دليل أحداث نهاية الأسبوع: مهرجان القلعة ومحمد نحاس وفريق الأطرش وبلاك ميتال
Cairo 360
خلصت الأجازات والراحات الطويلة وبدأت المراكز الثقافية تسترجع نشاطاتها
وبدأنا إحنا كمان نترقب الجديد على كل مسرح وملتقى أدبي وفني. الموسم الصيفي اقترب
من نهايته، وزي سبق الخيل اللي بـ يحمى في آخر لحظاته الموسم هنا سخن جدًا في
أيامه الأخيرة وبدأ كل مكان يقدم أحسن ما عنده وتزامن نهاية الموسم بانطلاق
مهرجان القلعة للموسيقى والغناء اللي فعالياته بدأت إمبارح على مسرح محكى القلعة
الموجود داخل قلعة صلاح الدين والمسرح المكشوف بدار الأوبرا، وهو مستمر لحد يوم
الأربعاء القادم الموافق 5 سبتمبر وكل يوم هـ يكون فيه عروض على المسرحين.
كمان فيه حفلات مميزة في كايرو جاز كلوب وساقية الصاوي وعلى مسرح الجنينة. اختارنا
أفضل الأحداث الفنية والثقافية في أيام الأجازة وحطيناها في المقال ده.
الليلة دي وضمن فعاليات مهرجان القلعة وعلى مسرح المحكى هـ يكون فيه حفل للفنانة نسمة عبد العزيز وعزف على آلة الماريمبا
وبعدها على نفس المسرح حفل غنائي للفنانة مروة ناجي. حفلات المهرجان بـ تبدأ
الساعة 8 مساءً، وقيمة الدخول لمحكى القلعة 5 جنيه بس.
وعلى المسرح المكشوف في دار الأوبرا (تبع مهرجان القلعة برضه) ولعشاق الشعر
العامي والغنائي هـ يكون فيه لقاء مع الشاعر الكبير جمال
بخيت، والمفاجأة أن الدخول للعرض ده مجاني بدون أي رسوم. الأمسية هـ
تبدأ الساعة 8 مساءً.
عودة فريق وسط البلد لحفلات كايرو
جاز كلوب، طبعًا هـ تحتاج تحجز لأن دول وسط البلد اللي جمهورهم يملأ ستاد رياضي،
فما بالك بكايرو جاز بمساحته الصغيرة. الحفل هـ يبدأ الساعة 10 مساءً ومستمر
لبعد منتصف الليل.
حفلة لفرقة تحابيش اللي بـ تقدم
أنواع مختلفة من الموسيقى منها الفانك والجاز بالطابع الشرقي، الليلة دي في ساقية
الصاوي في قاعة الحكمة. كلمات الأغاني ساخرة وثورية وناقدة للمجتمع، معظمها من
تأليف أعضاء الفريق. الحفل هـ يبدأ الساعة 8 مساءً والتذكرة بـ 10 جنيه بس.
نبدأ يوم الجمعة كده بحاجة مرعبة اسمها Wall of Death وهي حفل موسيقى ميتال وبلاك ميتال بـ يقدموه عدد من أهم الفرق
اللي بـ تقدم النوع ده من الموسيقى في مصر زي Anarchy وDestiny In
Chains وThe White Chamber. مهرجان للموسيقى العنيفة في ليلة واحدة هي يوم الجمعة بالليل في
قاعة النهر بساقية الصاوي والحفل هـ يبدأ الساعة 6 مساءً.
وفي نفس اليوم في قاعة الحكمة بالساقية هـ يكون فيه حفل
مختلف تمامًا للفنان محمد نحاس اللي اشتهر
بـ تقديم أغاني ساخرة على الجيتار بعد الثورة مباشرة. الحفل الساعة 8 مساءً
والتذاكر بـ 20 جنيه.
نرجع ثاني لمهرجان القلعة وواحدة من أجمل سهرات الأسبوع
وحفل يوم الجمعة هو حفل فرقة إسكندريلا في محكى القلعة وبعده مباشرة وفي تمام العاشرة
مساءً هـ يبدأ حفل النجم السوري مجد القاسم.
الدخول بـ 5 جنيه والسهرة صباحي.
في مركز شبابيك الثقافي الموجود في المقطم هـ يكون فيه حفل لفرقة هوجة باند بقيادة الفنان عمرو جاهين اللي قدم حفلات
كثير قبل كدة بشكل منفرد وهو بـ يجيد العزف على العود وآلات ثانية. والمرة هو
بصحبة “هوجة” ومتوقعين منه حفل قوي وموسيقى فريدة زي ما عودنا. الحفل
يبدأ الساعة 9 مساءً.
يوم الجمعة هـ يتم
افتتاح مهرجان لإعادة التدوير في درب 17 18، محاضرات عن كيفية إعادة تدوير مخلفاتنا وإزاي نقدر
نطلع منها منتجات تبقى مفيدة زي المنتجات الأصلية بالضبط، وهـ نشوف قد إيه
مخلفاتنا خطر علينا وعلى الكوكب. وهـ يكون فيه عرض غنائي موسيقي لفرقة الزبالين.
يوم السبت فيه حفل
ظريف لفرقة فريق الأطرش من لبنان على مسرح
الجنينة بحديقة الأزهر، الفرقة بـ تقدم موسيقى الهيب هوب ممزوجة بنغمات السول
والفانك والروك ومعاهم مغني الراب المصري ديب. الحفل هـ يبدأ الساعة 8:30 مساءً والتذكرة
بـ 10 جنيه بخلاف تذكرة دخول الحديقة.
يوم السبت هـ يكون
فيه عرض مش بـ يتكرر كثير، وهو عرض أوركسترا القاهرة
الاحتفالي على المسرح المكشوف بدار الأوبرا ضمن فعاليات مهرجان القلعة.
الحفل هـ يبدأ الساعة 8 مساءً والتذاكر متوفرة فى أكشاك الأوبرا.
دي كانت اقتراحاتنا عن
حفلات وعروض وأماكن ممكن تروحوها في الويك إند، لو عندكم اقتراحات ثانية يا ريت ما تكسلوش
وتبعتوها على info@cairo360.com أو تكتبوها في تعليقاتكم على صفحتنا على الفيسبوك وماتنسوش
تلقوا نظرة على أجندة موقعنا على الأقل علشان
تعرفوا باقي جدول عروض مهرجان القلعة، وبـ نتمنى لكم أجازة سعيدة وأوقات ظريفة.
