The Definitive Guide to Living in the Capital , Cairo , Egypt

سوق مساحات العمل المشتركة من الأسواق اللي محتاجة إعادة نظر.. في الفترة الأخيرة حصل ازدحام عددي شديد في مساحات العمل لكن الجميع تقريبًا بيفكر بنفس الأسلوب فبيقدم نفس الخدمات فبتحصل تخمة شديدة وخمول غير صحي في السوق ككل.. لأن العرض كتير بنفس الخدمات لنفس الجمهور، وبتكون الفرصة الوحيدة لكسر وضع الركود هو وجود مساحات جديدة تقرر توقف عملية الاستنساخ وتقدم الجديد.

“Dots Space” في 30 شارع المساحة في الدقي اختارت أكثر أماكن مصر ازدحامًا بمساحات العمل المشتركة، الدقي، والمساحة تحديدًا.. ودي تبدو مخاطرة مش سهلة تقول أن صاحبها مش بس جريء كفاية، لأ أكيد كمان مالي إيده أوي من اللي ناوي يقدمه لدرجة تخليه متأكد من أنه هيخلق طلب جديد، أو هيلبي احتياج لسه ماحدش ملتفت ليه.

المكان اللي تم افتتاحه مع نهايات السنة الماضية بدأ يتعرف لعملائه ويخلق قاعدة جماهيره الخاصة بس من كام شهر فاتوا.. دي وإن كانت فترة قصيرة لدرجة مثالية في عُمْر المشاريع لكن لو بصينا من ناحية تانية هنلاقي أنه كتير من الخدمات اللي بتتقدم هي خدمات فريدة من نوعها في السوق وبتلاقي احتياجات حقيقية موجودة عند الجمهور ومستنية اللي يبص ليها بعين الاعتبار من فترة، وبالتالي فنقدر نقول أنه المدة اللي أخدها المكان لحد ما بقى اسمه يتردد على الألسنة هي مدة طويلة بالنظر لطبيعة وجودة اللي بيقدمه.

“Dots” من الأماكن القليلة اللي كانت واضحة جدًا في استهدافها فئة معينة من الجمهور والثبات على هذا الوضوح والسعي لترجمة استهدافها ده إلى خدمات ودعم لوجيستي ومعرفي لأفراد الدائرة المستهدفة.. والحقيقة أنهم مش أول حد يركز مع نفس الفئة، أكتر من مساحة عمل قبلهم قالت أنها بتستهدف الفنانين أو اللي ماشيين في سكة الفن سواء من الطلبة أو الهواة أو الممارسين أو العاملين بالمجال.. لكن الفيصل بالنسبة لنا دايمًا بيكون في الترجمة العملية للكلام ده، بأننا نشوف فعلًا دعم حقيقي سواء بالمنشآت أو الأدوات أو المعارف اللي بيحتاجها الجمهور المقصود، وده اللي لسه مش شايفين حد قدر يعمله بالدرجة الكافية والكفاءة المطلوبة.. وآدينا مستنيين.

قدم المكان نفسه للجمهور بصورة مزدوجة على السوشيال ميديا هتسمح لنا نعتبره إحنا كمان “2 في 1” حيث أن الاستوديو مشروع قائم بذاته ومستقل عن مساحة العمل.. وإن كانوا متجاورين في المكان وبتجمعهم نفس المظلة وبيحملوا نفس الاسم..والنظرة الثنائية دي هتخلينا نمشي كلامنا الجاي في سكتين، الأولى هنتكلم فيها على مساحة العمل ونظام الانتفاع منها والخدمات المتاحة فيها، والثانية هنحكي فيها نفس الحكي عن الاستوديو.. لكن قبل ما نعمل كده فإحنا شايفين أننا مضطرين نقف حبة عن الشكل والواجهة والطابع العام لتصميم المكان، غير الديكورات والـ Set Up الداخلي ليه.. اللي يحسسوك عند زيارتك ليه أو حتى مرورك قدامه أنه مش مجرد مساحة عمل وإنما تحفة فنية غنية بالروح والمكونات اللي تجعلها صالحة لأن تكون مقر امبراطورية خدمية جديدة في سوق مساحات العمل المشتركة.

مساحة العمل

الانتفاع من مساحة العمل بيكون على 3 أنظمة.. نظام بالساعات ونظام آخر يومي ونظام ثالث شهري.. نظام الساعات بيفترق هو كمان على كذا فئة، الفئة الأولى بتتيح الجلوس في المكان 10 ساعات مقابل 150 جنيه، والعشر ساعات دول يمكن توزيعهم بشكل حر على أوقات مختلفة من يوم واحد أو حتى أيام مختلفة.. والفئات التانية بتتبع نفس النظام الحر في توزيع عدد الساعات، لكن مع ارتفاع الفئة بيزيد عدد الساعات المتاح ليك الانتفاع بيها، وبيختلف المقابل الإجمالي، وجدير بالذكر برضه أنه في هذا النظام بيتم دعم الطلبة بـ 50% خصم على أسعار الباقات المختلفة.

المساحة كمان فيها جزء خاص بعرض المنتجات المختلفة لبعض المشاريع الشبابية الناشئة.. سواء تيشيرتات أو مطبوعات ورقية أو بعض المستلزمات الشخصية.

الاستوديو

الاستوديو هو مساحة مجهزة بالأدوات اللازمة للتصوير، وبيكون الانتفاع منه على نظام واحد بفئات متعددة.. وبيتم عرض خصم 25% لطلبة كلية الفنون.

خدمة إضافية بيقدمها المكان للناس الموجودين على قوائم العملاء المنتظمين فيه بعيدًا عن الانتفاع من المساحات والمعدات هي خدمة التشبيك أو الـ “Networking” للـ “Freelancers” بشكل كبير.. وده بيتم بأنهم يوصلوا المحتاجين للخدمة بناس يقدروا يقدموها من جوة مجتمعات “Dots”.

محتاجين برضه نجيب سيرة الدورات والورش التدريبية اللي بيعملها أو بيستضيفها المكان من حين لآخر، وبيركز معظمها على نفس الفئة اللي بيستهدفها المكان فبنلاقي معظمها بيدور في فلك الفن وأدواته.

بعد الكلام الكتير اللي حكيناه ده محتاجين نأكد عليكم أن زيارتكم للمكان هتفرق كتير في تفاعلكم معاه ومعرفتكم بيه وبمميزاته.. وبالنسبةلأي تفاصيل زيادة حابين تعرفوها ممكن تعرفوها من خلال التواصل معاهم على صفحة “Dots Space” على فيسبوك من هنا، أو صفحة “Dots Studio” من هنا.