The Definitive Guide to Living in the Capital , Cairo , Egypt

القاهرة مدينة عظيمة، ولها تاريخ حقيقي، وهي من أكثر المدن في العالم اللي ليها حكايات وروايات، هي فعلًا “جوهرة الشرق”.. وبما أن تاريخ القاهرة عظيم، فأكيد للتجارة على أرضها نصيب من العظمة دي، وعلشان كده في السطور الجاية هنقول لكم على 10 محلات في القاهرة بدأت نشاطها من مئات السنين، ولها قصص وحكايات، ولسة فاتحة أبوابها لحد النهارده.

حراز

سنة 1885 ظهرت محلات “حراز” للعطارة في منطقة الغورية، وبالتحديد وراء مديرية أمن القاهرة -حاليًا-، وأول ما تدخلوا المحل هتحسوا إنكم رجعتم بالزمن للقرن الـ18، لأن المحل لسة محافظ على ملامحه رغم الحداثة والتطوير، وهتلاقوا هناك الأدراج والأرفف بتاعة زمان زي ما هي، وحتى أشولة العطارة موجودة بنفس طريقة عرضها زمان.. طبعًا حصل تطوير للمكان، لكن رائحة الماضي لسة مسيطرة.

بابازيان

من أقدم محلات الساعات في القاهرة، ومصر كلها، وأسسه غرنسيس بابازيان سنة 1903، بعد نجاته من مذبحة الأرمن في الوقت ده، والمحل موجود في منطقة العتبة، وما زال موجود لحد النهارده، وتقدروا تشتروا منه الساعات القديمة جدًا “التحف”، وزي ما هو محتفظ برونقه القديم، وحاليًا بيديره الحفيد أشود بابازيان.

بايوكي

لو مشيتوا في يوم في عبد الخالق ثروت، هتلاقوا باب خشب أسود، ممكن شكله مايعجبكمش، لكن الباب ده مُطعم بماء الذهب، وهتلاقوا اسم المحل “بايوكي” على لافتة، والمحل ده هو أقدم محل جواهرجي عرفته القاهرة، واتأسس سنة 1900، على يد الخواجة باولو بايكو، والمحل ده مشهور عالميًا، لأنه دخل موسوعة جينيس للأرقام القياسية بأكبر خزنة حديد على الطراز القديم، ومساحتها 1*1 متر، وعمقها 2 متر، وبابها سمكه 3 سم، واتصنعت مخصوص في إيطاليا واتنقلت لمصر، واللي بيدير المحل حاليًا، أحد أحفاد الجد الأكبر بايكو “راؤول”.

عمر أفندي

من أشهر سلاسل المحلات في مصر وأقدمها، اتعملت سنة 1856، على يد عائلة أودلف أوروزدي، اللي أصلهم نمساوي، وكان اسمها “أوروزدي باك” وكان أول فرع لهم في شارع عبد العزيز، وتم بيعها سنة 1921 لمستثمر يهودي مصري، وسماها “عمر أفندي”.

شيكوريل

مورنيو، هو عميد عائلة شيكوريل الإيطالية، وهاجر لمصر من تركيا، واشتغل في محل بيتي بازار، قبل ما يأسس محل شيكوريل سنة 1887، وكان شغال فيه 485 موظف أجنبي، و142 مصري، برأس مال 500 ألف جنيه مصري، وأصبح في وقت قصير من أفخم وأعرق محلات القاهرة، وحاليًا أصبح تحت إدارة شركة بيوت الأزياء الراقية والشركة القابضة للسياحة والفنادق بعد دمجهم.

صيدناوي

من أكتر سلاسل المحلات المعروفة في القاهرة، من وقت افتتاح أول فرع سنة 1913 في الموسكي، على يد سمعان وسليم صيدناوي، وكان المحل على مساحة 8530 متر، ورغم تخصص الأخوين في الخردوات وكان عندهم محلين صغيرين إلا أنهم نجحوا في تطوير تجارتهم وعملوا أكبر سلسلة محلات في مصر ولها 70 فرع، و65 مخزن.

إكسيلسيور

هو أول كافيه في القاهرة وما زال موجود في مكانه بجوار سينما مترو – شارع طلعت حرب، وما زال محتفظ برونقه في التعامل وجودة المشروبات، وتم افتتاحه سنة 1944.

لينرت & لاندروك

رودولف فرانز لينرت، وإرنست هينريك لاندروك، مصورين فوتوغرافيا، وصلوا مصر سنة 1936 وفتحوا محلهم اللي كان بيعبر عن هوايتهم، وكان المحل مهتم بالفن والكتب والتصوير والثقافة، وهو ما زال موجود في شارع شريف باشا بمنطقة وسط البلد، وعندهم هتلاقوا كل اللي بتحبوه من الكتب الأجنبية، وكمان لوحات حائط وشغل هاند ميد، وعندهم تحف من قديم الأزل للعرض، سواء خاصة بمؤسسيه أو من صناعة واستخدام فنانين كبار.

لطيف وسيلي

من أقدم المخابز الإفرنجي، وأشهرها على الإطلاق، اتأسس سنة 1897، وموجود الفرع الرئيسي له زي ما هو حاليًا، في شارع الجمهورية جنب مترو العتبة، وهتعرفوا توصلوا له من ريحته المميزة لأنه أحسن حد بيعمل مخبوزات في مصر.

المالكي

من أقدم محلات منتجات الألبان في مصر، واتبنى سنة 1917، وكان الفرع الأول لهم في حي الحسين، وأشتهر بالأرز باللبن وأم علي، وحاليًا بيقدموا أصناف كتير جدًا من خلال سلسلة فروع كبيرة.