The Definitive Guide to Living in the Capital , Cairo , Egypt

كل شارع في وسط البلد ليه قصة، بس شارع الألفي حكاية مختلفة، مش بس لأنه واحد من أشهر شوارع القاهرة، لكن لأنه شاهد على تاريخ طويل وذكريات عمرها أكتر من قرن.

في الفترة الأخيرة، شارع الألفي اتطور بشكل كبير ضمن خطة الدولة لتطوير وسط البلد. الشارع بقى للمشاة بس، واتزرعت أشجار، واتحطت مقاعد مريحة على الجانبين، مع إضافة أحواض زهور وفواصل منظمة. كمان، تم تركيب كاميرات مراقبة على مدار الساعة، وبقى فيه كشكين أمن علشان الشارع يفضل آمن.

لو عديت يوم من شارع الألفي، هتحس إنك رجعت للعصر الذهبي، وسط مباني عظيمة بيرجع تاريخها لعشرينيات القرن الماضي، بتجمع بين طابع باريس الراقي وأصالة القاهرة. ده غير إنه مكان مثالي للتمشية والتصوير.

الشارع كمان مليان معالم مشهورة، زي مطعم الألفي بك، اللي كان مكانه في الأصل مسرح تيفولي القديم، وسينما كايرو. كمان هتلاقي فندق ويندسور، اللي كان في الأول حمامات ملكية، وبعدها نادي للأعيان وضباط الإنجليز. أما عمارة عدس، اللي على ناصية الشارع، كانت في الأصل مسرح الكورسال اللي غنت عليه أم كلثوم ووقف عليه نجيب الريحاني.

وبالرغم من إن طول الشارع 135 متر بس، إلا إنه مليان مطاعم ومقاهي عريقة زي أم كلثوم وحلويات الفاليرو، وبيحكي تاريخ بدأ من الحملة الفرنسية لحد النهضة المعمارية في عهد الخديو إسماعيل.

الشارع ده مش مجرد مكان تمشية، ده متحف مفتوح بيجمع بين التاريخ، الفن، والحداثة، وأكيد هيكون وجهة أساسية لأي حد عايز يعيش تجربة مختلفة في وسط القاهرة.