The Definitive Guide to Living in the Capital , Cairo , Egypt

مجرد ما ييجي يوم الخميس كل الدنيا بـ تبقى وردي فجأة لمجرد أننا عارفين أن خلاص الأجازة والويك إند فاضل عليهم كام ساعة، إحنا بـ نحب يوم الخميس والجمعة والسبت جدًا، المفروض يتعمل نصب تذكارى للأيام الجليلة دي، بـ نشحن من خلالها طاقة تخلينا نقدر نكمل الأسبوع، سواء بفسحة أو خروجة حلوة، أو مجرد حضور حفلة أو معرض أو مهرجان واللى دليلنا مليان بهم الأسبوع ده:  

نبدأ مع يوم الخميس وحفل الفنان مدحت صالح فى دار أوبرا جامعة مصر للعلوم والتكنولوجيا، وهـ تصاحبه الفرقة الموسيقية بقيادة المايسترو عمرو سليم، أسعار التذاكر: 75 – 100 – 150 – 200 – 250 – 300 جنيه، والدخول بالملابس الرسمية. أما فى ساقية عبد المنعم الصاوى ولأول مرة ممكن تحضر مسابقة الساقية الثالثة لفن الأداء الساخر اللى مستمرة لحد يوم 20 فبراير، المسابقة هـ تقام فى قاعة الحكمة وسعر التذكرة 25 جنيه لغير الأعضاء و20 جنيه للأعضاء.

كان معروف قبل كده باسم مهرجان الشباب المبدع لكن دلوقت اسمه مهرجان  Avant-Scène  (الدورة 14) اللى بيقام فى المعهد الفرنسي وبـ يضم مجموعة من أعمال تسعة مخرجين من الشباب وآخر أعمال المخرج المسرحي محمد الخطيب، ونروح لساقية الصاوى تانى وحفل المولوية المصرية على مسرح قاعة النهر بقيادة الفنان الصوفي عامر التوني، سعر التذكرة 35 جنيه لغير الأعضاء و30 جنيه لأعضاء الساقية.

وعلى مسرح الجمهورية فيه عرض مسرحي بعنوان "الزيبق" تقدمه فرقة فرسان الشرق المسرحية، العرض من إخراج طارق حسن، العرض مستمر لحد يوم 22 فبراير.

ونروح على رووم آرت سبيس وحفل موسيقي لفرقة "النفيخة"، وهو مكون من خماسي آلات النفخ النحاسية: محمد سواح على آلة الترومبيت، وأمير إبراهيم وأحمد إسماعيل على الترومبون، ومساكي على آلة الباص توبا ورامي سامي على الساكسفون.

أما يوم الجمعة فيه حفل للفنانة ديانا حداد بدار أوبرا جامعة مصر للعلوم والتكنولوجيا، بالإضافة لكورال "أطفال مصر" بمصاحبة أوركسترا سليم سحاب السيمفوني العربي، أسعار التذاكر: 200 – 250 – 300 – 350 – 400 – 500 جنيه. ولمحبي الطبخ والأكل بصفة عامة فيهThe Big Friday Brunch  في فندق سميراميس إنتركونتيننتال، الحدث بـ يقام كل يوم جمعة وبـ يضم أكلات شرقية من المطبخ المصري واللبناني، كمان هـ يضم من المطابخ العالمية السوشي والباستا وغيرها من الأكلات الشهية، كل ده بسعر يبدأ من 235 جنيه للفرد الواحد.

وفى ساقية الصاوى ممكن تحضر حفل غنائي لفرقة "أيامنا الحلوة"، الفرقة بـ تقدم أغاني كلاسيكية من الزمن الجميل، رؤية وقيادة الفنان محمد عثمان، سعر التذكرة 30 جنيه للوقوف و50 جنيه للجلوس، وفيه خصم 5 جنيه لأعضاء الساقية.

ونختم بيوم السبت مع حفل Machine Eat Man ورامي أبادير في رووم آرت سبيس، هـ يقدموا مجموعة من أغاني ألبومهم الجاى، ورامي أبادير من أشهر الناس اللى قدموا الموسيقى الإلكترونية في مصر، سعر التذكرة 50 جنيه تشمل مشروب.

أما فى دار الأوبرا المصرية فيه حفل Mozartina II لأوركسترا القاهرة السيمفوني على المسرح الكبير، ويقدم فيه مجموعة من أعمال الموسيقار الكبير موتزارت، بالإضافة لبرامز وكوبلاند، يصاحب الأوركسترا كورال الأكابيلا بقيادة مايا جيفنريا، وروزاليا جوميز على البيانو ومحمد حمدي على آلة الكلارينت، الحفل بقيادة المايسترو أحمد الصعيدي.

وفى "مدار" ممكن تحضر حفل موسيقي لعازف الـ Bass الفنان سامر جورج، سعر التذكرة 35 جنيه، ونختم الويك إند بالمفاجأة الكبيرة وهى حفلين متتاليين لفرقة "كايروكي" فى ساقية الصاوي فى قاعة النهر

يقام بقاعة النهر بساقية الصاوي حفلان لفريق الروك المصري الشهير "كايروكي"، سعر التذكرة 45 جنيه لأعضاء الساقية و50 جنيه لغير الأعضاء، الحفل الأول بـ يبدأ الساعة 4 عصرًا والثاني بـ يبدأ الساعة 7:30 مساءً.

دي كانت بعض الأحداث الشيقة اللى ممكن تروحوها فى الويك إند، لو عاوزين تعرفوا أكثر ممكن تشوفوا صفحة الأجندة على الموقع.

ويك إند سعيد!