دليل أماكن سحور في الرخيص لرمضان 2011
Waleed Abuarab
وجبة السحور الرخيصة بقت مطلب شعبي بعد الظروف
الاقتصادية الصعبة اللي مرت بها البلاد، بس الحقيقة أن من خلال تجربتنا لقينا أن
السحور الرخيص ممكن يكون أحسن 100 مرة من سحور 5 نجوم في خيم ومطاعم على النيل، متعة
أنك تقف على عربية فول قبل الفجر بنصف ساعة وتطلب طبق فول وسلاطة وبيض مسلوق
وبعدين تخلص وتطلب كمالة علشان تتأكد أنك مش هـ تجوع ثاني يوم في الصيام، وبعد ما
تأكل وتزود وتتكيف تروح لصاحب العربية تسأله الحساب كام؟ يقولك: أخذت إيه؟ وتقعد
تفكر شوية وتحسبها وقبل ما ترد يقولك هات 5 جنيه!.. آه على طول كده؛ هو مش فارق
معاه التفاصيل، المهم أنك أكلت واتبسطت وهو واخد اللي يرضيه ومش ظالمك طبعًا،
الموضوع تلقائي وبسيط جدًا، هـ تحس معاه بشعور غير عادي، سعادة ورضا وألفة والأهم
من ده كله.. الشبع. دي سمة مميزة لمعظم عربيات الفول في كل مصر، اللي بشهادة الجميع
فولها وسلاطاتها بـ تبقى لها طعم مختلف أحلى من أي محل عادي.
رصدنا كام عربية فول في أحياء القاهرة ومعظمها مالوش اسم
ومشهور بس بالمكان اللي بـ يقف فيه، زي عربية الفول الشهيرة اللي بـ تقف في ميدان
رمسيس خلف مسجد الفتح مباشرة، بـ تبدأ شغل من الساعة 10 بالليل لحد قبل الفجر،
وزي ما قلنا هـ تأكل وتشبع بـ 5 ولا 6 جنيه، ومافيش اختيارات غير الفول والبيض
المسلوق والباذنجان. عربية عبده دولار موجودة في ميدان النعام في حي عين
شمس، أمام مدرسة ابن خلدون الثانوية، عليه إقبال وزحام مش طبيعي، أسعاره أعلى شوية
من المعتاد بس آخره 10 جنيه للفرد يعني، ودائمًا هـ تيجي تطلب باذنجان مخلل يقولك
“معلهش والله خلص.. أصله كان على القد!” طيب ما تعمل على قد كل الزبائن!
بس مش مهم، حلاوة الفول بالزيت الحار عنده هـ تنسيك كل حاجة.
وفي حي السيدة زينب امشي في شارع بورسعيد لغاية ما يتفرع منه شارع جانبي صغير ناحية
اليمين، هـ تلاقي عربية فول
الجحش في ركن في أول شارع جانبي على
شمالك، أشهر
عربية فول في القاهرة، بـ يعمل فول بالزيت وبالزبدة، وعنده بطاطس محمرة وباذنجان
مقلي، أسعاره معقولة، بس زحمة شوية.
فول محروس موجود في جاردن سيتي، جنب سفارة كندا، في
رمضان بـ ينصب ترابيزات وبـ يكبر القعدة ويغير المنيو، أغلى من باقي الأماكن اللي
ذكرناها بس عنده تنويع كبير في الأصناف، أومليت وطعمية وجبنة وحاجات ثانية، زيه زي كشك فول سعد الحرامي في وسط البلد اللي
جنب «إفتر أيت» وممكن تطلبه وأنت قاعد على قهوة التكعيبة، وتأكل من عنده أحلى شكشوكة وفول بالسجق وجبنة
بالطماطم.
وغير عربيات الفول فيه بعض المحلات أسعارها قليلة وبـ
تعمل سحور هائل، زي كل فروع جاد في مصر الجديدة والدقي والحسين والمهندسين والمعادي، وبـ يبقى نفس
المنيو زي الأيام العادية بس بـ يكون فيه اهتمام أكثر بالفول وأكلات السحور، وممكن
ما تلاقيش كثير من وجبات اللحوم والفطائر.
مطعم العائلات له فروع في ميدان حلمية الزيتون وفي ميدان الباشا في
المنيل وفي شارع الحجاز في مصر الجديدة، بـ يعمل خيمة رمضانية كبيرة أمام المحل
وبـ يعمل منيو سحور خاص برمضان، وممكن تأكل وتشبع لو طلبت وجبة بـ 15 جنيه فقط، بـ
نرشحه لو رايحين مع عدد كبير أو مع أفراد أسرتك علشان الجو هناك عائلي وهادئ إلى
حد ما.
محلات الشبراوي أرخص من محلات أرابياتا الشبراوي وتخصص عالمي في الفول ومشتقاته، ممكن تعرفوا كل عناوينهم
من الموقع عندنا.
بعيد عن الفول شوية بقى ممكن تتسحر كبدة وسجق من مطعم علاء
الموجود في ميدان سانت فاتيما في مصر الجديدة، هو بـ يفتح من ثاني أسبوع في رمضان،
ساندويتش الكبدة أو السجق بجنيه ونصف، هـ تأكل 6 على الأقل علشان تبدأ تحس أنك
شبعان لأن حجمه صغير في عيش فينو، بس لذيذ جدًا والمطعم عنده فول وطعمية وبرجر
وشاورمة، بس معظم الناس بـ تروح مخصوص علشان الكبدة والسجق والفتة المفرومة، وجرب
سلاطة الكول سلو من عنده، ده لو لقيتها مش خلصانة.
ممكن تتسحر بفلوس قليلة كمان عند بابا عبده أو زيزو الموجودين في باب الفتوح قريب من شارع
المعز، ودول بـ يبقى لهم جو ثاني في رمضان، وأعداد الترابيزات أمامهم بـ تزيد، والخدمة
بـ تبقى أسرع والأكل بـ يبقى مخدوم أحسن من الأيام العادية.
بسهولة هـ تلاقي عربيات فول في كل شوارع القاهرة في
رمضان وخصوصًا في الأحياء الشعبية، لو قابلت أي واحدة منهم أو أي مكان سحور أسعاره
حنينة على الجيب ابعث لنا عن مكانها بالضبط ورأيك في مستوى الأكل علشان نعَّرف
باقي الناس بها بما أن رمضان بـ يحب اللمة.
وكل سنة وأنتم طيبين ويتعاد عليكم وعلينا بخير إن شاء
الله.
مقترح
معالم وسياحة
أشهر المساجد التاريخية في القاهرة.. معالم مذهلة بتحكي تاريخ عريق
أشهر مساجد القاهرة أقدم مساجد مصر +5
مطاعم
