The Definitive Guide to Living in the Capital , Cairo , Egypt

دايمًا بندور على حاجة جديدة نعملها، وفي أي وقت لما حد بيقترح علينا خروجة في الهواء الطلق لمنطقة ريفية بنبقى مبسوطين، طيب إيه رأيك في مكان جميل بيوفرلك قعدة حلوة وسط الخضرة، وتقدر تعمل فيه أحلى حفلة باربكيو؟ والجميل إن المكان ده قريب جدًا، يعني مش محتاج تسافر بعيد، بنتكلم عن Campo Park منيل شيحة، وفي السطور الجاية هنقولكم على كل التفاصيل اللي محتاجين تعرفوها عنه.

بارك الكامبو زي ما بيسموه بالعربي، هو مكان مختلف على النيل، تصميمه الأصلي لمهندسين فرنسيين، وبيتميز المكان بالخصوصية العالية والهدوء، لأنه متقسم لأكتر من بارك، وكل بارك بيكفي 10 أفراد، ومساحته 225 متر.

وفكرته جاية من بره، وفيه تقدروا تقضوا داي يوز أسري مع أهلكم وأصحابكم، وكل اللي عليكم تجيبوا معاكم أكلكم وأطباقكم، وهما هيوفروا لكم كل معدات الشوي، علشان تعملوا حفلة باربكيو مميزة، وهتلاقوا في كل بارك موجود “فحم – أسياخ – هواية – شواية”، علشان الشوي، وعلشان تاكلوا وتشربوا زي ما تحبوا براحتكم وسط الطبيعة وعلى النيل، كمان عندهم كيدز إريا ببلاش طول اليوم، وعندهم سينما وميوزك، وألعاب للتسلية، زي “شطرنج – كوتشينة – طاولة”، وفيه كمان باركينج لو رايحين بعربياتكم.

اليوم في المكان بيبدأ من 10 الصبح لحد 10 بالليل، ما عدا يوم الجمعة بيبدأ من 1 الظهر، وعندهم 3 مناطق داخل المكان، منها اللي بتتسع لـ 4 أفراد، وأماكن تانية للأسر والأصدقاء بتستوعب من 5 حتى 15 فرد.

أما عن الأسعار فهما عندهم 3 باقات:

1- IL CAMPO BLUE، وبتشمل الجلوس في منطقة الكابلز أو المنطقة العربية للأسرة، مع دخول مجاني للأكل والشرب، وكيدز إيريا وجلسة تصوير ورسوم متحركة، وأنشطة ترفيهية للكبار والصغار، ومعدات الشوي والتدفئة في الشتاء، بسعر 160  جنيه للفرد و110 للطفل.

2- IL CAMPO SILVER وده بيشمل كل ما سبق بنفس التفاصيل، وبيزيد عليه تقديم  مشروب أو 15 دقيقة لعب بسعر 180 جنيه للفرد و130 جنيه للطفل.

3- IL CAMPO GOLD وده باكيدج بيزيد عن اللي قبله بأنهم بيقدموا مشروبين زيادة “سخن وساقع” أو مشروب واحد وجولة نيلية وبتكون بسعر 200 جنيه للفرد و150 للطفل.

العنوان: منيل شيحة – امتداد شارع البحر الاعظم – طريق أسوان الزراعي.

رقم التليفون: 0237493173 – 01093455959

صفحة الفيسبوك من هنا.