الحياة في كايرو
دليل أحداث نهاية الأسبوع: هاني شاكر ومادو وفرقة بهية وأوركسترا القاهرة السيمفوني
بواسطة
Cairo 360
السلام عليكم.. يا رب تكونوا في أحسن حال وكل واحد يبقى قريب من الناس اللي بـ يحبها في عيد الحب السنة دي. طبعًا ناس كثير بـ تدور على أماكن خروج ومطاعم وكافيهات تنفع لقعدة رومانسية وأجواء شاعرية، وممكن ما يهتموش قوي بالنشاط الثقافي الدائر في العاصمة النهارده بالذات أو في الويك إند ده عمومًا، ناهيك عن اللي خرج من القاهرة من الأساس وراح يسترجع بعض الذكريات على أحد الشواطئ أو القرى السياحية، واللي لسه ما عندوش أفكار للخروجات ممكن يعتمد على كايرو 360 فيما يخص المطاعم والكافيهات وكمان أماكن التسوق اللي ممكن يجيب منها هدايا، هـ تلاقوا أفكار كثير.. نوعدكم بكده، بس هنا إحنا موجهين كلامنا لأنصار المزيكا والحفلات والمعارض والندوات، أنصارها تحت أي ظروف، عيد حب أو عيد فطر أو غيره.. فلننطلق.
فرقة تيليبوتيك اللي بـ تعتمد على المزج الصوتي بين الآلات الحية والإلكترونية هـ تكون معاكم في ساحة مكان للفنون في حفلة لعدد من الخلفيات الموسيقية والفكرية لثلاثة موسيقيين. مركز مكان الثقافي بجوار ضريح سعد زغلول من أهم الأماكن في تقديم الفنون والعروض غير التقليدية بشكل محترف وجذاب. سعر التذكرة عند الحجز 20 جنيه وبدون حجز 30 جنيه والحجز بـ يسقط الساعة 9 مساءً.
حب من نوع آخر في عيد الحب، حب الوطن في حفل موسيقي غنائي كبير بـ تنظمه دار أوبرا القاهرة على المسرح الكبير تحت عنوان “احتفالية في حب مصر” ويشارك فيه الفنان هاني شاكر بمجموعة من الأغاني الوطنية والأغاني الخاصة به، التذاكر متاحة لدى شباك الحجز.
فرقة بهية هـ تقدم حفل موسيقي في مركز فوتوبيا في الكوربة بمصر الجديدة يتضمن بعض الأغاني الثورية للشيخ إمام وسيد درويش، الفرقة تكونت في ميدان التحرير واشتهرت بأدائها للنوع ده من الأغاني، رسم الدخول 20 جنيه.
سهرة ظريفة للـ Couples في كايرو جاز كلوب في الفالنتاين. دي جي رامي و VJ Momo هـ يكونوا معاكم في الليلة دي بموسيقى هاوس تليق بيوم بـ يحصل مرة واحدة في السنة، الحجز ضروري.
بالموسيقى المميزة المستوحاة من كلاسيكيات الموسيقى العربية والهندية والأرمينية جورج كازازيان هـ يأخذكم معه في رحلة موسيقية ما تتفوتش في يوم عيد الحب في قاعة الحكمة بساقية الصاوي بالاشتراك مع باتريشيا درايجرعازفة الأكورديون ومحمد سيف اليزل عازف كونترباص ومحمود عبد الحفيظ على البيركشن، سعر التذكرة 20 جنيه لأعضاء ولغير أعضاء الساقية والحفل يبدأ في الثامنة مساءً.
بعيد عن الموسيقى هـ يكون فيه الليلة دي في ساقية الصاوي أمسية للحديث عن عدد من الفائزين بجائزة نوبل ومنهم تيودور ومسن (ألمانيا)، وبيورنستيرن بيورنسون (النرويج)، وهنريك سيكيفتش (بولندا)، وجوزويه كاردوتشي (إيطاليا) من تقديم أحمد عبد الجواد في قاعة الكلمة بساقية الصاوي، الدعوة عامة.
وعن المعارض الفنية بـ يستضيف جاليري سفر خان معرض لأعمال الفنان أحمد قاسم بعنوان “الترتيب العشوائي“، الأعمال هـ تكون مستوحاة من واقع حياة المجتمع المصري وتجسيد لظواهر عديدة زي إذاعة الأخبار غير الحقيقية، والعشوائية والفوضى، والمرونة وكمان هـ يضم تناول لبعض القصص الرمزية من خلال اللوحات.
يوم الجمعة تقدم فرقة وتريانو المكونة من صغار العازفين حفل موسيقي في قاعة الحكمة بساقية الصاوي، سعر التذكرة 15 جنيه لأعضاء ولغير أعضاء الساقية.
في أفتر 8 واحتفالًا بإطلاق الألبوم الجديد، مادو هـ يكون معاكم بكرة من الساعة 9 مساءً وهـ يقدم مجموعة من أغاني الألبوم وأغانى أخرى بموسيقى شرقية معاصرة، يوجد حد أدنى للطلبات 100 جنيه.
وزي ما تعودنا كل يوم سبت يقدم أوركسترا القاهرة السيمفوني بقيادة المايسترو أحمد الصعيدي حفل موسيقي لكلاسيكيات الموسيقى العالمية مع الفنان رضا الوكيل على المسرح الكبير بدار أوبرا القاهرة، التذاكر متاحة لدى شباك الحجز.
دي كانت أبرز الأحداث اللي حبينا ننوه عنها الأسبوع ده، وفيه عدد من الحفلات والمعارض والندوات وورش العمل اللي ممكن تعرفوا تفاصيلها من أجندة كايرو 360 ونشوفكم على خير ونتمنى لكم عيد حب سعيد.
مقترح
معالم وسياحة
موضوع مميز
زاوية أيدكين: حكاية أول خانقاه مملوكية في قلب القاهرة
اثار مملوكية في مصر خانقاه في القاهرة +2
معالم وسياحة
موضوع مميز
أشهر المساجد التاريخية في القاهرة.. معالم مذهلة بتحكي تاريخ عريق
أشهر مساجد القاهرة أقدم مساجد مصر +5
مطاعم
موضوع مميز
