. كل سنة وأنتم بخير.
مقترح
فن وثقافة
طبلة الست.. فرقة غنائية بتنشر الفرح وتحيي التراث
حفلات طبلة الست حفلات غنائية في القاهرة +5
الحياة في كايرو
