دليل أحداث نهاية الأسبوع: شارموفرز ومهرجان الميتال وحنان ماضي ومسرحيات
Cairo 360
مش معقول كم الـ Long Weekends ده مؤخرًا، أجازة يوم الخميس مع الجمعة والسبت، أو أحد واثنين في أجازة شم النسيم، بـ نعتبر نفسنا في كايرو360 من المحظوظين اللي قدروا يأخذوا كل الأجازات الرسمية الحكومية -مع أننا مش حكومة طبعًا– بعد شوية مشاكسات مع مديرينا اللي مفهوم طبعًا ليه هم مش طايقين الأجازات دي كلها للموظفين، بس معلش يوم لنا ويوم علينا، بس المهم أننا ما فرطناش في الأجازات الطويلة ورتبنا هـ نعمل إيه في كل يوم منها مع تخمة الحفلات والخروجات الموسم ده، وهـ نقول لكم حالًا على أحداث آخر أجازة طويلة قبل أجازة عيد الفطر، ركزوا معانا.
الليلة دي الخميس يقام حفل مميز بجد في قاعة النهر بساقية الصاوي، حفل موسيقى يجمع بين موسيقى الزمن الجميل وموسيقى الـ Underground ممثلين في الفنانة حنان ماضي صاحبة الصوت العذب واللي ذاع صيتها من خلال غناء تتر مسلسل “المال والبنون” في منتصف التسعينيات، وينضم إليها الفنان الشاب محمد محسن، وأسعار التذاكر 80 و60 جنيه.
وعلى المسرح الصغير بدار الأوبرا المصرية حفل ثاني للموسيقى الراقية وريسيتال فيولينة وبيانو بقيادة الفنان حسن شرارة أفضل عازفي الكمان في مصر، والتذاكر متاحة بشباك الحجز والدخول الساعة 8 مساءً.
وضمن فعاليات مهرجان ريد زون هـ تقدم فرقة “تراب” اللي بـ يقودها الفنان الفلسطيني باسل زايد بـ تقدم موسيقى معاصرة تعبر عن تعقيدات وتفاصيل السياسة والحب والحياة اليومية تحت الاحتلال. الحفل الليلة دي بمسرح الجنينة وسعر التذكرة 20 جنيه مصري، ولا تشمل سعر تذكرة دخول حديقة الأزهر.
لو عاوز معارض فنية ممكن تحضر معرض بعنوان “السفر إلي الجنوب” بخان فنون واللي بـ يقدم مقارنة بين أعمال أربعة فنانين من أصول مختلفة (إيطاليا وأسبانيا وسويسرا واليونان)، عاش وعمل كل منهم في مصر لفترة من حياته. باستخدام اللوحة كوسيلة للتعبير، كان لكل فنان طريقة متنوعة في استكشاف علامات ورموز الثقافة المصرية وقدم كل منهم رؤيته الخاصة. الدعوة عامة.
بكرة الجمعة يقام بحديقة الأزهر أول حفل غنائي وموسيقي لفريق شارموفرز اللي حققوا نجاح كبير مؤخرًا وظهروا في أحد حلقات باسم يوسف، هـ يقدموا مجموعة من الأغاني المصرية المعاصرة بألحان مبتكرة وإيقاعات أفريقية وبرازيلية. سعر التذكرة: 45 جنيه مصري، ولا يشمل سعر تذكرة دخول الحديقة. للحصول على تذكرتك اضغط هنا.
وعلى المسرح الصغير هـ يبقى فيه حفل موسيقي لفنانين من مصر وجورجيا بدار الأوبرا المصرية. التذاكر متاحة بشباك الحجز، للاستعلام اتصل بـ 27390132.
يوم السبت على مسرح الجنينة حفل موسيقى الـ Heavy Metal اللي منتظرة كل عشاق النوع ده من المزيكا من زمان، خمسة فرق هـ تعزف أمام لجنة تحكيم عالمية. والفرق المشاركة: Anarchy – Crescent – Nathyr – Sinprophecy – Wyvern. وسعر التذكرة: 45 جنيه، السعر لا يشمل تذكرة دخول حديقة الأزهر، واليوم ما يتفوتش لو كنت Metal Head أصيل.
وفي ساقية الصاوي في قاعة النهر حفل موسيقي بعنوان “مش عَشرة غربي”، يحيي الحفل فريق “عَشرة بلدي” وبـ ينضم إليه مجموعة من مطربي فرق أخري، زي أدهم السعيد من فريق “وسط البلد” ومنة حسين من “قص ولزق” بالإضافة لغيرهم. سعر التذكرة 20 جنيه.
على مسرح روابط في وسط البلد هـ يبقى فيه عرض مسرحي بعنوان “جناس ناقص” تقدمه فرقة هاند ميد المسرحية، يذكر أن العرض مأخوذ عن رواية بعنوان: الخلود، والعرض نتاج ورشة ارتجال. الإخراج لمحمد أبو اليزيد ومحمود الحداد. سعر التذكرة: 5 جنيه.
وأخيرًا وزي كل يوم سبت في الموسم الصيفي وعلى المسرح الكبير بدار الأوبرا المصرية هـ يبقى فيه حفل أوركسترا القاهرة السيمفوني، التذاكر متاحة بشباك الحجز والدخول الساعة 8 مساءً.
احجزوا أماكنكم في العروض من بدري، ولو مش عاجباكم العروض دي ممكن تلاقوا اللي يعجبكم على أجندة كايرو 360 المهم تستمتعوا بالأجازة ونشوفكم الأسبوع اللي جاي على خير.
مقترح
معالم وسياحة
أشهر المساجد التاريخية في القاهرة.. معالم مذهلة بتحكي تاريخ عريق
أشهر مساجد القاهرة أقدم مساجد مصر +5
مطاعم
