دليل أحداث نهاية الأسبوع: سلالم وريديمرز وندوات ومعارض فنية
Cairo 360
أهلاً بكم ويارب تكونوا استمتعتم بأجازة العيد اللي المفروض خلصت من
يومين، بس فيه ناس لسه مكملاها ووصلتها بالويك إند اللي بعده. بس اللي ما عملش كده
ونزل الشغل أيام الأربعاء والخميس بـ نقول له أهلًا بك في ثاني أجازة الأسبوع ده
وهـ نقول لك على كام حاجة تعملها في أيام الخميس والجمعة والسبت. وأجندتنا مش كبيرة
قوي الأسبوع ده للأسف لأن فيه أماكن ومراكز ثقافية كثير لسه واخدة راحة بعد برامجه
الممتدة في أيام رمضان والعيد، وهـ نبدأ ننشر الجدول الخاص بها تباعًا بدءًا من
الأسبوع اللي جاي. ودلوقتي هـ نتكلم عن الحفلات والندوات والمعارض الموجودة
الأسبوع ده، وما ننساش أن فيه أفلام جديدة عربية وأجنبية غرقت دور العرض في أجازة
العيد وممكن تعرفوا كل تفاصيلها ومواعيد عرضها من صفحة
السينما عندنا.
نبدأ بالنهاردة الخميس وعودة لحفلات الروك وواحد من أقوى
الفرق الموجودة على ساحة الـ Underground
الموجودة في مصر حاليًا وهي فرقة Redeemers اللي بـ تقدم موسيقى الميتال أو بالتحديد Symphonic Power Metal والفرقة مشهورة بتقديم عروض حية مبهرة تستخدم فيها الأزياء
والماكياج. الحفل المرة دي في ساقية الصاوي في قاعة الحكمة على غير العادة لأن قاعة
النهر هي اللي بـ تبقى مخصصة لحفلات الروك، التذاكر بـ 25 و30 جنيه والحفل هـ يبدأ
الساعة 8 مساءً.
معرض ماستر بيسيس x المقام في قاعة الزمالك للفن
فعالياته لسه مستمرة لحد يوم 30 سبتمبر اللي جاي. المعرض جماعي وبـ يضم أعمال
لرسامين ونحاتين مصريين، والدخول متاح للجميع والأجازة الأسبوعية يوم الجمعة.
ده كان بالنسبة ليوم الخميس، يوم الجمعة عندنا حدث واحد وهو ندوة في ساقية
الصاوي بعنوان
“كيف يعمل عقل المبدع؟” يحاضر فيها الدكتور هاني
سليمان في قاعة الكلمة. الدعوة عامة والدخول الساعة 6 مساءً.
يوم السبت فيه ندوة ثانية مهمة في نفس المكان بعنوان ثقافتنا المصرية في الميزان، وهـ تعقد الندوة الجمعية المصرية للحفاظ على التراث. بـ تحاضر فيها الأستاذة
الدكتورة مارلينا برود هارشت، أستاذ الطب النفسي. الدخول الساعة 8 مساءً والدعوة
عامة.
حفل لفريق ورشة وطن في قاعة الحكمة بساقية الصاوي، الفريق بـ
يقدم مجموعة من الأغنيات لها طابع مختلف، وتعكس الكلمات اللي نقدر نوصفها
بأنها مستهدفة شخصية الفريق ومدى حبهم لمصر وأرضها. سعر التذكرة 15 جنيه للجميع والحفل هـ يبدأ الساعة 8 مساءً.
الفريق المحبوب سلالم
هـ يقدم عرض
حى فى كايرو جاز كلوب يوم السبت الساعة 10 مساءً، بـ يقدموا موسيقى الإندي بوب
وكلمات أغانيهم جذابة وكوميدية وموسيقى الفانك في بعض الأغاني أكيد هـ تبسط جمهورهم. الحجز ضروري قبل ما تروح كايرو جاز
كلوب
زي ما قولنا لكم الأحداث الثقافية
محدودة الأسبوع ده والانطلاق مرة ثانية لاستكمال الموسم الصيفي في العروض هـ يبقى
بداية من الأسبوع اللي جاي، وتابعوا دائمًا أجندة
موقعنا علشان تعرفوا كل جديد بـ يحصل في العاصمة، عندنا وقبل أي حد!
ونشوفكم على خير زي النهاردة كمان أسبوع.
مقترح
معالم وسياحة
أشهر المساجد التاريخية في القاهرة.. معالم مذهلة بتحكي تاريخ عريق
أشهر مساجد القاهرة أقدم مساجد مصر +5
مطاعم
