The Definitive Guide to Living in the Capital , Cairo , Egypt

مصدر الصورة الرئيسية من هنا.

نهر النيل علامة من علامات بلدنا. وكفاية أن كل اللي بيشرب من نيلها بيرجع لها تاني. والرحلات النيلية في مصر لها برامج خاصة متميزة وخاصة رحلات النايل كروز، وبما أننا في كايرو 360 بنحب الخروجات والرحلات المتميزة قررنا نقول لكم على 3 أنشطة متميزة تقدروا تعملوها في قلب نيل القاهرة، واللي هتنبسطوا بيها وهتغير مودكم وهتخليكم في حالة نفسية أفضل بكتير، لأن النيل بيشفي الروح وبيطبطب على القلب.

قلب نيل القاهرة مليان أشكال مختلفة من الرياضة، فتقدروا تشاركوا في رحلات التجديف الجماعي، أو تركبوا الكياك وتجدفوا فردي، وكمان تقدروا تستخدموا المراكب الشراعية لجولة متميزة جوا النيل مع نفسكم، أو تركبوا عجل، أو بدالات، وكمان تقدروا تدخلوا كرة الماء واللي هتتمشوا جواها في قلب النيل. والأنشطة دي موجودة في مناطق المعادي والدقي والعجوزة والزمالك بشكل أكبر، وأشهر ناس بيعملوا ده هما نادي التجديف وIL CAMPO Park.

كمان تقدروا تاخدوا جولة في النيل من خلال النايل تاكسي واللي موجود في “وسط البلد – الزمالك – جاردن سيتي – المنيل – المعادي”، وهو له مواعيد ثابتة يوميًا وبيكون سعر التذكرة 75 جنيه، أو تقدروا لو أنتم 4 تاخدوه مخصوص في جولة من أي مكان وإلى أي مكان.

وفيه داخل النيل فلوكات بشكل وطرق مختلفة للتمشية في قلب النيل بداية من اللي بيكون حجزها للفرد 20 جنيه للجولة ووصولًا للفلوكة اللي بتكون بالحجز المخصوص.

أما الأكل جوا النيل فده له طرق كتير وأولهم أنكم تزوروا جزيرة المعادي اللي هي عبارة عن مجموعة جزر متوصلة ببعض عن طريق كباري خشبية وتقدروا تختاروا من بين المطاعم المنتشرة جوا الجزيرة، أو أنكم تختاروا زيارة جزيرة Il Campo اللي بتقدم خدمة أنكم تجيبوا الأكل بتاعكم وتشوا على النيل مباشرة وتستمتعوا بأجواء مختفة.

وفيه مراكب زي “كافيلوكة– دونت بووت” وهما عبارة عن مركب صغيرة بتشيل عدد أفراد محدد وبتكون بالحجز وبيتقدم فيها مشروبات وأكل حسب طلبكم، وتقدروا تشاركوا في رحلة من رحلات النيل بمراكب نايل كروز للغداء والعشاء زي “أندريا – المنسترلي – الفرعونية” وغيرهم المنتشرين على ضفاف النيل.

العالم كله بيقول “مصر هبة النيل”، والأنشطة في النيل كتير، فأستمتعوا بخروجات مميزة ومختلفة في قلب النيل ولو لكم تجارب محددة في الرحلات والخروجات النيلية نحب نعرفها منكم.