The Definitive Guide to Living in the Capital , Cairo , Egypt

الصورة الرئيسية: Spencer Davis

الحياة في القاهرة مختلفة عن أي مكان، وفعلًا أي حد بيزور العاصمة المصرية لازم في نهاية اليوم يقول “إيه اليوم الحلو ده”. ومنصات عالمية كتير بدأت ترشح مؤخرًا القاهرة كوجهة سياحية مميزة تستحق الزيارة. ومؤخرًا نشرت “ناشيونال جيوجرافيك” دليل لقضاء يوم ممتع في القاهرة بتفاصيل بسيطة وجميلة بتبدأ من 7 صباحًا وتنتهي 10 مساءً.

تعالوا نعرف إيه اللي رشحته المنصة العالمية لجمهورها للاستمتاع بيوم في القاهرة.

قالت ناشيونال جيوغرافيك أن أول ضوء النهار الساعة 7 صباحًا بيكون رفيق الأهرامات وأبو الهول، وده أفضل وقت لزيارتهم لتجربة الشعور بالاندهاش من مشاهدة الآثار اللي عمرها أكتر من 4500 سنة.

وبعد زيارة الأهرامات، تقدروا تزوروا المتحف المصري الكبير الساعة 11 صباحًا، واللي حاليًا زيارته محدودة، ولكن كمان اقترحوا زيارة المتحف القومي للحضارة والاستمتاع بالملوك والملكات وقاعة المنسوجات، وبعدها ممكن تكون الزيارة لمركز الفسطاط للحرف التقليدية والحرفيين وهما شغالين.

ومن الفسطاط للقاهرة القبطية الساعة 1 ظهرًا، وهناك هتستمتعوا بزيارة الكنيسة المعلقة والمدعومة فوق بوابة قلعة بابل اللي بترجع للعصر الروماني، وكمان زيارة المتحف القبطي اللي فيه أيقونات مصرية ورومانية مسيحية قديمة.

وبعد التعب واللف رشحت “ناشيونال جيوجرافيك” أن الساعة 3 تروحوا كشري أبو طارق في شارع شامبليون، اللي وصفته بأن الطعام المفضل في القاهرة خلال الزيارات، وقال أن المطعم رغم بساطته إلا أنه بيقدم أكل لذيذ ومدهش، ومن الممكن بعدها زيارة المتحف المصري في ميدان التحرير واللي قريب منه جدًا.

مع بداية كسرة الشمس والساعة 5 ممكن تروحوا لرحلة عبر الزمن وتنتقلوا للقاهرة التاريخية عن طريق باب الفتوح في الجمالية، وزيارة شارع المعز اللي فيه أجمل تمثيل معماري في العالم الإسلامي، وتقدروا تزوروا كمان بيت السحيمي ومدرسة السلطان قلاوون، وكمان ممكن تتسوقوا من شارع المعز حاجات كتير مختلفة.

وبداية من الساعة 6 تقدروا تخرجوا من شارع المعز لخان الخليلي أجمل وأحلى سوق في الشرق لأوسط، واللي لو اندمجتوا فيه مش هتخرجوا من متاهات الأزقة بتاعته ولا هتقدروا تقاوموا سحر المنتجات اللي بتتباع هناك.

وبعدها وحسب التقرير المنشور تقدروا تزوروا باب زويلة الساعة 8 ومنطقة الخيامية وتستمتعوا بالشغل الهاند ميد المنسوج واللي أكيد مش هتقاوموه وهتشروا منه.

وفي نهاية اليوم؟ الساعة 10 مساءً تقدروا تختاروا يومكم ينتهي إزاي، إما بالسهر في مقهى نجيب محفوظ أو الفيشاوي، أو التوجه لقهوة الحرية في وسط البلد اللي موجودة من الثلاثينات.