دليل أحداث نهاية الأسبوع: عمرو قطامش ومنال محيي الدين وجلابية بارتي وأوليمبياد لندن
Cairo 360
رمضان كريم وتعود علينا الأيام بخير يارب.. بدأت المراكز الثقافية على
استحياء عرض فقراتها وبرامجها الرمضانية من وسط الأسبوع اللي إحنا فيه، الوقت
القليل اللي بين الأفطار والسحور والحرارة والرطوبة الشديدتين خلت ناس كثير تكسل
تنزل بعد الأفطار وتمارس أي نشاط ثقافي أو حتى رياضي، وفضلت القعدة في البيت تحت
التكييف وأمام شاشات التليفزيون، ده غير أن فيه عدد من الأعمال الدرامية والبرامج
متميزة فعلًا السنة دي. لكن لو حبيت تكسر الروتين وتغير جو بعد الأفطار ومنه تهضم
وجبتك الدسمة فإحنا هـ نقول لك على بعض الفعاليات اللي ممكن تحضرها الويك إند ده.
نبدأ بالنهاردة، الخميس بالليل؛ فيه مهرجان اسمه «مواويل» في مركز درب 17 18 الثقافي، مهرجان “مواويل” يمثل تجربة رمضانية جديدة تقدم أجواء
مختلفة، معارض فنية وعروض موسيقية وفلكلور وإنشاد صوفي وبازارات
متنوعة ومنيو للسحور. خروجة
حلوة في مصر القديمة.
في مركز سعد زغلول الثقافي فيه ليالي بيت الأمة الرمضانية وهـ تبدأ فعالياتها مع حفل كورال “الصوت
صوتك” تحت إشراف د. آيات ريان وهـ يقدم الكورال مجموعة من الأغانى
الوطنية من تراث سيد درويش.
منال محيي الدين أشهر
عازفة لآلة الهارب في مصر وواحدة من أمهر العازفين في العالم هـ تقدم حفل الليلة
دي في قاعة الحكمة في ساقية الصاوي، أسعار التذاكر 20 و15 جنيه.
أوليمبياد
لندن 2012، حدث تاريخي بـ يتكرر كل 4 سنين، للأسف ناس كثير مش هـ تقدر تتابع كل
فعاليات دورة الألعاب من خلال قنوات التليفزيون الأرضية والفضائية المفتوحة، لكن
ممكن تتفرج على مباريات منتخب مصر الأوليمبي في منافسات لعبة كرة القدم في أي مكان
عنده باقات الجزيرة الرياضية، ومنها ساقية الصاوي اللي هـ تعرض المباريات في قاعة
النهر، والليلة دي أول مباراة لمنتخب مصر أمام منتخب
البرازيل. بداية صعبة ومحتاجة صحبة في التشجيع، الماتش هـ يبدأ الساعة
9:30 مساءً والدخول بـ 10 جنيه.
الفنانة اللبنانية أميمة خليل هـ تقدم حفل في حديقة الأزهر على مسرح
الجنينة الليلة دي، وهـ تقدم مجموعة من أجمل أغانيها زي “إلخ، دارت القهوة، قلت بكتبلك، وعصفور”. أميمة
بـ تقدم موسيقى بلوز وجاز لها طابع شرقي. سعر التذكرة 20 جنيه والحفل هـ
يبدأ الساعة 9:30 مساءً.
أول جلابية بارتي في رمضان السنة دي هـ تبقى في بيكيا، البس
جلابيتك وجهز نفسك لسهرة مع أحلى موسيقى مع فرقة بهية، وأغاني للشيخ إمام وسيد
درويش. وانهي حفلتك مع أحلى سحور في بيكيا، لو مافيش جلابية مافيش دخول.
الشاعر
الحلمنتيشي عمرو قطامش هـ يقدم أمسية شعرية
يوم الجمعة في ساقية الصاوي في قاعة الحكمة، التذاكر بـ 15 و20 جنيه والدخول
الساعة 9 مساءً.
لأول
مرة من فترة طويلة هـ نشوف عرض تنورة في ساقية الصاوي، وده هـ يبقى يوم الجمعة
بالليل في قاعة النهر والدخول بـ 10 جنيه بس.
شوية
سياسة بقى، يوم السبت هـ يبقى فيه مناظرة بخصوص تاريخ دساتير مصر بالتعاون مع المجلس الثقافى البريطانى، المناظرة بقاعة الحكمة والدعوة عامة.
وفي
نفس الوقت بقاعة النهر هـ يكون فيه حفل إنشاد ديني
وأجواء صوفية مميزة والدخول بـ 10 جنيه للجميع.
دي
أهم الأحداث الموجودة معانا في أجندة الأسبوع ده وفيه مجموعة ثانية من الحفلات
والمعارض والأمسيات الرمضانية اللي ممكن تلقوا عليها نظرة من هنا، وربنا يتقبل صيامنا وطاعاتنا.
مقترح
معالم وسياحة
أشهر المساجد التاريخية في القاهرة.. معالم مذهلة بتحكي تاريخ عريق
أشهر مساجد القاهرة أقدم مساجد مصر +5
مطاعم
