The Definitive Guide to Living in the Capital , Cairo , Egypt

الويك إند ده ممكن نسميه “ويك إند موسيقى الجاز”.. لكل محبي الجاز اليوم هو أول أيام المهرجان السنوي “كايرو جاز فيستيفال” اللى هـ يقام السنة دي فى حديقة الأزهر ومشارك فيه فرق كثيرة عالمية ومحلية، كمان إلى جانب المهرجان فيه عدة حفلات وفعاليات جاز هـ تحصل فى أماكن ثانية.. وبالتالى الويك إند ده مميز جدًا وهـ نستعرض معاكم دلوقت كل حاجة بالتفصيل:

يوم الخميس النهارده أول أيام مهرجان “كايرو جاز فيستيفال” فى حديقة الأزهر مع مجموعة من الفرق العالمية والمحلية:  Urban Trioو Kaz Okumura ومسار إجباري وقص ولزق، سعر التذاكر 75 – 50 جنيهًا، لمزيد من المعلومات اتصل بــ 01008425387 أو اضغط هنا.

أما فى “مكان” هـ تقدم فرقة تيليبوتيك موسيقى ومزج صوتي من الآلات الحية والآلات الإلكترونية لثلاثة موسيقيين، سعر التذكرة 20 جنيهًا، لمزيد من المعلومات اتصل بــ 27920878.

وبما أننا بـ نتكلم عن المهرجانات، النهارده آخر يوم فى المهرجان النوبي المصري الإفريقي الثالث في دار الأوبرا المصرية، المهرجان بعنوان “النوبة أرض الذهب” على المسرح المكشوف بالهناجر، لمزيد من المعلومات اضغط هنا، وفى مركز “شبابيك” الثقافى هـ يقام حفل للفنان رامي عصام في المسرح بالدور الثاني، سعر التذكرة 20 جنيهًا.

أما يوم الجمعة تستكمل حديقة الأزهر فعاليات مهرجان كايرو جاز (اليوم الثاني) مع مجموعة من الفرق العالمية والمحليةVein  و Holler my dear و Sylvain Beuf Electric Eccentric وSoweto kinch Oum وArabian Knightz & Arab Rap All Stars، سعر التذكرة 75 جنيهًا، لمزيد من المعلومات اضغط هنا.

“لحظات ويبدأ العرض” ده اسم العرض اللى هـ يعرض فى بيت الرصيف، وتقدمه فرقة بيت الرصيف المسرحية، تدريب وإخراج أُسامة عبد الماجد، سعر التذكرة 20 جنيهًا.

أما فى مكتبة الكتب خان هـ يتم عرض الفيلم الوثائقى  Buena Vista Social Club اللي بـ يحكي تاريخ فرقة موسيقية من كوبا، إخراج: ويم ويندرز، الدعوة عامة، لمزيد من المعلومات اتصل بــ 0225196569.

ومن المعارض اللى ممكن تروحها فى الويك إند معرض رائع بعنوان “ماسبيرو الجزء الثاني” في مركز درب 17 18 للفنون المعاصرة، المعرض مستمر لحد أول أبريل، وبـ يعرض فيه مجموعة من الفنانين وجهات نظرهم في الإعلام والتليفزيون المصري، الدعوة عامة.

أما يوم السبت فهو الأغزر من ناحية الأحداث والحفلات خاصة لموسيقى الجاز، نستكمل مهرجان الجاز فى يومه الثالث مع مجموعة أخرى من الفرق العالمية والمحلية Yuri Honing و4tet و Andre Carvalho Groupورامي عطاالله ومشروع ليلى، سعر التذاكر 100 – 150 جنيهًا، لمزيد من المعلومات اضغط هنا.

بينما فى ساقية الصاوي هـ يقام حفل موسيقى جاز مع فرقة “Vein”في قاعة النهر، سعر التذكرة 30 جنيهًا، لمزيد من المعلومات اتصل بــ 01000999994-0227366178.

وفى وكالة الغورى موعدكم مع العرض الأسبوعي للتنورة الراقصة، هـ تشوف عرض تنورة ساحر وهـ تسمع موسيقى تقليدية رائعة، لمزيد من المعلومات اتصل بــ 01154418037.

بالنسبة للندوات ممكن تحضر ندوة عن التصوير الفلكي في مركز شبابيك الثقافى واللي هـ تعقد على حلقات متتالية، سعر التذكرة 10 جنيه..

عيد الأم قرب.. لك فرصة أخيرة لو ما كنتش اشتريت لوالدتك هدية، فندق الفورسيزونز عامل حدث سنوي كبير لأكثر من 50 مصمم للإكسسوارات والملابس والإكسسوارات المنزلية لهدايا عيد الأم بعنوان “دايمًا محتاج لك يا أمى“، لمزيد من المعلومات اضغط هنا.

فى النهاية بـ نفكركم أن ختام مهرجان “كايرو جاز” هـ يكون يوم الأحد مع الموسيقار الرائع عمر خيرت ومجموعة من أهم ألحانه، سعر التذاكر 65 – 135 – 175 جنيهًا.. نتمنى لكم ويك إند سعيد، وما تنسوش تشوفوا أجندة كايرو 360 علشان تعرفوا الفعاليات الثقافية الثانية اللى ممكن تحضروها، الأجندة بـ يتم تحديثها يوميًا وأكيد هـ تلاقى حاجة على مزاجك..

نشوفكم على خير الأسبوع القادم!