دليل كايرو 360 للحياة في حي مدينة نصر
Meriam Wagdy
أكبر حي في القاهرة٬ فيه أعرق جامعة إسلامية
في العالم٬ وأكبر مول في مصر٬ وتاني أكبر ستاد في العالم العربي٬ وشاف إغتيال رئيس
سابق٬ واحد من ضمن 3 بس! حي «مدينة نصر» جديد نسبياً٬ أنشئه الرئيس الراحل «جمال
عبد الناصر» بقرار جمهوري بعد الثورة المصرية التانية. بالتالي هو من الأحياء اللي
الجيل اللي فات لما بـ يمشي في شوارعها الزحمة٬ ويشوف محلاتها المتلاصقة٬ بـ يفتكر
أيام ما كانت «مدينة نصر» دي صحرا وفيها كام عمارة واقفين وسط فراغ٬ وأيام ما
المتر كان بتراب الفلوس٬ مع الوضع في الإعتبار ان المتر النهارده في بعض الأماكن
وصل لـ6000 جنيه.
«مدينة نصر» فيها مناطق مستواياتها متفاوتة
جداً لدرجة انها دليل حي عن توزيع الدخل المصري اللي فيه خلل فظيع. فيها المناطق الغالية
زي المنطقة الأولى٬ التانية و«أرض الجولف»٬ وفيها مناطق زي «عزبة الهجانة» (واللي
اسمها كمان «الكيلو أربعة ونص»٬ أو «زهراء مدينة نصر») وهي من المناطق العشوائية.
الحي أغلب سكانه من الطبقة الوسطى الحديثة٬
أو المهاجرين لدول الخليج العائدين٬ وده بـ يظهر على معمار المناطق السكنية فيه٬
الشكل العام هو بلوكات من الأسمنت الرمادي٬ بإستثناء بعض العماير الجديدة في
المناطق الأرقى من «مدينة نصر».
لو بـ تفكر تعيش في «مدينة نصر» أو تستثمر في
عقار في الحي٬ الأسعار النهارده بقيت من 5000 لـ6000 جنيه للمتر في المناطق الأولى
والتانيه٬ و«أرض الجولف»٬ أما المناطق من الخامسة للتامنة فأسعار المتر بـ تتراوح
بين 3000 و3500 جنيه. وفي مناطق أسعارها ما بين 2000 و2500 جنيه للمتر زي المنطقة
العاشرة و«الواحة»٬ أما «عزبة الهجانة» فالمتر فيها ما بين 1000 و1200 جنيه.
ولأن في ناس كتير اشتروا شقق في الحي وسافروا
دول الخليج٬ فـ«مدينة نصر» فيها فرص تأجير مش قليلة وأسعار التأجير لشقة مساحتها
100 متر مثلاُ متشطبة تشطيب متوسط بـ يبتدي من 1500 جنيه للشهر وبـ يوصل لأضعاف ده
إعتماداً على المنطقة ومواصفات الشقة أو العقار.
ولعوامل كتيرة منها مستوى المنطقة وموقعها٬ «مدينة
نصر» بقيت معقل المولات في العاصمة. وبالتالي ملجأ لكل متسوق. الحي فيه عدد كبير
من المولات: «سيتي سنتر – City
Center » و«طيبة مول» و«جنينة
مول» و«السراج مول» و«العقاد مول» و«كومبيو مول – Compu mall » ٬ و«سيتي ستارز – City Stars » ٬
أكبر مول في مصر (هو عملياً يعتبر في مدينة نصر٬ لكن فعلياً ورسمياً مصر الجديدة)
وغيرهم.
لو بـ تدور على ملابس، «مدينة نصر» فيها إختيارات كتيرة جداً٬ شارع «عباس
العقاد» الشهير والزحمة في ملابس أسعارها ما بين المعقولة والغالية٬ وما بين
المحلي والمستورد. فيها محلات متخصصة فساتين سواريه كتير جداً ومن المحلات دي٬ «لوكاس»
و«أربل» و«هيلينا» وغيرهم من المحلات اللي بـ تقدم تشكيلة كبيرة مصري٬ وتركي
وأوروبي كمان. الشارع فيه محلات أطفال متخصصة زي «كلارك» و«لوڤ أند كير». ولو نازل
تشتري ملابس في «مدينة نصر» لازم تعدي على شارع «حسنين هيكل» وده شارع موازي لـ«عباس
العقاد» وفي محلات ملابس حريمي راقية ومتوسطة كتير. وطبعاً ده بجانب الماركات
العالمية اللي محلاتها موجودة في المولات اللي في مدينة نصر زي «زارا – Zara » و«إتش&إم – H&M » و«دالي درس – Daly
dress » و«تمبرلاند – Timberland » و«نايك – Nike » و«أديداس – Adidas » و«سكيتشرز – Sketchers » وغيرهم كتير. ولو هـ نتكلم عن
«سيتي ستارز» فده هـ يحتاج مقال لوحده٬ لكن من غير مانقول هو فيه كل اللي هـ تفكر
فيه.
