The Definitive Guide to Living in the Capital , Cairo , Egypt

بيمتد شارع عبد العزيز من قصر عابدين إلى ميدان العتبة الخضراء، والفكرة الأساسية من الشارع ده هي الربط بين قصر الحكم بعابدين وقصر الخديوي عباس بميدان العتبة، واسم الشارع بيرجع للسلطان عبد العزيز، سلطان تركيا اللي زار مصر في أبريل من سنة 1863م، وده أثناء فترة  ولاية “إسماعيل باشا”.

لكن الحقيقة إن عبد العزيز مش مجرد شارع تجاري في القاهرة، ده تاريخ حقيقي، وفي السطور الجاية هنعرفكم على 3 حاجات نراهن إنكم ماتعرفوهاش عن الشارع.

1 – سبب تسمية الشارع باسم السلطان عبد العزيز، سلطان تركيا، مش مجرد مجاملة لشخصية زارت مصر في العصر ده. السبب الحقيقي إن دي كانت أول زيارة لسلطان عثماني إلى مصر بعد السلطان “سليم”، وفي القاهرة نزل السلطان في قصر القلعة وصلى الجمعة بجامع محمد على. وخلال الزيارة دي وطد “إسماعيل باشا” مركزه وحصل على حقوق وامتيازات جديدة وقرارات ساهمت في زيادة سلطاته في مصر.

2 – كان الشارع في أول عهده نموذج رائع بيعبر عن التنسيق العمراني والجمالي للقاهرة في الفترة دي، من خلال مباني عظيمة، واهتمام بكل تفاصبيله.

3 – بمرور الزمن تحول الشارع لمنطقة تجارية، لكن البداية كانت بانتشار تجارة الأثاث، ووقتها كان الشارع مقر لأشهر محلات الآثاث في مصر، وفضلت محلات الأثاث مسيطرة على الشارع لحد بداية التسعينيات تقريبًا، لحد ما بدأ يتحول الشارع إلى تجارة الأجهزة الكهربائية، لكن بعد ظهور المحمول، غير أغلب تجار عبدالعزيز النشاط، وأصبح الشارع هو الأشهر في تجارة الهواتف المحمولة ومستلزماتها.

إزاي توصل لشارع عبد العزيز؟

أقرب محطة مترو: العتبة.

الشارع مدخله في قلب ميدان العتبة، وبالتحديد بجانب مبنى المطافي الشهير.