The Definitive Guide to Living in the Capital , Cairo , Egypt

في بداية سنة 2000 كانت دريم بارك هي مدينة الملاهي الأشهر في مصر كلها، وكانت هي المصدر الرئيسي للفرحة مع ماجيك لاند، وكانت إعلاناتها في الوقت ده تريند في التليفزيون، وخاصة إعلان دوبي اللي بيستناكم على الباب ويقابلكم بالترحاب، دلوقتي مع التطور اللي حصل بقى فيه كتير من الملاهي في مصر ولكن ما زالت دريم بارك بتنافس ولها ذكريات حلوة مع أجيال كاملة. النهاردة هنقول لكم إزاي تقضوا يوم مميز في دريم بارك اللي تاريخها اتربى عليه أجيال وشافوا الفرحة من خلال زيارتهم لها، وأنتم كمان لازم تزوروها.

اللي مايعرفش دريم بارك فهي اتبنت سنة 1999 وبتعد من أكبر مدن الملاهي في الشرق الأوسط ومبنية على مساحة 150 فدان، واللي تولى بناها وتصميمها شركة كندية وده بالتزامن مع بناء كومباوند دريم لاند وكلهم تابعين لمؤسسة أحمد بهجت رجل الأعمال الأشهر في الفترة دي.

في البداية دريم بارك فيها ألعاب مميزة وكتيرة، وهتبدأوا رحلتكم فيها بأنكم تاخدوا جولة في المكان علشان تختاروا الألعاب اللي عاوزين تلعبوها، وماتنسوش أن في الإجازات والويك إند المكان بيكون زحمة فكل ماتروحوا بدري هتلعبوا أكتر، وهما عندهم 5 ألعاب مجانية “جولة السيارات الملكية – عربات التصادم – قطار الشرق – سفينة نوح – الغسالة”.

أما الألعاب المدفوعة فهي 10 ألعاب كلها إثارة ومحتاجة قلب جامد “لعبة الصاروخ – سباق السيارات – قلعة الرعب – لعبة الديسكفري – القطار الطائر – توب سبين – لعبة تورنادو”، وده غير الألعاب المائية اللي كلها متعة وضحك، وماتنسوش أنهم عندهم مبنى مخصص لألعاب الفيديو وكمان سينما 3D.

ومن ضمن الخدمات المتاحة في دريم بارك مجمع المطاعم والكافيهات اللي هتلاقوا فيه كل اللي بتحبوه من أكل وشرب وخدمات، وهما مواعيدهم يوميًا من 10 صباحًا حتى 7 مساءً ما عدا الجمعة لحد 9 مساءً.

أما أسعار التذاكر فهي مقسمة لـ4 فئات، تذكرة سيلفر 200 جنيه، تذكرة سيلفر كومبو 250 جنيه، تذكرة جولدن 350 جنيه، وتذكرة الفاميلي اللي بتشمل أب وأم وطفلين أقل من 10 سنوات بـ760 جنيه.

العنوان: طريق الواحات – مدخل دريم لاند – 6 أكتوبر.

وتقدروا تعرفوا أكتر عنهم من خلال صفحة الفيسبوك من هنا.