الجميل في الحي انه فيه مناطق متخصصة في بيع سلع معينة. فتلاقي محلات
متخصصة في الأثاث في شارع «مكرم عبيد» وهو من أهم الشوارع الرئيسية في الحي٬ وفيه
محلات كبيرة زي «السلاب» و«ديكوراما» وفي مجموعة محلات برضه متخصصة أثاث في شارع
متفرع من «مكرم عبيد» اسمه «أبو داود الظاهري». ولو بـ تدور على إلكترونيات فالـ«سراج
مول» في مول رقم 3 بالتحديد (السراج مول متكون من 3 مولات)٬ في عدد هائل من محلات
الإلكترونيات وكمان بـ يصلحوا أجهزة محمول٬ لدرجة ان المكان بقى شبيه بسوق
موبايلات جملة٬ وفيه المستعمل والجديد، ده غير «كومبيو مول» اللي مش بعيد عنهم في
مصطفى النحاس . والحي السابع مشهور بقطع غيار وتصليح السيارات٬ و«شروق
مدينة نصر» (ودي قريبة من النادي الأهلي) مشهورة بالأجهزة الكهربائية٬ وشارع
«حسنين هيكل» فيه أكتر من محل لكماليات العريبات (سماعات٬ ساب ووفر٬ شكمانات تربو…حاجات
من النوع ده).
ده كان بالنسبة للتسوق٬ أما الأكل٬ فـ«مدينة نصر» تنوعها بالطبع منعكس على
المطاعم والكافيهات اللي بـ تخدم المنطقة٬ وبجنيه واحد أو بميه ممكن تاكل وتشبع من
نفس الشارع. المطاعم الجديرة بالذكر لو مستعد تدفع هي «كورتيچيانو – Cortigiano » و«روستري – Roastry » في أرض الجولف٬ ومجموعة مطاعم في
«سيتي ستارز» منها «لاروما لاونچ – L’Aroma Lounge »٬ «أون زا بوردر – On the Border » «روبيز تيوسداي – Rubys Tuesday » «واجاماما – Waga mama »
المحلات المتخصصة في الأسماك تقريباً كلها موجودة ومنها «البرج» في الحي التامن٬ «كاستن»٬
«جندوفلي» و«بحري». أما المحلات المتخصصة في الكباب والكفتة فهي «فرحات»٬ «عبده
كفتة» في المنطقة السادسة ٬ «حسني» عند «السراج مول»٬ ومطاعم الوجبات السريعة مافيش
أكتر منها في «سيتي ستارز»٬ ولو عاوز تشبع وماتدفعش كتير في مطعم «بيسترو – Bistro » في شارع «أبو داود الظاهري». ده
غير سلاسل الكافيهات المعروفة اللي فاتحة في أكتر من منطقة في «مدينة نصر». سلاسل
السوبر ماركت الشهيرة كلها ليها فروع كبيرة في «مدينة نصر» من «مترو – Metro » لـ«أبو ذكري»٬ ومن «المحلاوي» لـ«سبينيز
– Spinneys ».
ولو شخص رياضي مدينة نصر فيها نادي الزهور والنادي الأهلي٬ نادي مدينة نصر٬
ونادي السكة الحديد٬ ونادي الفروسية٬ نادي المقاولون العرب ده غير عدد كبير من دور
القوات المسلحة٬ والشرطة وغيرهم. فيها كمان مجموعة صالات چيم بكل المستويات٬ في «هيرو
– Hero » و« 24/7 » و«أور چيم – Our Gym »
و«سمارت – Smart »٬
«برو سنتر – Pro Center » ولو مش عاوز تدفع كتير في «نايل چيم – Nile Gym » اللي في المنطقة السادسة، وهـ
تلاقي صالات ﭽيم صغير في شوارع جانبية كتير.
بالنسبة للأطفال فيه أكتر من ملاهي٬ منها ملاهي «وندرلاند» ودي ملاهي صغيرة
في آخر «عباس العقاد»٬ وفيه أكتر من ملاهي في «سيتي ستارز»٬ ولو من عشاق البولينج٬
في صالات بولينج في أكتر من مول٬ وفيه المركز العالمي للبولينج أو الـ« IBC » وده في شارع متفرع من «صلاح سالم».
بالرغم من مساحة الحي الهائلة٬ إلا انه مؤخراً ابتدت حركة المرور فيه تبقى
بطيئة جداً٬ خاصة في شارع «عباس العقاد»٬ و«طريق النصر»٬ اللي رابط الحي من أوله
لأخره٬ وبـ يكون زحمة عند مدخل الشوارع الرئيسية زي «عباس العقاد»٬ «مكرم عبيد»٬ وشارع
«عمر ابن الخطاب» اللي فيه «سيتي ستارز».
حي عمران٬ زحمة٬ ومليان بحاجات تـ تعمل وتـ تشاف٬ كان ممكن يبقى معمارياً
أجمل٬ لكنه في الآخر محوري ومافيش قاهري مابـ يروحهوش من الوقت للتاني.
مقترح
معالم وسياحة
متحف الصيد: مغامرة في قلب القاهرة هتاخدك لعالم الأدغال
تاريخ مصر حيوانات محنطة +7
أفلام
