The Definitive Guide to Living in the Capital , Cairo , Egypt

الحدائق في مصر لها تاريخ، وفي كل بقعة في القاهرة هتلاقوا حديقة لها حكاية وقصة تاريخية مميزة، ومن ضمن الحدائق اللي محتاجين نسلط الضوء عليها هي حديقة الفنان الراحل أحمد مظهر (8 أكتوبر 1917 – 8 مايو 2002) واللي عمرها أكثر من 70 سنة، وبتعتبر من الحدائق العالمية، وعلشان كده خلال السطور الجاية هنقولكم على كل اللي مجناجين تعرفوه عنها.

داخل منطقة البراجيل التابعة لمحافظة الجيزة وعلى مساحة 30 فدان هتلاقوا حديقة مظهر النباتية واللي هي من أهم الحدائق في القاهرة نظرًا لدورها في صد التغيرات المناخية وقدرتها على امتصاص ثاني أكسيد الكربون من هواء القاهرة الكبرى، وبداية تأسيسها كانت أوائل الخمسينيات على يد الفنان الراحل أحمد مظهر وبدأها كحديقة ورد وزراعات عادية وبعض نباتات الظل، ومع مرور الوقت وبالتحديد سنة 1986 الحديقة بدأت تاخد طريق علمي وثقافي مختلف، وفي السنة دي تم تجميع أنواع كتير من النباتات من الحدائق التاريخية ومعارض الزهور ودول العالم من خلال ابنه شهاب مظهر، وأصبح بها أكثر من 75 ألف نبتة داخل الحديقة بتشمل 4000 نوع مختلف منهم 2000 نوع مستورد، وبكده تعتبر أغنى حديقة في مصر من حيث عدد النباتات وتم تسجيلها عالميًا بالهيئة الدولية لصون الحدائق النباتية.

على الرغم من العوامل الجوية واندثار بعض النباتات منها لكن إصرار نجل الفنان أحمد مظهر على تطوير الحديقة خلاها تحفة عالمية، ونجح أنه يجلب أنواع نباتات مختلفة كانت مشهورة في الفترة الخديوية وأعاد توطينها وكمان وفر صوبات مختلفة تخلي زراعة أي أنواع نباتات استوائية أو باردة متاح، وبكده أصبحت الحديقة “الرئة” اللي بتخلي القاهرة الكبرى تتنفس لانها بتضخ الأوكسجين وبتمتص ثاني أكسيد الكربون بكميات كبيرة بتوصل لأكتر من 582000 كيلو سنويًا.

والحديقة مش مجرد مكان للزيارة واستنشاق الهواء النظيف أو مساعدة القاهرة في التنفس، لا دي كمان مهمة جدًا في أغراض البحث العلمي للكليات المصرية، وكمان نجحت الحديقة في أنها تكون مورد لأنواع كتير من النباتات المختلفة لحدائق ثانية.

ومن أهم النباتات الموجودة في الحديقة “الفيكس كمانجا – البوانسيانا – الصندل الأحمر – الأكروكاربس – الفوجير وجلد النمر – الفلفل”، والحديقة متاحة للزيارة مع جولة إرشادية مع متخصصين، لكن ده بيتم من خلال الحجز المسبق عن طريق صفحة الفيسبوك من هنا.

حديقة أحمد مظهر موجودة في منتصف محور 26 يوليو – البراجيل – الجيزة.