The Definitive Guide to Living in the Capital , Cairo , Egypt

مع بداية فصل الربيع من كل عام بينطلق معرض زهور الربيع والسنة دي المعرض رقم 85 بيتعمل في حديقة الأورمان في الجيزة، وهتلاقوا هناك مجموعة متنوعة من أجود أنواع النباتات، وكمان فيه كتير من المنتجات المختلفة زي مستلزمات الزراعة والعسل والبلح والعطارة وغيرها، وخلال السطور الجاية هننقل لكم تجربتنا في معرض زهور الربيع 2021.

في البداية تقدروا توصلوا لمعرض زهور الربيع من خلال محطة مترو الدقي أو جامعة القاهرة أو تركبوا أي وسيلة مواصلات لحديقة الأورمان أو لجامعة القاهرة، وتطلبوا من السائق ينزلكم عند حديقة الأورمان.. وتذكرة الدخول بـ5 جنيه فقط، وتقدروا كمان تدخلوا بالعربية بسعر 20 جنيه، ولو مش عاوزين تشتروا تقدروا تتصوروا لأن المكان جميل بنباتاته المميزة والمزهرة.

ومعرض زهور الربيع 2021، على الرغم أن العارضين فيه مش زي زمان من حيث العدد لكنه لسة محافظ على رونقه، وفعلًا هتلاقوا فيه أفضل منتجات للزهور اللي بيبدأ سعرها من 10 جنيه، وهي أنواع كتير منها “البلدي – الفل – الياسمين بكل أنواعه – الصبار بكل أنواعه – جزانيا – جرونيا – إيروبس – أنتوميس – فرجة – أراولة – جرونيا”، وده غير النباتات الكبيرة اللي بيبدأ سعرها من 50 جنيه زي “الجهنمية” وكمان “البونزاي” اللي سعرها بيبدأ من 300 جنيه.

كمان هتلاقوا جوه المعرض نباتات صناعية بتبدأ سعر الوردة فيها من 5 جنيه، والعنقود كامل سعره يبدأ من 35 جنيه، وأحواض الزرع اللي فيه منها غالي ورخيص، ده غير الشلالات اللي سعرها يبدأ من 4000 جنيه، والمرجيحة المنزلية اللي يبدأ سعرها من 1750 جنيه.

معرض زهور الربيع 2021 كمان بيكون فيه زي كل سنه مجموعة من منتجي النحل اللي بيبيعوا عسل البرسيم والموالح بـ110 جنيه للكيلو، والسدر المصري بـ240 جنيه، والسدر الجبلي بسعر 380 جنيه، والسدر اليمني عبوة 1/2 كيلو بسعر  680 جنيه، والسدر السعودي 1/2 كيلو بسعر 600 جنيه، وزيت الزيتون بسعر 65 جنيه للعبوة 1/2 كيلو، وبرطمان السمنة البلدي بسعر 150 جنيه ووزنها 900 جرام.

كمان هتلاقوا أنواع بلح كتير تبدأ من 20 جنيه للكيلو، وماتنسوش أن فيه بلح لمرضى السكر بسعر 40 جنيه للعبوة 800 جرام واسمه لاولوب، وده غير البهارات الأسواني اللي العبوة يبدأ سعرها من 7.5 جنيه، وسعر كيلو التمر هندي الناشف 50 جنيه، والكركديه يبدأ سعره من 60 جنيه، والزيوت ومنتجات الجسم والشعر يبدأ سعرها من 15 جنيه.

وخلال تجولنا في معرض زهور الربيع 2021 لقينا مكان مخصص لمنتجات سيوة اللي عندهم زيت الزيتون البكر ومعصور على البارد سعره 110 جنيه، والزيتون المخلل يبدأ من 30 جنيه للبرطمان، وزيت جوز الهند العبوة بـ25 جنيه، وصابونة الملح بـ5 جنيه، وزيوت الشعر والجسم الطبيعية تبدأ من 35 جنيه، وملح طعام من سيوة سعر العبوة 10 جنيه.

المكان كمان مناسب للأطفال وفيه منطقة ألعاب لها تذكرة دخول وحدها بـ5 جنيه، وفيه مطعم وكافيتريا لخدمة الزوار، وخليكم فاكرين أن المكان كبير وكتر اللف فيه محتاج هدوم مريحة وكمان يكون معاكم مياه وعصائر علشان حرارة الجو، وهو شغال من الساعة 9 صباحًا حتى 7 مساءً، وبننصحكم أنكم ماتفوتوش أي جزء فيه رغم أنه كبير ويفضل تزوروه على كذا يوم مش يوم واحد.

العنوان: حديقة الأورمان – الدقي – جيزة.