دليل أحداث نهاية الأسبوع: شادي حسن وفرقة دروشة ونسمة عبد العزيز وإنشاد ديني
Cairo 360
مساء الخير يا أهل كايرو.. إيه الأخبار؟ يا ترى عندكم نفس الشعور الغريب
اللي عندنا الأسبوع ده؟ أول أسبوع يعدي من غير أحداث سياسية كبيرة تأثر في حياتنا
اليومية ماعدا بعض الاعتصامات والوقفات الاحتجاجية، تقريبًا ده أول أسبوع يعدي من
بعد رمضان اللي فات من غير مواضيع كبيرة وأحداث مؤثرة، لأ.. وبقى عندنا رئيس
للجمهورية، يعنى حاجة كده لو فكرت فيها تحس أن أنت بـ تحلم من كثر ما عدى وقت
والبلد مش باين لها ملامح واليأس كان أصاب ناس كثير وكان لهم حق بصراحة. المهم
إحنا بالمناسبة السعيدة دي قررنا ندعوكم للفسحة والانطلاق والخروج لمسارح ونوادي
ومراكز كايرو الثقافية علشان تتفرجوا على عروض ظريفة وتسمعوا مزيكا جامدة وتشوفوا
أفلام ومسرحيات قيمة. اقرأوا المقال ده واعرفوا هـ تعملوا إيه بدءًا من الليلة دي.
النهاردة عندنا حفل من نوع خاص وهو إنشاد ديني للمنشد حسام صقر وده بمناسبة احتفالات النصف من شعبان،
الحفل على المسرح المكشوف في دار الأوبرا، ويتضمن برنامج الحفل مجموعة من الأشعار الصوفية اللي كتبها الدكتور
صلاح الدين القوصى.
معرض مهم هـ يتم افتتاحه النهاردة في مركز طلعت حرب الثقافي في وسط
البلد، المعرض بعنوان (إبداعات حرة) وبـ
يضم لوحات وأعمال فنية وصور فوتوغرافيا أعمال نحت لطلبة كلية فنون جميلة وكلية
تربية فنية وكلية تربية نوعية. المعرض مستمر ليوم 14 يوليو.
فنانة مجرية اسمها (مارج) هـ
تقدم حفل غنائي في مركز صوفي الثقافي اللي في الزمالك، الليلة دي الساعة 8 مساءً.
مارج بـ تقدم أغاني الجاز والتريب هوب بمصاحبة فرقتها. الحفلة دي هـ تبقى حلوة
وعلى ضمانتنا.
أول خميس في الشهر يعني حفلة أم كلثوم، ربنا ما يقطع عادة لساقية الصاوي
اللي بـ ترجعنا للزمن الجميل من خلال مسرح العرائس وخاصة مع عرض أم كلثوم فى أول
يوم خميس من كل شهر. الحفل في قاعة الحكمة والتذكرة بـ 10 جنيه أو 5 جنيه لأعضاء
الساقية.
فرقة دروشة
شفناها من فترة في حفل في مركز درب 17 18 الثقافي وعجبتنا فكرة الفريق جدًا ونوع
الموسيقى اللي بـ يقدموها والمزج الرائع بين العود والجيتار أو بين الموود الصوفي
وموسيقى الروك. الفريق هـ يقدم حفلة الليلة دي في قاعة النهر في ساقية الصاوي، التذكرة
بـ 15 جنيه والحق مكانك في الصفوف الأولى.
يوم الجمعة على مسرح الجنينة في حديقة
الأزهر هـ يكون فيه حفل لفرقة صحرا وطبعًا
بجانب أغاني الفريق الخاصة توقعوا عدد من اشهر أغاني الراي زي أغاني الشاب خالد
ورشيد طه اللي اشتهرت الفرقة بـ تقديمها على مدار السنين اللي فاتت. الدخول بـ 10
جنيه وده بخلاف تذكرة دخول الحديقة نفسها.
فنان شاب جديد عمل أكثر من أغنية ناجحة
جايز تكون سمعتها وما عرفتش أنها بتاعته زي “قامت تمشي” و”بلدنا ملكنا” وغيرهم،
المطرب شادي حسن صاحب الأغاني دي هـ يقدم
حفل غنائي يوم الجمعة بالليل في ساقية الصاوي في قاعة النهر. التذكرة بـ 20 جنيه. ملحوظة: شادي صوته حلو بجد.
فرقة تونسية اسمها كليم هـ تكون بـ تلعب في نفس الوقت في قاعة الحكمة
في ساقية الصاوي، موسيقى مختلفة من تونس الخضراء، والتذكرة بـ 25 جنيه لغير
الأعضاء.
بداية من يوم الجمعة ولمدة 4 ليال
متواصلة هـ يبقى فيه عرض فصول من باليه زوربا والليلة
الكبيرة على المسرح الكبير في دار الأوبرا المصرية لفرقة
باليه أوبرا القاهرة وأوركسترا أوبرا القاهرة. التذاكر متوفرة على الأبواب وفيه
أسعار خاصة للطلبة.
موسيقى فلامنكو ورومبا في حفل فريق كال كوك في ساقية الصاوي يوم السبت الساعة 8 مساءً
في قاعة النهر. الفريق بـ يقدم أغاني الفنان جيس كوك. موسيقى حلوة وترقص، ما تفوتش
الحفلة دي.
ويوم السبت كمان فيه حفل لعازفة آلة
الماريمبا الأشهر في مصر نسمة عبد العزيز
على المسرح المكشوف في دار الأوبرا المصرية، الحفل هـ يبدأ الساعة 8 مساءً وحاول
تلحق تذكرتك.
فيه ندوات ظريفة الأسبوع ده بخصوص
اقتراب شهر رمضان وما يخص الشهر الكريم، وفيه معارض فنية كثيرة كنا كتبنا عنها
مقالات مطولة الأسبوع اللي فات، ده غير العروض المسرحية وليالي الكاريوكي والدي جي
في أماكن بعينها. ادخل على أجندة موقعنا
واعرف أكثر عن الحاجات اللي إحنا مش كاتبين عنها هنا. ونشوفكم على خير.
