دليل كايرو 360: إزاي تقضي 24 ساعة من المرح فى القاهرة
Cairo 360
تخيل معانا المشهد ده: فجأة لسبب معين عندك يوم أجازة، وعاوز تعمل حاجات داخل القاهرة. يمكن تكون عاوز وقت من الراحة، أو حاسس بملل ووحدة. إحنا مش هـ نقدر نساعدك فى موضوع الملل ده، علشان مافيش سبب يخليك تحسه وأنت فى القاهرة؛ مدينة غنية بالثقافة، والمطاعم وحاجات ممتعة ثانية كثير. لو عندك القدرة على استغلال الوقت زينا فى كايرو 360، مش هـ تقابلك مشكلة التأقلم مع يوم من الخروجات المتطورة فى القاهرة، يلا نبدأ؟
في الصباح:
طيب، خلاص صحيت الساعة 8 صباحًا ولسه نعسان. البداية هـ تبقى مع إفطار لذيذ، وطبعًا مافيش أحسن من الإفطار المصرى.
لو فكرت تعمل زيارة سريعة للأهرامات، يبقى الإفطار التقليدى الموجود فى المنطقة أكيد هـ يبقى من عند فلفلة فى الهرم. اللى بـ يميز فلفلة أنه رخيص، مصرى أصيل وطعمه مميز، وهناك تقدر تستمتع بطعم الفول والطعمية الجامد، طِعم من الآخر!
أما لو عاوز حاجة قريبة من وسط البلد، سيكويا في الزمالك بديل هائل للاستمتاع بالإفطار المصرى بشكل أرقى. بديكوراته الشيك الأنيقة وإطلالته المميزة على النيل، هـ يفضل واحد من أجمل الأماكن فى القاهرة.
بعد الاستمتاع بالإفطار المطول، يفضل أنك تأخذ وقتك فى الهضم، اطلع على الأهرامات زى ما هو مخطط أو تزور الأماكن القريبة فى وسط البلد. المتحف المصرى بـ يقدم درس سريع عن مصر القديمة، وقربه من ميدان التحرير بـ يعرفك على لمحة من الرمز القومى الجديد. متاحف ثانية مهمة فى القاهرة تشمل متحف الفن الإسلامى ومتحف جاير أندرسون.
قضاء كام ساعة فى خان الخليلى عمرهم ما يروحوا هدر، بس جهز قدراتك على الفصال. الأسهل من السوق الزحمة ده قلعة صلاح الدين اللى بـ تضم المتحف الحربى الرائع. تقدر كمان تزور واحد من أكبر المساجد فى القاهرة والموجود على بعد خطوات قليلة وهو مسجد الرفاعى أمام قلعة صلاح الدين بـ يقدم فكرة عن المعمار، وعهد الملوك والتاريخ الإسلامى فى مصر.
بعد الظهر:
بعد كل التنقلات اللى فاتت، جاء وقت وجبة شهية. تقدر تلاقى أبو السيد فى أماكن كثير فى المدينة منها المعادى، والدقى والزمالك وبـ يقدم في المنيو أكلات مصرية زى الملوخية والفتّة.
لو حصل أنك كنت فى منطقة الهرم الوقت ده، بـ نرشح لك وبشدة أنك تروح أندريا فى المريوطية. أندريا غالبًا بـ يقدم أحلى فراخ مشوية فى مصر كلها، وعنده مكان جلوس فى الجنينة لطيف.
لو كنت مستعجل وعاوز غداء سريع وبرضه مصرى يبقى جرب زوبا أو فرع من فروع كايرو كيتشين فى المعادى أو الزمالك. المكانين بـ يقدموا أكلات مصرية بطريقة عصرية.
وكمان تقدر تسمتع بأكلات بحرية جميلة كبديل. اعمل حسابك أن أيدك هـ تكون ريحتها زفارة، علشان مستحيل تقدر قيمة التجربة إلا لو حسيت أنهم كانوا فعلاً تحت البحر. مطاعم السمك المحبوبة منها فيش ماركت فى المعادى، وهليوبوليس والجيزة، أو مطعم الجيزة الرائع فلاينج فيش.
ننصح بعد الأكل بشوية راحة. لو عاوز تتسلى على الطريقة المصرية يبقى روح على كورنيش النيل فى جاردن سيتى أو المعادى واركب فلوكة. دى تعتبر طريقة رخيصة ومرحة تقضى بها وقتك بعيد عن الزحمة والإزعاج، وتأخذ معاك مزيكتك، ومشروباتك وأكلات خفيفة لو حبيت. بـ يميز الفكرة دى أنها رحلة مريحة للأعصاب وسط أشعة الشمس، وإيه أحسن من النيل وقت غروب الشمس؟
حديقة الأزهر كمان فكرة لطيفة فى وقت استراحة بعد الظهر ولو حظك كويس ممكن تلاقى حفلة موسيقى حية على مسرح الجنينة الموجود داخل الحديقة. لو كنت بـ تحب الخضرة تقدر تروح الحديقة الدولية تستلقى على النجيلة وتتفرج على السماء.
فكرة ثانية برضه لكل عشاق الشمس أنهم يروحوا حمام سباحة فى أى فندق بـ يسمح بقضاء Day use على حمام السباحة.
وقت المغرب:
شوية فنون شعبية وثقافة يعتبروا طريقة هائلة لبداية الليل، ومافيش أكثر من المعارض الفنية. عدد كبير من الجاليريهات موجودة فى وسط البلد والزمالك بـ يقدموا عروض متنوعة، من الشباب والفنانين الصاعدين بالإضافة لفنانين مشهورين. أجندة كايرو 360 بـ تخليك متابع كل المواعيد والأماكن.
لو عاوز تحضر حفلة موسيقية أحسن الحلول أنك تبدأ سهرتك فى أفتر 8 أو 100 كوبيز ميوزيك سبيس فى وسط البلد أو كايرو جاز كلوب فى المهندسين أو جاز مايت فى الزمالك. الأماكن دى بـ تستضيف فنانين محليين تقريبًا كل يوم وأكيد هـ تعرف أكثر عن العدد الكبير من المواهب الجديدة، وكالعادة أجندة كايرو 360 فيها كل المواعيد.
وقت السهرة:
لو هـ نتكلم عن السهر، يبقى بـ نتكلم عن القاهرة! بجانب الأماكن المعروفة زى كايرو جاز كلوب، وأميتشى –الاثنين فى الزمالك وهليوبوليس– أو تماراى لو عاوز حفلات أشد.
ممكن تحتاج أكل علشان السهرة ممتدة للساعة 3 أو4 الصبح، وهى السهرة تحلى من غير سناك خفيف بالليل متأخر؟ الكلام ده فى القاهرة معناه ساندويتش شاورما أو اثنين.
فروع ماى كوين فى المهندسين ومدينة نصر مكان أساسى لوجبات بعد منتصف الليل، وفيها بـ يقدموا مجموعة من الساندويتشات والأطباق سهلة الأكل. بالنسبة للشاورما مافيش زى أبو عمار السورى وعلّم على الكلام.
وبكده نبقى خلصنا جولة من الأنشطة استمرت 24 ساعة؛ ودلوقت باقى حاجة واحدة تعملها: استجمع الباقى من طاقتك وروح البيت، ادخل السرير، واستريح شوية علشان تستعد لتكرار نفس اليوم بكرة.
مقترح
معالم وسياحة
أشهر المساجد التاريخية في القاهرة.. معالم مذهلة بتحكي تاريخ عريق
أشهر مساجد القاهرة أقدم مساجد مصر +5
مطاعم
