The Definitive Guide to Living in the Capital , Cairo , Egypt

زي ما اتعودنا في بداية كل شهر نلاقي عنوان جديد ملفت وعبقري بتجتمع تحته عروض سينما دكة أضف بالمقطم لهذا الشهر، العنوان اللي بيحمل قاسم مشترك لجميع الأفلام اللي بتتعرض تحته، تعبيرًا عن موضوع ما أو جولة جغرافية ما أو حتى طريقة إخراج أو إنتاج ما.. وبعد جولة في المستقبل في شهر يناير اللي لسه مودعينه، هتنتظم عروض هذا الشهر –فبراير- تحت عنوان: “على الأصل دوَّر”!

العنوان اللي هتتبعه العروض الشهر ده بيعبر عن الفكرة اللي وقع عليها الاتفاق من رواد سينما دكة علشان تكون معيار الاختيار لمجموعة أفلام الشهر، الفكرة اللي هتنتقي مجموعة من الأفلام الأجنبية اللي اقتبستها بعد كده السينما الأمريكية وعملت نسخها الخاصة منها بهدف ضم أفلام أخرى ناجحة لقايمة إنتاجها.. لكن مقارنة بسيطة بين الأصل والنسخة المقتبسة هتقول لنا أنه مهما بلغت ضخامة الإنتاج وجودة الأدوات وتقدمها في الصناعة السينيمائية الأمريكية إلا أن الأصل هيفضل ليه رونقه الخاص وقيمته الفنية المتفردة اللي بتقدمه على شبيهه في كل الأحوال.

العرض الأول هيكون بطله –بالأبيض والأسود- الفيلم الياباني “Rashomon” اللي بيرجع كتير من النقاد ليه الفضل في لفت الانتباه لصناعة السينما في اليابان، الفيلم اللي كان أخد جائزة الأوسكار من الأكاديمية السينمائية الأمريكية كأفضل فيلم أجنبي في السنة التالية لسنة إنتاجه (1951م)، وبتدور أحداثه حول فكرة “نسبية الحقيقة”، حيث أنه القصة عبارة عن حادث قتل بترويه أطراف متعددة روايات مختلفة مما يخلق مساحة كبيرة من الحيرة وعدم الوثوق، الخطوط المتعددة للفيلم القصير نسبيًا –ساعة ونصف- واللي فضل كل خط منها محتفظ بتماسكه الشديد، تقول أنه الإخراج أكثر من مجرد عبقري لنص سينمائي أكثر من مجرد مميز.

الفيلم تم اقتباسه في عديد الأفلام الأمريكية بشكل مباشر زي “The Outrage” و “Iron Maze”.. أو غير مباشر زي “Hero” و “Courage under fire”.

ثاني العروض هيكون لفيلم “Wings Of Desire”، الفيلم اللي يعد أحد أهم وأشهر كلاسيكيات السينما الألمانية، تم إنتاجه في أواخر الثمانينيات، وبيصنف كفيلم فانتازيا أو رومانسي، بيحكي قصة رغبة ملاك بالتحول إلى بشري بعد وقوعه في حب امرأة بشرية، وتفاصيل هذه الرغبة ومناقشة مفهوم الـ “بشرية” وما يعنيه أن تكون “بشرًا”، الفيلم تم اقتباسه لاحقًا في السينما الأمريكية في فيلم “City of Angles” من بطولة نيكولاس كيدج وميج ريان.

أما عن العرض الثالث فهيكون للفيلم الإسباني “Open Your Eyes”، اللي حقق نجاح كبير وقت عرضه أدى إلى السعي لاقتباسه سريعًا في السينما الأمريكية وبالفعل تم الاقتباس بعد 4 سنوات فقط من عرضه، في فيلم “Vanilla Sky” اللي شاركت فيه بطلة الفيلم الأصلي “بينلوبي كروز” مع النجم الأمريكي الأول وقتها “توم كروز”، تكمن قوة الفيلم أيضًا في الخطوط المتشابكة في الأحداث والمستقلة في السير طول الفيلم، الوهم والحقيقة والأحلام للفتى الثري الذي يستفيق على وجوده في مصحة نفسية دون أن يدري أو يتذكر أي شيء باستثناء بعض الومضات في الذاكرة للفتاة اللي بيحبها.

آخر العروض هيكون لفيلم “Infernal Affairs” اللي تم إنتاجه في “هونج كونج” عام 2002، وتم اقتباسه عام 2006 في الفيلم الأمريكي الشهير “The Departed” اللي شارك في بطولته ليوناردو دي كابريو، الفيلم بيحكي قصة رجل عصابات مزروع في جهاز الشرطة، ورجل شرطة مزروع في وسط العصابات، وأحداث متلاحقة تميز فيها الفيلم الآسيوي بلمس جوانب إنسانية غابت عن العمل الأمريكي وإن كانت قوة ونجاح الفيلم الأمريكي أكبر نسبيًا إلا أن هذا النجاح أعطى قيمة إضافية للعمل الأصلي.

عروض الأفلام هتكون الثلاثاء من كل أسبوع، هتبدأ يوم الثلاثاء 7 فبراير، ثم 14، ثم 21، ثم 28 على الترتيب.. والبداية دائمًا في تمام السابعة مساءً، والدخول مجاني.

يذكر أن أفلام سينما دكّة من إعداد الكاتب السينمائي محمد المصري، وإدارة النقاش بعد العروض بيقوم بيها كريم موسى أحد جمهور السينما القدامى.

لو حابين تعرفوا تفاصيل أكتر عن المكان وأنشطته وتفاصيل العروض والمستجدات المتعلقة بيها تقدروا تاخدوا جولة في صفحتهم على فيسبوك من هنا.