The Definitive Guide to Living in the Capital , Cairo , Egypt

في آخر ويك إند في شهر نوفمبر “Sweet November” زي ما الناس بـ تحب تقول عليه، حضرنا لكم قائمة خروجات للويك إند كلها مزيكا، مزيكا وبس، كم كبير من الحفلات الموسيقية والغنائية الأسبوع ده وألوان مختلفة من المزيكا ترضي كل الأذواق. خروجاتنا المفضلة في الويك إند بـ تبقى للحفلات، وحبينا نشرككم معانا في إدمان فريق كايرو 360 للحفلات وساعدنا على ده المراكز الثقافية المختلفة اللي كثفت من برنامجها الموسيقي الأسبوع ده.

نبدأ بكايرو جاز كلوب وواحد من حفلاتنا المفضلة اللي بـ ننتظرها من شهر للثاني، وهو حفل فريق جلاس أونيون اللي بـ يلعب أغاني البيتلز، من سنة 1963 لحد 1970 وقت توقف الفريق الأسطورة، احجز مكانك وما تترددش، وهـ تنبسط أكيد لو كنت من عشاق البيتلز.  

وفي مطعم ولاونج سايجون الشهير في فندق فيرمونت نايل سيتي الأجواء مناسبة تمامًا لسهرة أغاني جاز كلاسيكية مع أهم مطرب جاز في العاصمة حاليًا أحمد حرفوش، احجز مكانك والحق الحفل اللي هـ يبدأ الساعة 9 مساءً. 

الموسيقار الكبير عمر خيرت هـ يقدم حفل الليلة دي على المسرح الكبير في دار الأوبرا المصرية، التذاكر متاحة بشباك الحجز، وإن كان يفضل أنكم تتصلوا وتتأكدوا لو لسه فيه تذاكر لأنها بـ تنفذ بسرعة البرق كعادة حفلات عمر خيرت. الحفل هـ يبدأ الساعة 7 مساءً. 

الموسيقار وعازف الدرامز يحيى خليل هـ يقدم حفل موسيقى الليلة على المسرح الصغير بدار الأوبرا المصرية. يحيى خليل مواظب على حفلات المسرح الصغير من زمن طويل وقادر يحافظ على قاعدة جماهيرية كبيرة بـ تحب مزيكته ومؤلفاته الشهيرة.

موود مختلف وألحان مصرية وكلمات للشاعر النوبي ناصر النوبي في حفل فريق جميزة في مكتبة صوفي بالزمالك، لمزيد من المعلومات اتصل بـ 01005696878.

وفي نهايات خميس الحفلات بـ نفكركم أن الليلة دي حفل فريق سيتي باند في قاعة النهر في ساقية الصاوي، الفريق بـ يلعب أغاني من تأليف وألحان أعضائه، وقدم عدد من الكليبات المتميزة وشارك في مهرجانات مهمة داخل وخارج مصر. 

يوم الجمعة وبعد فك الحظر ممكن تسهر سهرة مزيكا متنوعة، هاوس وتكنو وهيب هوب، فيها دي جي زيزو ومستر تي والعصابة وجولدي رايز، الليلة دي في روف بار في سهرة مش عادية بعنوان Ilounge، للحجز اتصل بـ 01001472886   

الفنانة الكبيرة عايدة الأيوبي مرة ثانية على المسرح يوم السبت الساعة 7 مساءً، في قاعة النهر بساقية الصاوي، احجز مكانك فورًا، سعر التذاكر 60 جنيه جلوس و40 جنيه وقوف. 

وزي ما تعودنا كل يوم سبت بـ يبقى فيه Jam Session أو حفل ارتجالات مزيكا جاز في جاز مايت بالزمالك، النهارده عازف الساكسفون شادي وعازف الكيبورد شبل والمغني شورى وعازف البيركشن بيكو هـ يقدموا مزيكا بشكل مختلف، للحجز اتصل بـ 01004811312 

وضمن فعاليات برنامج مسرح الفلكي الموسيقي يوم السبت هـ يقدم عازف العود العراقي البريطاني خيام اللامي حفل موسيقي بمسرح الفلكي بجوار الجامعة الأمريكية بوسط البلد، وهي واحدة من الحفلات القليلة اللي بـ يقدمها الفنان المتميز في القاهرة. التذاكر بـ 20 جنيه ويفضل الحجز المسبق. 

ويك إند موسيقي جدًا وعلى ذوقنا، اختارنا أهم الحفلات مش كلها، ممكن تدخل على أجندة الموقع وتشوف برنامج أماكن ثانية زي بيت الرصيف وأفتر 8 ودرب 17 18 ونتمنى لكم أجازة ظريفة.