The Definitive Guide to Living in the Capital , Cairo , Egypt

رمضان جانا وفرحنا به بعد غيابه، أهلا رمضان..

بعد طول انتظار شرفنا شهر رمضان بفرحته وعزوماته وروحه الجميلة اللي بـ تنور لنا أيامنا، كل يوم بركة ونعمة جديدة على كل واحد فينا، وطبعًا بما أنه النهارده أول يوم رمضان وكل الناس هـ تبقى مشغولة مع الأهل والعزومات العائلية فالأحداث مش هـ تبقى كثيرة الأسبوع ده، دائما الأحداث بـ تبدأ بعد أول أسبوع تكون الواجبات العائلية انتهيت.

نبدأ بيوم الخميس، لو خلصت عزومتك بدري وعاوز تتفرج على حاجات جديدة، جرب تروح آرت كورنر جاليري عامل معرض بعنوان "رمضانيات"، واللي هـ يعرض فيه عدة أعمال للفنانين منهم: أحمد عبد الحميد، إيمان ناميس، تسنيم المشد، جيهان ويليام وغادة المفتي. الدعوة عامة.

وننتقل ليوم الجمعة، ومفاجأة علبة ألوان اللي محضرة لنا سهرة مع الفنان محمد سرور بمصاحبة فرقته، وهـ يقدموا مجموعة من الارتجالات الفنية والغنائية، الفنان محمد سرور مطرب، وشاعر وملحن يدمج العديد من القوالب الموسيقية كالـ Folk / Jazz والفلامنكو ليقدم مزيج موسيقي فريد. وسعر التذكرة 35 جنيه.

ونختم بيوم السبت، وحفل موسيقي لإسلام الشاعري في رووم آرت سبيس وذلك بمناسبة إطلاق ألبومه "جونار". واللي هـ يتضمن العزف على عدة آلات موسيقية من أفغانستان وإيران. وسعر التذكرة 35 جنيه.

كمان فيه على المسرح الكبير بدار الأوبرا المصرية حفل لأوركسترا القاهرة السيمفوني، وتقدم مجموعة من أعمال برودان، موتزارت، شتراوس بقيادة المايسترو ناير ناجي. والتذاكر متاحة بشباك الحجز.

واللي مش هـ يفطر مع أهله أو عاوز يخرج خروجة مختلفة مع أصحابه، فيه في محمية وادي دجلة إفطار رمضاني تقدمه Dune Raider، واللي هـ يبقى فيه أنشطة وفعاليات رمضانية مختلفة. وسعر التذكرة 200 جنيه.

وعلى يوم 4 رمضان بإذن الله هـ تبدأ سهرات خان الساقية في رمضان في ساقية الصاوي، واللي هـ يبقى فيها منوعات من الفنون الشعبية، وتقدر تأكل فيها السحور والحلوى الرمضانية الشهيرة. أو تشوف برامجك المفضلة على شاشات العرض المختلفة، سعر التذكرة 15 لأعضاء الساقية و25 لغير الأعضاء.

لو عاوزين تتابعوا باقي الأحداث اللي بـ ننزلها كل يوم على مدار الشهر تابعوا أجندتنا.

ويك إند سعيد! وكل رمضان وأنتم طيبين!